فوتو: istockphoto.com
بيىل قىتايدا شەتەلگە باعىتتالعان الىس قاشىقتىقتاعى توپتىق تۋرلارعا سۇرانىس ايتارلىقتاي ارتقان. وتكەن جىلمەن سالىستىرعاندا ولاردىڭ سانى ەكى ەسەگە جۋىق كوبەيگەن. دەمالىس كۇندەرى قحر تۋريستەرى تاراپىنان ورتالىق ازيا, تاياۋ شىعىس جانە افريكا ەلدەرىندەگى حالىقارالىق قوناق ۇيلەردى برونداۋ ەداۋىر ۇلعايدى. سۇرانىسى شاپشاڭ وسكەن بەس ەل قاتارىندا ساۋد ارابياسى, مىسىر, جاڭا زەلانديا, قازاقستان جانە بىرىككەن اراب امىرلىكتەرى بار.
«قازاقستان مەن قىتاي اراسىنداعى تۋريستىك الماسۋ تۇراقتى ءوسىپ كەلەدى. بيىلعى 9 ايدا قىتايدان كەلگەن تۋريستەر سانى 675 مىڭنان استى. وتكەن جىلى بۇل كورسەتكىش 12 ايدا 655 مىڭ بولعان ەدى. بۇل ەلىمىزگە دەگەن جوعارى قىزىعۋشىلىقتى جانە قازاقستاندى قىتاي نارىعىندا ىلگەرىلەتۋ, ۆيزالىق راسىمدەردى جەڭىلدەتۋ مەن تىكەلەي اۋە قاتىناسىن كەڭەيتۋ باعىتىندا اتقارىلىپ جاتقان جۇيەلى جۇمىستىڭ ناتيجەلى ەكەنىن كورسەتەدى», دەدى «Kazakh Tourism» اق باسقارما توراعاسىنىڭ م.ا. دانيەل سەرجان ۇلى.
سونداي-اق ۇلتتىق كومپانيانىڭ مالىمەتىنە سايكەس, قىتايدىڭ ەڭ ءىرى ىزدەۋ جۇيەسى Baidu-داعى دەرەكتەر بويىنشا, 2025 جىلعى قىركۇيەك ايىندا قازاقستان تۋرالى تاۋلىگىنە ورتا ەسەپپەن 420–430 مىڭ ىزدەۋ سۇرانىسى تىركەلگەن. ەڭ بەلسەندى ىزدەۋ جۇرگىزگەن وڭىرلەرگە گۋاندۋن مەن چجەتسزيان پروۆينتسيالارى, بەيجىڭ قالاسى, سونداي-اق شىڭجاڭ ۇيعىر اۆتونوميالىق اۋدانى مەن شاندۋن پروۆينتسياسى جاتادى. بۇل قازاقستانعا دەگەن قىزىعۋشىلىق تەك شەكارا ماڭىنداعى ايماقتارمەن شەكتەلمەي, قىتايدىڭ ەكونوميكالىق تۇرعىدان دامىعان وڭىرلەرىن دە قامتىپ وتىرعانىن ايعاقتايدى.
