بۇگىندە وبلىستا 296 مادەني ء(تىل جانە ارحيۆ) مەكەمەسى جۇمىس ىستەيدى. وندا 2 194 قىزمەتكەر ەڭبەك ەتسە, ولاردىڭ 1 358-ءى اۋىلدىق جەرلەردە, ال 836-سى قالالارداعى مادەني ۇيىمداردا قىزمەت اتقارادى.
– بيىل 9 ايدا وبلىس كولەمىندە ۇلتتىق ونەر مەن رۋحانياتتى دارىپتەيتىن بىرقاتار ماڭىزدى مادەني ءىس-شارالار وتكىزىلدى. اتاپ ايتقاندا, قازاقستاننىڭ ەڭبەك سىڭىرگەن مادەنيەت قايراتكەرى اداي ازاماتوۆتىڭ 70 جىلدىق شىعارماشىلىق كەشى, اقىن تولەگەن جانعاليەۆتىڭ 75 جىلدىق مەرەيتويى, كومپوزيتور ولەگ جانياروۆتىڭ 80 جىلدىعىنا ارنالعان كونتسەرت جانە مادەنيەت ەشەكەەۆ اتىنداعى ءداستۇرلى انشىلەردىڭ رەسپۋبليكالىق بايقاۋى ۇيىمداستىرىلدى, – دەدى ابزال ساپاربەك ۇلى.
سونىمەن قاتار, «اباي ەلى – ونەر كەنىشى» اتتى وبلىستىق كوركەمونەرپازدار بايقاۋىنا 10 اۋداننان 1 500-گە جۋىق ونەرپاز قاتىسىپ, ۇزدىكتەر ماراپاتتالدى. باس جۇلدە اباي اۋدانىنا تابىستالىپ, بارلىق قاتىسۋشىلارعا 1 ميلليون تەڭگە مولشەرىندە قارجىلاي سىياقى بەرىلدى.
– اباي قۇنانباي ۇلىنىڭ 180 جىلدىق مەرەيتويى اياسىندا وبلىس بويىنشا 100-گە جۋىق مادەني, عىلىمي جانە سپورتتىق ءىس-شارا وتكىزىلدى. 10 تامىزدا قاراۋىلتوبەدە وتكەن باستى مەرەكەلىك جيىندى 50 مىڭعا جۋىق كورەرمەن تاماشالادى. سونداي-اق تەاتر جانە مۋزىكا سالاسى دا قارقىندى دامۋدا. ماسەلەن, اباي اتىنداعى تەاتر 9 ايدا 157 سپەكتاكل قويىپ, 39 مىڭنان استام كورەرمەندى قامتىدى. تەاتردىڭ ەكى ترۋپپاسى حالىقارالىق فەستيۆالدەردە گران-پري يەلەندى. امىرە قاشاۋباەۆ اتىنداعى مەملەكەتتىك فيلارمونيا 85 كونتسەرت وتكىزىپ, 24 مىڭعا جۋىق كورەرمەنگە رۋحاني سىي تارتتى, – دەيدى باسقارما باسشىسى.
اباي وبلىسى
