رەداكتسيا القاسى جالپى داۋىس بەرۋ ارقىلى باسپاعا دايىنداۋ ءۇشىن باسىلىمنىڭ ءۇشىنشى تومىنىڭ قولجازباسىن بەكىتۋ تۋرالى شەشىم قابىلدادى.
وسى جۇمىستى قورىتىندىلاعان مەملەكەتتىك كەڭەسشى وتاندىق تاريح عىلىمىنداعى التىن وردا تاقىرىبىنىڭ ماڭىزىنا توقتالدى.
«مەملەكەت باسشىسىنىڭ باستاماسىمەن 2022 جىلى جوشى ۇلىسىن زەرتتەۋ عىلىمي ينستيتۋتى قۇرىلدى. كەلەر جىلى ەلىمىزدە التىن وردا مۇراسىن زەردەلەۋگە ارنالعان حالىقارالىق كونفەرەنتسيا وتكىزۋ جوسپارلانىپ وتىر. قازاقستان تاريحىنىڭ التىن وردا داۋىرىنە ارنالعان جەكە اكادەميالىق تومىن بەكىتتىك. تۇپتەپ كەلگەندە, وسىنىڭ ءبارى قازاقستاندا التىن وردانى زەردەلەۋ جونىندە ارنايى عىلىمي-تاريحي مەكتەپ قالىپتاسىپ جاتقانىن ايعاقتايدى», دەدى ە.قارين.
سونداي-اق جيىندا جەتى تومدىق ەڭبەكتىڭ ءتورتىنشى تومىنىڭ مازمۇنى تالقىلاندى.
اۆتورلار ۇجىمىنىڭ جەتەكشىسى, تاريح عىلىمدارىنىڭ دوكتورى, ر.ب.سۇلەيمەنوۆ اتىنداعى شىعىستانۋ ينستيتۋتى جانىنداعى تاريحي ماتەريالداردى زەرتتەۋ رەسپۋبليكالىق اقپاراتتىق ورتالىعىنىڭ ديرەكتورى, ۇلتتىق عىلىم اكادەمياسىنىڭ اكادەميگى مەرۋەرت ابۋسەيىتوۆا جانە تومنىڭ ۇيلەستىرۋشىسى, تاريح عىلىمدارىنىڭ دوكتورى, ش.ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس ديرەكتورى, ۇلتتىق عىلىم اكادەمياسىنىڭ اكادەميگى زيابەك قابىلدينوۆ باسىلىمنىڭ تۇجىرىمداماسى, مازمۇنى جانە قۇرىلىمى تۋرالى بايانداما جاساپ, «قازاق حاندىعى» دەپ اتالاتىن ءتورتىنشى تومنىڭ ەرەكشەلىكتەرى مەن جاڭالىعىن اتاپ ءوتتى.
سونىمەن قاتار پارلامەنت دەپۋتاتى, تاريح عىلىمدارىنىڭ دوكتورى, پروفەسسور ەركىن ءابىلدىڭ, تاريح عىلىمدارىنىڭ كانديداتى, ءال-فارابي اتىنداعى قازاق ۇلتتىق ۋنيۆەرسيتەتى تۇلەكتەرى قاۋىمداستىعىنىڭ اتقارۋشى ديرەكتورى كۇلگازيرا بالتاباەۆانىڭ, «قازاق تاريحي قوعامىنىڭ» باسقارما توراعاسى راديك تەمىرعاليەۆتىڭ رەتسەنزيالارى تىڭدالدى.
مامبەت قويگەلديەۆ, ايدوس سارىم, ورازاق سماعۇلوۆ, حانكەلدى ءابجانوۆ, ميحايل اكۋلوۆ, كەنجەحان ماتىجانوۆ, بۇركىتباي اياعان, گالينا كسەنجيك, جاقسىلىق ءسابيتوۆ, بەرەكەت كارىباەۆ, ديحان قامزابەك ۇلى, ءسابيت شىلدەباي, مۇرات ءابدىروۆ سەكىلدى رەداكتسيا القاسىنىڭ باسقا دا مۇشەلەرى ءوز وي-پىكىرلەرىن ورتاعا سالدى.
جيىن سوڭىندا رەداكتسيا القاسى ءتورتىنشى تومدى جەتىلدىرۋ جۇمىسىن جالعاستىرىپ, كەلەسى وتىرىستا قاراستىرۋ جونىندە شەشىم قابىلدادى.
