سۋرەتتى تۇسىرگەن – جۇماباي مۇسابەك
وبلىس اكىمى بەيبىت يساباەۆتىڭ قاتىسۋىمەن تالدىقورعان قالاسىندا اعاش ەگۋ اكتسياسى ۇيىمداستىرىلىپ, ەكولوگيالىق سەنبىلىككە مىڭداعان ادام قاتىستى. ەكولوگيالىق شارانىڭ الدىندا ايماق باسشىسى ەلدى مەكەندەردىڭ تازالىعىن قامتاماسىز ەتۋگە ارنالعان وبلىستىق «ۇلگىلى ەلدى مەكەن» بايقاۋىنىڭ جەڭىمپازدارىن ماراپاتتادى. «ۇلگىلى اۋدان ورتالىعى» اتالىمىندا ءى ورىندى سارقان قالاسى, ءىى ورىندى جاركەنت قالاسى, ءىىى ورىندى سارىوزەك كەنتى ەنشىلەسە, «ۇلگىلى اۋىل» اتالىمىندا ءى ورىندى قاراتال اۋدانىنداعى كالپە اۋىلى, ءىى ورىندى كوكسۋ اۋدانى, جارلىوزەك اۋىلى, ءىىى ورىندى ەسكەلدى اۋدانىنداعى الدابەرگەنوۆ اۋىلى, الاكول اۋدانىندىعى اقتۇبەك اۋىلى الدى. تالدىقورعان قالاسى «جۇلدىز» شاعىن اۋدانىنىڭ №25, №27 ۇيلەرىنىڭ ءجاي سەرىكتەستىگى, تەكەلى قالاسى, جەڭىس كوشەسىنىڭ №11 ءۇيىنىڭ ءجاي سەرىكتەستىگى «ۇلگىلى اۋلا» اتالىمىندا ەرەكشەلەندى.
«تازا قازاقستان» اكتسياسى – ەكولوگيالىق مادەنيەتتى جاڭعىرتۋ مەن ازاماتتىق جاۋاپكەرشىلىكتى ارتتىرۋدىڭ ايقىن كورىنىسى. مۇنداي باستامالار قوعامنىڭ قورشاعان ورتاعا دەگەن كوزقاراسىن وزگەرتەدى, ءاربىر تۇرعىننىڭ تۋعان جەر الدىنداعى پارىزىن ەسكە سالادى. جەتىسۋدىڭ جاسىل كەلبەتى مەن تازا اۋاسى – بۇگىنگى ەڭبەكتىڭ جەمىسى, ەرتەڭگى ۇرپاقتىڭ اماناتى», دەدى قالا تۇرعىنى, ايتىسكەر اقىن ايتاقىن بۇلعاقوۆ.
وبلىستىق جۇقپالى اۋرۋلار اۋرۋحاناسىنىڭ الدىنداعى گۇلزاردا قىلقان جاپىراقتى, جالپاق جاپىراقتى 500 ءتۇپ اعاش وتىرعىزىلدى. جالپى وبلىستا سەنبىلىك اياسىندا 9 430 ءتۇپ كوشەت ەگىلدى.
«بۇگىن دوستارىمىزبەن بىرگە اعاش وتىرعىزۋ شاراسىنا قاتىستىق. جاستار قاۋىمىنىڭ وكىلى رەتىندە مۇنداي شارالاردا بەلسەندىلىك تانىتىپ, وزگەلەرگە ۇلگى بولۋعا تىرىسامىن. قورشاعان ورتا – ءبىزدىڭ ورتاق ءۇيىمىز. تابيعاتقا جاناشىرلىقپەن قاراۋ, تازالىق پەن ءتارتىپتى ۇستانۋ – قوعامنىڭ باستى مىندەتى», دەيدى ايماقتىڭ بەلسەندى جاستارىنىڭ ءبىرى نۇراسىل مولدابەكوۆ.
