فۋتبول. قازاقستان مەن مولدوۆا تەڭ وينادى

استانا. 19 اقپان. كەشە تۇندە تۇركيانىڭ انتاليا قالاسىنداعى «ماردان» ستاديونىندا قازاقستان جانە مولدوۆا قۇراما كوماندالارى جولداستىق كەزدەسۋ وتكىزدى. ماتچ 1:1 ەسەبىمەن تەڭ اياقتالدى. بۇل تۋرالى Vesti.kz ءتىلشىسى حابارلادى. كەزدەسۋدىڭ ءبىرىنشى تايمىندا ەكى جاق ءبىر-بىرلەرى قاقپالارىنىڭ قۇلپىن اشا المادى. ويىننىڭ باسىندا قازاقستاندىقتار ۇرعان ايىپ دوبى قارسىلاستار تورىنا كىرىپ كەتە جازدادى. ال ەكىنشى تايمنىڭ باسىندا, 47-مينۋتتا قازاقستاندىقتارعا ءبىرىنشى بولىپ ەسەپ اشۋدىڭ ورايى كەلدى. دوپتى الاڭعا سول كەزدە شىققان باۋىرجان يسلامحاننان پاس العان الەكسەي ششەتكين ءتۇسىردى. الايدا, جەرلەستەرىمىزدىڭ بۇل باسىمدىلىعى ۇزاققا بارا قويمادى. مولدوۆاندار 55-مينۋتتا تارازى باسىن تەڭەستىرىپ كەتتى. ونى قاقپا الاڭىنا اۋەلەي جەتكەن دوپتى شالقالاي بەرىپ, ارتقا قاراي كەلىستىرىپ ۇرعان الەكساندر گاتسكان سالدى. ايتا كەتۋىمىز كەرەك, باس جاتتىقتىرۋشى يۋري كراسنوجان بۇل جولى الاڭعا ەكسپەريمەنتتى قۇرامدى شىعاردى. سونىڭ قاتارىندا «استانا» ساپىندا وينايتىن نەناد ەريچ ءبىرىنشى رەت قاقپا قورعادى. قازاقستان ازاماتتىعىن العان بۇل فۋتبولشى وسىلاي ءوزىنىڭ العاشقى سىناعىن وتكىزدى. ەندى ءبىزدىڭ قۇراما كەلەسى ويىنىن 28 ناۋرىز كۇنى وتكىزبەكشى. وندا قازاقستان قۇراماسى ەۋروپا بىرىنشىلىگى ىرىكتەۋ ءتۋرنيرى شەڭبەرىندە يسلانديانى قابىلدايدى. سودان كەيىن, 31 ناۋرىزدا رەسەي قۇراماسىمەن جولداستىق كەزدەسۋ وتكىزەدى. ماتچتىڭ وينالاتىن جەرى ءالى بەلگىلەنگەن جوق. ونىڭ ماسكەۋ قالاسىندا وينالۋى دا مۇمكىن. دامير قوجامقۇل. دەرەك, فوتو: Vesti.kz.