«ەلىماي-م» بيىلعى ماۋسىمدا ەكىنشى ليگانىڭ سولتۇستىك-شىعىس كونفەرەنتسياسىندا تابىستى ونەر كورسەتىپ, 37 ۇپايمەن ۇزدىك ۇشتىككە ەنگەن. وسىعان وراي, ايماق باسشىسى كوماندا ويىنشىلارى مەن جاتتىقتىرۋشىلارىن جەڭىستەرىمەن قۇتتىقتاپ, الداعى ويىندارىنا تابىس تىلەدى.
«بار بولعانى ەكى ماۋسىم قاتارىنان ەكىنشى ليگادا ويناپ, ۇزدىك ۇشتىككە ەنۋ – قاجىرلى ەڭبەكتىڭ, ناعىز تاباندىلىق پەن شىنايى كوماندالىق رۋحتىڭ ناتيجەسى. «ەلىماي-م» – تومەنگى ليگادا اباي وبلىسىنىڭ نامىسىن قورعاپ جۇرگەن ماقتانىشىمىز! كوماندانىڭ تولىعىمەن جەرگىلىكتى جاستاردان جاساقتالۋى جانە باپكەرلەر قۇرامىنىڭ ءوز ءوڭىرىمىزدىڭ ماماندارىنان قۇرالۋى بۇل سەمەي فۋتبول مەكتەبىنىڭ الەۋەتىنىڭ زور ەكەنىن كورسەتەدى. «قازاق فۋتبولىنىڭ وتانى – سەمەي» دەگەن اتقا لايىقتى ەكەنىمىزدى دالەلدەپ وتىر. سىزدەردىڭ ارقايسىڭىزدى ەرتەڭگى ۇلكەن فۋتبولدىڭ ءۇمىتى, نەگىزگى قۇرامنىڭ سەنىمدى ويىنشىسى, بولاشاق جەڭىستەردىڭ باستاۋى دەپ ەسەپتەيمىن. جەرگىلىكتى جاستاردىڭ وسىلاي ءوسىپ, كاسىبي دەڭگەيگە كوتەرىلۋى – ءبىزدىڭ وڭىردەگى جۇيەلى جۇمىستىڭ, سپورتتى قولداۋدىڭ, باپكەرلەر ەڭبەگىنىڭ ناتيجەسى», دەدى وبلىس اكىمى.
كەزدەسۋ بارىسىندا ايماق باسشىسى جانكۇيەرلەر قوزعالىسىنىڭ ارداگەرى ساياسات سارسەمبينوۆ, «ەلىماي» فك اق ديرەكتورلار كەڭەسىنىڭ مۇشەلەرى اسقار ۇرانحاەۆ, سەرىك بايعاليەۆ پەن ايرات بازەنوۆتى جانە باپكەرلىك قۇرام مەن فۋتبولشىلاردى ماراپاتتادى.
«جانكۇيەرلەر اتىنان جەرگىلىكتى اكىمدىككە ۇلكەن العىسىمدى بىلدىرەمىن. بۇگىنگى كۇنى ءبىزدىڭ جاس فۋتبولشىلارىمىز جوعارى دەڭگەيگە جەتىپ, وزدەرىنىڭ شەبەرلىگىن كورسەتىپ وتىر. «ەلىماي» كلۋبىنىڭ جەتىستىگى ارقىلى سەمەي قالاسى تاعى دا قازاق فۋتبولىنىڭ التىن بەسىگى, وتانى ەكەنىن دالەلدەپ وتىر», دەدى جانكۇيەرلەر قوزعالىسىنىڭ ارداگەرى ساياسات سارسەمبينوۆ.
ايماق باسشىسى «سپارتاك» ستاديونىنا بارىپ, «ەلىماي» فۋتبول كومانداسىنىڭ ويىنشىلارىمەن, باپكەرلىك قۇراممەن كەزدەستى.
«سەمەي – قازاق فۋتبولىنىڭ وتانى. ءدال وسى جەردە 1913 جىلى قازاقستانداعى العاشقى فۋتبول ماتچى وتكەن ەدى. ايگىلى جازۋشى مۇحتار اۋەزوۆ كوماندا قۇرامىندا وينادى. «ەلىماي» فۋتبول كلۋبى تاريحي ءداستۇردى لايىقتى جالعاستىرىپ كەلەدى. الدا ماڭىزدى ەكى ويىن تۇر. جانكۇيەرلەر تەك جەڭىس كۇتەدى. ءبىز سىزدەردى ەل چەمپيوناتىندا عانا ەمەس, الداعى ۋاقىتتا ەۋروكۋبوك ارەنالارىندا قازاقستاننىڭ نامىسىن قورعايتىن كوماندالاردىڭ قاتارىنان كورگىمىز كەلەدى. مەملەكەت باسشىسى قاسىم-جومارت توقاەۆ بيىلعى جولداۋىندا فۋتبول كلۋبتارىنىڭ كوممەرتسيالانۋى جايلى اتاپ وتكەن بولاتىن. ءبىزدىڭ «ەلىماي» فۋتبول كلۋبى پرەزيدەنتىمىزدىڭ باستاماسىن قولداپ, قازىر جاڭا جۇيەگە ءوتۋدىڭ نەگىزىن قالاپ جاتىر. ياعني, ناعىز حالىقتىق كومانداعا اينالۋدى تاڭداپ, سول باعىتتا جۇمىس ىستەۋدە. الداعى ۋاقىتتا كلۋب اكتسيالارى بيرجاعا شىعارىلادى. بۇل قازاقستان ءۇشىن زاماناۋي, نوۆاتورلىق, جاڭا جول دەپ ايتۋعا بولادى. جانكۇيەرلەر مەن ينۆەستورلار كلۋب تاريحىنىڭ ءبىر بولىگىنە اينالىپ, وزدەرىنىڭ ۇلەسىن قوسىپ, دامۋىنا اسەر ەتۋگە مۇمكىندىك الاتىنىنا كۇمانىمىز جوق. سول ارقىلى ءبىز كلۋبتى باسقارۋدىڭ ناعىز جاڭاشىل ۇلگىسىن ەلىمىز بويىنشا ءبىرىنشى باستاعالى وتىرمىز», دەدى وبلىس اكىمى.
2022 جىلى قايتا قۇرىلعان «ەلىماي» قىسقا ۋاقىت ىشىندە ەل فۋتبولىنىڭ باستى كلۋبتارىنىڭ بىرىنە اينالدى. 2023 جىلعى ماۋسىمدا كوماندا ءبىرىنشى ليگادا چەمپيون اتانىپ, 2024 جىلى قازاقستان پرەمەر-ليگاسىنا قايتا ورالدى. بۇگىندە سەمەيلىك كلۋب ەل چەمپيوناتىنىڭ 24 تۋرىنان كەيىن 42 ۇپاي جيناپ, تۋرنيرلىك كەستەدە 5-ءىنشى ورىندا كەلەدى. الدا ماۋسىمنىڭ سوڭعى ەكى تۋرىندا ەلىمايلىقتار «تۇران» جانە «اتىراۋ» كوماندالارىمەن كەزدەسەدى.
اباي وبلىسى
