سۋرەتتى تۇسىرگەن – ەرلان ومار, «EQ»
وڭتۇستىك ءوڭىرىنىڭ شالعايداعى سوزاق وڭىرىندە كەزىندە اۋدان باسشىلارىنىڭ تاباندىلىعى مەن ەرىك-جىگەرىنىڭ ارقاسىندا كىتاپحانالار جەكەشەلەندىرۋ ناۋقانىنان امان قالعان. سونىڭ يگىلىگىن بۇگىندە جۇرتشىلىق كورىپ وتىر. كىتاپحاناعا بارعانىمىزدا وندا توپ-توپ بولىپ جۇرگەن وقۋشى جاستاردى كورگەندە ءسۇيسىنىپ-اق قالامىز. اڭگىمەلەسە كەلە بىلگەنىمىز – ۇستازدارى ادەبي كىتاپتار وقىپ, ءارتۇرلى تاقىرىپتاردا ەسسەلەر جازۋعا ماشىقتاندىراتىن كورىنەدى. كىتاپحاناداعى كىتاپ قورى وتە باي. سورەلەردە الەم, شەتەل ادەبيەتىنەن باستاپ, قازاق قالامگەرلەرىنىڭ دە تۋىندىلارى سامساپ تۇر.
كىتاپحانادان كەزىندە كەزدەسۋگە كەلگەن اقىن-جازۋشىلاردىڭ قولتاڭبالارى مەن پىكىرلەرىن وقي الاسىز. ءابىش كەكىلباي, شەرحان مۇرتازا, ساتىبالدى نارىمبەتوۆ, ساۋىتبەك ابدراحمانوۆ, ت.ب. قالامگەرلەر كىتاپحانا تۋرالى پىكىرلەرى شالعاي اۋدان جۇرتشىلىعىنىڭ مادەني دەڭگەيىنىڭ قانشالىقتى ەكەنىن اڭعارتاتىنداي.
تەرەڭ ويلاپ قاراعان ادامعا, كىتاپ – اينىماس دوس, جالىقتىرمايتىن سەرىك, اقى سۇرامايتىن كەڭەسشى. جىگەرىڭدى قايراپ, ءتىلىڭدى بايىتادى, جان دۇنيەڭدى تەبىرەنتىپ, شەشەندىككە باۋليدى, ورەڭدى كەڭىتىپ, ساناڭدى دامىتادى. كىتاپ ارقىلى ادام باسقالاردى قۇرمەتتەۋدى ۇيرەنەدى.
حاكىم اباي: «ارتىق عىلىم كىتاپتا, ەرىنبە وقىپ, كورۋگە» دەسە, احمەت بايتۇرسىن ۇلى: «وقۋسىز حالىق قانشا باي بولسا دا ءبىراز جىلداردان كەيىن ونىڭ بايلىعى ونەرلى حالىقتاردىڭ قولىنا كوشەدى», دەپ كوشتەن قالماۋعا شاقىرعان.
«بار كىتاپ ءبىر كىتاپتى ءتۇسىنۋ ءۇشىن وقىلادى» دەگەندەي, كىتاپتاردىڭ ءبارى دە ارداقتى. ول ەڭ الدىمەن ءتىلدى ماشىقتاندىرادى, ءبىلىم دامىپ, تۇسىنىك كەڭەيەدى. ايتا بەرسەك, كىتاپتىڭ پايداسى شەكسىز.
كارىباي امزە ۇلى
تۇركىستان وبلىسى