تالدىقورعاننىڭ تاعى ءبىر تۇرعىنى مارجان عىلىمبەققىزى دا نۇراسىلدىڭ ءسوزىن قۋاتتاپ: «سەنبىلىككە كىشى ۇلىمدى ەرتىپ, ەرتەرەك كەلدىم. سول ارقىلى بالاما اۋىر ەڭبەكتەن قاشپاۋدى, تابيعاتتى قالاي قورعاۋدى, ءسۇيۋدى, تۋعان قالاسىنا جاناشىرلىقپەن قاراۋدى ۇيرەتكىم كەلەدى. بۇل قاسيەتتەردى وسكەلەڭ ۇرپاقتىڭ بويىنا ءسابي كەزىنەن ءسىڭىرۋ كەرەك. بالام 7 جاستا, بۇگىن تۇڭعىش رەت كوشەت ەكتى. وسىنداي يگىلىكتى ءىستى ەسىندە جاقسى ساقتاپ, تۋعان جەرىنە قامقورلىق جاساۋدى ۇيرەنەدى دەپ ويلايمىن», دەدى.
ماراپات العانداردىڭ اتىنان ءسوز العان سارقان اۋدانى, سارقان قالاسىنىڭ اكىمى امانتاي ورىنبەكوۆ: «2025 جىلى بۇگىنگى كۇنگە دەيىن مىڭنان اسا اعاش ەگىلدى. تاعى مىڭنان اسا اعاش وتىرعىزۋ جوسپاردا بار. مىڭ تەكشە مەتردەن استام قوقىس سىرتقا شىعارىلدى. ماراپات بىزگە ەكى ەسە جاۋاپكەرشىلىك جۇكتەيدى. تازالىق جۇمىستارىن ءارى قاراي دا جالعاستىرامىز. قالامىزدى تازا ۇستايمىز», دەپ ريزاشىلىعىن جەتكىزدى.
سەنبىلىكتىڭ جۇمىسىن تۇيىندەگەن وبلىس اكىمىنىڭ ورىنباسارى مارلەن كولباەۆ اتقارىلعان جۇمىستاردىڭ ناتيجەسىمەن تانىستىرا كەلىپ: «تازا قازاقستان» جالپىۇلتتىق اكتسياسى اياسىندا جەتىسۋ وبلىسىندا كوپتەگەن ءىس-شارا ۇيىمداستىرىلىپ جاتىر. اپتا سايىن «تازا بەيسەنبى» شاراسى وتكىزىلىپ, كاسىپورىنداردىڭ, ۇيىمداردىڭ ۇجىمدارى مەن بيزنەس-قاۋىمداستىق وكىلدەرى وزدەرىنە تيەسىلى اۋماقتاردى تارتىپتكە كەلتىرىپ, تازارتۋ جۇمىستارىن جۇرگىزەدى, كوگالداندىرادى. سونداي-اق ءار ەكى اپتا سايىن سەنبىلىك وتكىزىلەدى. وندا ساياباقتارعا, گۇلزارلارعا, اللەيالارعا, اۋلالارعا, كوشەلەرگە تازالىق جۇرگىزىلەدى. ودان بولەك, ەكوباعدارلاما اياسىندا كوپقاباتتى ۇيلەردىڭ شاتىرلارى جاڭارتىلىپ, اۋلالار تازارتىلادى, بالالاردىڭ ويىن, سپورت الاڭدارى سالىنىپ, كوشەلەر جارىقتاندىرىلادى, ەلدى مەكەندەردى اباتتاندىرۋعا قاتىستى كوپتەگەن جۇمىس اتقارىلادى. جىل باسىندا 120 مىڭ ءتۇپ اعاش كوشەتىن ەگۋ جوسپارلانعان ەدى. سوعان سايكەس 56 مىڭ كوشەت كوكتەم كەزىندە تىگىلسە, قالعان 64 مىڭ ءتۇپ اعاشتى كۇز كەزىندە وتىرعىزامىز. بۇگىنگى ءبىر كۇننىڭ وزىندە 9,5 مىڭ اعاش كوشەتى وتىرعىزىلدى», دەپ اتاپ ءوتتى.
جالپى, جەتىسۋ وبلىسىندا وتكەن سەنبىلىك بارىسىندا 438,2 گەكتار اۋماق تازارتىلىپ, 886 توننا قوقىس جينالدى. ەكوشارالارعا 22 800 ادام قاتىستى, 204 بىرلىك تەحنيكا جۇمىلدىرىلدى.
جەتىسۋ وبلىسى
