پرەزيدەنت استانا قالاسىنداعى بوتانيكالىق ساياباقتا ەرىكتى جانە بەلسەندى جاستارمەن بىرگە اعاش ەكتى. جالپىۇلتتىق ءىس-شارا اياسىندا بيىل رەسپۋبليكا اۋماعىندا 2,4 ميلليونعا جۋىق كوشەت وتىرعىزىلعان.
مەملەكەت باسشىسى «Jasyl el» ۇيىمىنىڭ بەلسەندىلەرىمەن اڭگىمەلەسىپ, قوعامدىق جۇمىسقا اتسالىسىپ جۇرگەن جاستارعا العىس ايتتى.
– بارشاڭىزعا ريزاشىلىعىمدى بىلدىرەمىن. بۇل – وتە قاجەتتى جۇمىس. ەلىمىز بەن حالقىمىز ءۇشىن كەرەك ءىس. سوندىقتان سىزدەرگە تابىس تىلەيمىن. ىستەرىڭىز ءساتتى بولسىن. ەڭ الدىمەن نيەتىمىز تازا بولۋى كەرەك. وتانىمىز ءۇشىن قىزمەت ەتۋگە ءتيىسپىز. «Jasyl ەl» ۇيىمىنىڭ جۇمىسىن قولدايمىن. جۇمىستارىڭىز وزگە جاستارعا ونەگە, ولار cىزدەردەن ۇلگى الادى, – دەدى قاسىم-جومارت توقاەۆ.
سودان كەيىن پرەزيدەنت «نۇرا» اۋدانىنداعى «Greenline» بۋلۆارىن ارالاپ كوردى. اۋماعى 3,8 گەكتار بولاتىن نىسانداعى جۇمىستىڭ ءبىرىنشى كەزەڭى اياقتالعان. مۇندا جاياۋ جۇرگىنشىلەرگە جانە ۆەلوسيپەدشىلەرگە ارنالعان جولدار, ساۋلەتتىك قالىپتار جانە جاساندى توعاندار بار.
مەملەكەت باسشىسىنا استانا قالاسىنداعى اباتتاندىرۋ جۇمىستارى جايىندا مالىمەت بەرىلدى.
جەڭىس قاسىمبەك ەلوردادا قازىر 170 قوعامدىق كەڭىستىك پەن اۋلانى اباتتاندىرۋ بويىنشا كەشەندى باعدارلاما ىسكە اسىرىلىپ جاتقانىن ايتتى. بۇل جۇمىستار بوتانيكالىق باقتا, ترياتلون پاركىندە, اتاتۇرىك, بەيبىتشىلىك جانە كەلىسىم, پرەزيدەنت ساياباقتارى مەن قالانىڭ نەگىزگى كوشەلەرىندە جۇرگىزىلىپ جاتىر. سونىمەن قاتار «مىڭجىلدىق» اللەياسىن اباتتاندىرۋدىڭ تۇجىرىمداماسى جاسالدى. ەسىل وزەنىنىڭ جاعالاۋىن رەكونسترۋكتسيالاۋ شارالارى اياقتالۋعا جاقىن.
مەملەكەت باسشىسى قالا ينفراقۇرىلىمىن جەتىلدىرۋ, تۇرعىندارعا زاماناۋي ءارى قولايلى, ەكولوگيالىق تۇرعىدان تازا ورتا قالىپتاستىرۋ باعىتىنداعى جۇمىستاردى جالعاستىرۋ جونىندە تاپسىرما بەردى.
