وبلىستىق ءبىلىم باسقارماسىنىڭ مالىمەتىنە قاراعاندا, مۇنايلى شاھاردا بىلتىر اتالعان ساناتتاعى مەكتەپتىڭ ۇشەۋى, بيىل بىرەۋى ىسكە قوسىلدى. ەندى اقساي-2, جۇلدىز-3 شاعىن اۋداندارىندا وسىنداي ەكى ءبىلىم ورداسىنىڭ قۇرىلىسى قولعا الىنعان. سونداي-اق قۇلسارى قالاسىندا 1200 ورىندىق, قۇرمانعازى اۋدانىنداعى اقكول اۋىلىندا 600 ورىنعا ەسەپتەلگەن مەكتەپتىڭ قابىرعاسى قالانىپ جاتىر.
ەل نازارىن اۋدارعان ۇلتتىق جوبا اياسىنداعى «كەلەشەك مەكتەپتەرىنىڭ» ءبىرى اتىراۋ قالاسىنىڭ جۇلدىز-2 شاعىن اۋدانىندا ورنالاسقان. جاڭا ءبىلىم ورداسى جاڭا وقۋ جىلىندا وقۋشىلاردى قابىلداي باستادى. مەكتەپ ديرەكتورى ورىنگۇل قۋاندىقوۆانىڭ ايتۋىنشا, 900 ورىندىق ءبىلىم ورداسىندا 1800 وقۋشىنىڭ ساپالى ءبىلىم الۋىنا بارلىق جاعداي جاسالعان.
«زاماناۋي ۇلگىدە سالىنعان ەرەكشە مەكتەپتىڭ ماتەريالدىق-تەحنيكالىق بازاسى تولىق جابدىقتالدى. مەديتسينالىق كابينەت اشىلدى. نىسان بەينەباقىلاۋ جانە قاۋىپسىزدىك جۇيەسىمەن قامتاماسىز ەتىلدى. ەندىگى ماقساتىمىز – ءار وقۋشىنىڭ ساپالى ءبىلىم الۋىنا بارىنشا جايلى ءارى قاۋىپسىز جاعداي قالىپتاستىرۋ», دەيدى و.قۋاندىقوۆا.
وتكەن جۇمادا شاھار ىرگەسىندەگى شاعىن اۋداندا اشىلعان مەكتەپتە اشىق ەسىك كۇنى ءوتتى. اتا-انالار مەكتەپتىڭ ماتەريالدىق-تەحنيكالىق بازاسىمەن تانىسۋعا كەلدى. ولار كوكەيدە جۇرگەن ساۋالدارىنا جاۋاپ الدى.
«بۇل مەكتەپكە كەلەتىن ءۇش بالام بار. ولار بۇرىن جۇلدىز-1 شاعىن اۋدانىنداعى №39 مەكتەپكە قاتىناعان ەدى. وقۋشىنىڭ كوپتىگىنەن ءۇشىنشى اۋىسىمدا وقىعان كەزى بولدى. ەندى ءۇيدىڭ جانىنان جايلى مەكتەپ اشىلعانىنا بالالارىمىزبەن بىرگە قۋاندىق. ءىشى كەڭ, جارىق, بارلىق جاعداي جاسالعان ەكەن», دەيدى اتا-انانىڭ ءبىرى اينۇر ورازوۆا.
تاعى ءبىر اتا-انا زارينا شاعىراەۆانىڭ دا ەكى بالاسى وسى كەزگە دەيىن كورشىلەس شاعىن اۋدانداعى ءبىلىم ورداسىندا وقىپ كەلگەن. بۇل ولاردىڭ الاڭسىز ءبىلىم الۋىنا كەدەرگى بولعان.
«مەكتەپتىڭ تىم الىس بولماعانى ءجون. ويتكەنى ءار اتا-انا بالاسىنىڭ قاۋىپسىزدىگى ءۇشىن مەكتەپتەن ۇيىنە كەلگەنگە دەيىن الاڭداپ وتىرادى. ەكى بالام ۇيگە ورالعانشا كوڭىلىم بايىز تاپپايتىن ەدى. ەندى ءۇي جانىنداعى جايلى مەكتەپتە ءبىلىم الاتىن بولدى», دەيدى ز.شاعىراەۆا.
وقۋشىلاردىڭ عانا ەمەس, اتا-انالاردىڭ دا كوڭىلىنە قۋانىش ۇيالاتقان مەكتەپتىڭ قانداي كەرەمەتى بار؟ ديرەكتوردىڭ دەرەگىنە قاراعاندا, ءبىلىم ورداسى ءتورت گەكتار جەر تەلىمىندە ورنالاسقان. نىساننىڭ اۋماعى – 10 860 شارشى مەتر.
ەكىنشىدەن, مەكتەپتەگى ءتۇرلى كابينەتتىڭ سانى 40-قا جۋىقتايدى. وزگە ءبىلىم وردالارىنان وزگەشەلىگى – ينكليۋزيۆتى بىلىمگە ارنالعان كابينەتتىڭ جابدىقتالۋى. مۇندا ءبىلىم الۋعا كەلەتىن مۇمكىندىگى شەكتەۋلى وقۋشىلار جوعارعى قاباتقا ارنايى ليفتىمەن كوتەرىلەدى. بۇعان قوسا وسى زامانعى زەرتحانالار, شىعارماشىلىق شەبەرحانالار مەن
3 سپورت زالى بار. وقۋشىلاردىڭ وي-ءورىسىن دامىتاتىن روبوتتەحنيكاعا ارنايى كابينەت ءبولىنىپتى.
ۇشىنشىدەن, وقۋشىلار 206 ورىندىق اسحانادا الاڭسىز تاماقتانادى. اسحاناداعى تاماق ءمازىرى قاتاڭ باقىلاۋعا الىنىپ وتىر. مۇندا گازدالعان سۋسىندار مەن تاتتىلەر ساتىلمايدى. ونىڭ ورنىنا وقۋشىلارعا جاس ەرەكشەلىكتەرىنە ساي قۇنارلى تاعامدار ۇسىنىلادى.
تورتىنشىدەن, مەكتەپ اۋلاسىندا بالالار ءۇشىن ويىن الاڭى اشىلىپتى. ال فۋتبول وينايتىن الاڭدا جاساندى كوگال, ۆولەيبول, باسكەتبول مەن تەننيس الاڭدارىنا تارتان جابىنى توسەلىپتى. بۇل وقۋشىلاردىڭ جاراقات الماۋىنا سەپتىگىن تيگىزەدى.
اتىراۋ وبلىسى
