باستى ماقسات – تسيفرلىق ينجەنەريا, جاساندى ينتەللەكت جانە روبوتتەحنيكا سالالارىندا جاڭا بۋىن ماماندارىن دايارلاۋ. «تسيفرلىق تەحنولوگيالار جانە روبوتتەحنيكا» حالىقارالىق ينستيتۋتىنىڭ جۇمىسىمەن تانىستىرعان ديرەكتوردىڭ ورىنباسارى دامير جاڭابەرگەننىڭ ايتۋىنشا, مۇندا ستۋدەنتتەر تەك تەوريانى عانا قويماي, زاماناۋي وندىرىستىك ۇردىستەردى تاجىريبە جۇزىندە مەڭگەرەدى. تسيفرلىق جانە زياتكەرلىك شەبەرحانادا 8 زاماناۋي روبوت جانە 5 وقۋ كەشەنى بار. ماڭىزدىسى, تسيفرلىق زاۋىت. مۇندا تسيفرلىق جوبالاۋ, مەحانيكا مەن ەلەكترتەحنيكانىڭ نەگىزدەرى وقىتىلىپ, ۆيرتۋالدى سىناق جۇرگىزۋدى بىرىكتىرەتىن وقۋ جۇيەسى جابدىقتالعان.
«ستۋدەنتتەر قاۋىپسىز تسيفرلىق كەڭىستىكتە ءوندىرىستى ىسكە قوسىپ, وزدەرى باسقارا الادى. زاۋىتتاعىداي تاجىريبە جيناقتاۋ مۇمكىندىگىنە يە. قازىرگى تاڭدا ەلىمىزدەگى زاۋىتتار مەن ونەركاسىپ ورىندارى ءوندىرىستى اۆتوماتتاندىرۋدى قارقىندى قولعا الدى. دەگەنمەن تاجىريبەسى مول, بىلىكتى ماماندار تاپشى. وسى سەبەپتەن كوپتەگەن ءوندىرىس ورىندارى ماماندارىن دايارلاۋ ءۇشىن شەتەلگە تاعىلىمداماعا جىبەرۋگە ءماجبۇر. ياعني جوعارى دەڭگەيلى كاسىبي مامان تابۋ ايتارلىقتاي قيىن. ءبىزدىڭ نەگىزگى ماقساتىمىزدىڭ ءبىرى – وسى ماسەلەنى شەشۋ», دەيدى ول.
شەبەرحانادا ستۋدەنتتەر بولاشاق ماماندىقتارىنا قاجەتتى داعدىلاردى جيناقتايدى. مۇندا جاساندى ينتەللەكت سالاسىنا ايرىقشا كوڭىل ءبولىنىپ وتىر. شەبەرحانادا قولدانىلىپ جاتقان روبوتتار مەن وقۋ كەشەندەرى جاساندى ينتەللەكتپەن قامتىلعان. كەلەسى ماڭىزدى وقۋ كەشەنى – جاساندى ينتەللەكت پەن تەرەڭدەتىپ وقىتۋعا نەگىزدەلگەن ماشينالىق كورۋ جۇيەسى. ارنايى كامەرالار, لينزالار جانە جارىقتاندىرۋدىڭ كومەگىمەن ستۋدەنتتەر روبوتتاردىڭ اينالانى قالاي باقىلايتىندىعىن, زاتتاردى انىقتاۋ, اقاۋلاردى ولشەۋ جانە باقىلاۋ داعدىلارىن مەڭگەرەدى. سونىمەن قاتار بۇل جۇيە ونەركاسىپتەگى ساپانى باقىلاۋ ۇدەرىستەرىن تۇسىنۋگە مۇمكىندىك بەرەدى.
كۇندەلىكتى تاجىريبەدە اقتوس جانە قۇتجول دەپ اتالىپ كەتكەن زاماناۋي ءتورت اياقتى روبوت-يتتەر – «Unitree Go2 Pro» – بولاشاقتىڭ روبوتى. «بۇل روبوت جاي عانا قوزعالىپ جۇرەتىن قۇرىلعى ەمەس, ول – جاساندى ينتەللەكتىگە نەگىزدەلگەن ناعىز ينتەللەكتۋالدى جۇيە. ونىڭ بويىندا قۋاتتى پروتسەسسور, ءتۇرلى سەنسورلار, «4D LiDAR» جۇيەسى مەن كەڭ بۇرىشتى كامەرالار بار. وسىلاردىڭ ارقاسىندا روبوت اينالاسىن تولىق كورىپ, كەدەرگىلەردى انىقتاپ, ءوز جولىن تابا الادى. «Unitree Go2 Pro»-نىڭ باستى ارتىقشىلىعى – «SLAM» تەحنولوگياسى. بۇل ءبىر مەزەتتە كارتانى جاساپ, ءوز ورنىن انىقتاي الاتىن جۇيە. ياعني روبوت بەيتانىس بولمەگە كىرگەن كەزدە, سول ورتانى سكانەرلەپ, كارتاسىن جاساپ, كارتا بويىنشا ەركىن قوزعالا الادى. شامامەن 15 كيلو سالماقتاعى روبوتتىڭ سيپاتتاماسى دا ەرەكشە. سەكۋندىنا 3,5 مەترگە دەيىن جۇگىرىپ, 8 كگ دەيىنگى جۇكتى كوتەرە الادى. ءتىپتى 40 گرادۋسقا دەيىنگى ەڭىس بەتكەيمەن دە قوزعالا الادى. روبوت ستۋدەنتتەرگە وتە قۇندى قۇرال. ستۋدەنتتەر مۇندا روبوتتى باسقارىپ, قوزعالىسىن جوسپارلاپ, كود جازىپ, «SLAM» جۇيەسىن قولدانىپ,, سەنسورلارمەن جۇمىس ىستەۋدى ۇيرەنەدى. تاجىريبەدە جاساندى ينتەللەكت پەن ماشينالىق كورۋدىڭ قالاي جۇمىس ىستەيتىنىن تۇسىنەدى. قولدانۋ سالالارى وتە كەڭ. ءبىلىم بەرۋدە, عىلىمي زەرتتەۋلەردە, ونەركاسىپتەگى مونيتورينگ پەن ينسپەكتسيادا, لوگيستيكادا, ءتىپتى قىزمەت كورسەتۋ سالاسىندا دا پايدالانۋعا بولادى.
الماتى
