بۇگىندە ترانسپلانتتاۋدى جانە جوعارى تەحنولوگيالىق مەديتسينالىق قىزمەتتى ۇيلەستىرۋ جونىندەگى رەسپۋبليكالىق ورتالىقتا 40-تان استام دونورلىق ستاتسيونار, 7 ترانسپلانتتاۋ ورتالىعى, 5 زەرتحانا جانە مەديتسينالىق اۆياتسيا بار. دونورلىق جايىندا ايتار بولساق, 18 جاستان اسقان پاتسيەنت دەنساۋلىعى سىر بەرىپ, اۋرۋ اسقىنىپ, مي ءولىمى انىقتالسا دونور بولا الادى. اعزا الۋعا ماجبۇرلەنگەن, ەس-قابىلەتى دۇرىس بولماعان, پسيحيكالىق اۋرۋلارى بار, قاتەرلى ىسىككە جانە ينفەكتسيالىق اۋرۋلارعا شالدىققان ازاماتتار دونور بولا المايدى.
ترانسپلانتتاۋدى جانە جوعارى تەحنولوگيالىق مەديتسينالىق قىزمەتتى ۇيلەستىرۋ جونىندەگى رەسپۋبليكالىق ورتالىق ديرەكتورىنىڭ مىندەتىن اتقارۋشى نازگۇل جانگەلدينانىڭ ايتۋىنشا, قازىر دونورلىق بويىنشا كۇتۋ پاراعىندا 4 384 ادام تۇر.
«كۇتۋ پاراعىندا تۇرعانداردىڭ 121-ءى – بالا. جالپى, 2020 جىلدان بەرى ەلدە 1209 ترانسپلانتاتسيا جاسالدى. وكىنىشكە قاراي, ولاردىڭ 80% تۋىستىق دونور بولسا, نەبارى 15% – مايىتتىك دونورلار. 2020 جىلدان بەرى مايىتتىك دونور بولامىن دەۋشىلەر سانى ازايدى. 2024 جىلى 86 ىقتيمال دونور بولدى. ولاردىڭ 10-ى عانا كەلىسىمىن بەردى. تورتەۋىنىڭ قارسى مەديتسينالىق كورسەتكىشتەرى بولعاندىقتان, تەك 6 ادامنىڭ عانا اعزالارىن قولدانۋ مۇمكىن بولدى. ناتيجەسىندە 23 ترانسپلانتتاۋ وپەراتسياسى جاسالدى. ال, كەيىنگى 10 ايدا 131 ىقتيمال دونور انىقتالىپ, 10-ى وزەكتى بولدى. سونىڭ ارقاسىندا 42 وپەراتسيا جاسالدى», دەدى سپيكەر.
ەسكەرەتىن جايت, eGov پورتالى ارقىلى ءار وتانداسىمىز دونور بولۋعا قاتىستى ءوز ەركىن بىلدىرە الادى. قازىر وسىعان 134 مىڭ ادام تىركەلگەن. ولاردىڭ 10 مىڭنان استامى دونور بولۋعا كەلىسسە, 122 مىڭى باس تارتقان.
