فورۋمدا اۋىلداعى جاستار ماسەلەسى قوزعالىپ, وسى تاقىرىپ توڭىرەگىندە قاتىسۋشىلار ءوز پىكىرلەرىن ورتاعا سالدى. ۇيىمداستىرۋشىلار ايتىپ وتكەندەي, ءىس-شارانىڭ باستى ماقساتى – پرەزيدەنت قاسىم-جومارت توقاەۆ ايقىنداعان مەملەكەتتىك دامۋ ىسىنە جاستاردى ۇگىتتەۋ, ولاردىڭ ەڭبەگى مەن يدەيالىق كۇش-قۋاتىن پايدالانۋ.
جيىندا ءماجىلىس دەپۋتاتى, اگرارلىق ماسەلەلەر كوميتەتىنىڭ جانە «اۋىل» پارتياسىنىڭ توراعاسى سەرىك ەگىزباەۆ ءسوز باستادى. پارتيا جەتەكشىسى جاستاردى ەلىمىزدىڭ بولاشاعى ءۇشىن اسا ماڭىزدى باعىتتاردىڭ ءبىرى جاساندى ينتەللەكت پەن تسيفرلاندىرۋعا بەلسەنە اتسالىسۋعا شاقىردى.
– پرەزيدەنت قاسىم-جومارت توقاەۆ بيىلعى جولداۋىندا جاساندى ينتەللەكت پەن تسيفرلاندىرۋدىڭ ماڭىزى جونىندە ەرەكشە اتاپ ءوتتى. سوعان بايلانىستى ۇكىمەتكە ەكونوميكانىڭ بارلىق سالاسىنا جاساندى ينتەللەكتىنى ەنگىزۋ تۋرالى ناقتى تاپسىرمالار بەردى. بۇل – ەلىمىزدىڭ الداعى ءۇش جىل ىشىندە تسيفرلىق دەرجاۆاعا اينالۋعا جول اشاتىن ماڭىزدى قادام. مەملەكەت باسشىسى ءبىر سوزىندە: «قازاقستاننىڭ بولاشاعى – جاستاردىڭ قولىندا. بۇگىنگى تاڭدا جۇزەگە اسىپ جاتقان بارلىق رەفورما, ەڭ الدىمەن, جاستار ءۇشىن جاسالۋدا. ەرتەڭگى كۇنى وسى يگىلىكتى پايدالانىپ, ەلدى العا جەتەلەيتىن دە – سىزدەر. مەن ءۇشىن جاستار – ناعىز شابىت كوزى», دەگەن بولاتىن. سوندىقتان «اۋىل» پارتياسى ءوز قىزمەتىندە اۋىل مەن قالا جاستارىنىڭ ءوسىپ-وركەندەۋىنە ەرەكشە نازار اۋدارادى, – دەدى س.ەگىزباەۆ.
پارتيا توراعاسىنىڭ ايتۋىنشا, جاستاردىڭ شىعارماشىلىق الەۋەتىن ارتتىرۋ, كرەاتيۆتى يدەيالارى مەن يننوۆاتسيالىق باستامالارىن قولداۋ ماقساتىندا ساياسي ۇيىم اۋقىمدى جۇمىستاردى اتقارىپ جاتىر. اتاپ ايتقاندا, پارتيانىڭ 25 جىلدىعىنا ارنالعان «گۇلدەنسە اۋىل – گۇلدەنەدى ەلىمىز» اتتى دەبات ءوتتى. ءتۋرنيردىڭ ىرىكتەۋ كەزەڭىنە 17 ايماقتان مەكتەپ وقۋشىلارى مەن ستۋدەنتتەر, جالپى سانى 1 200 جاس قاتىستى. سونداي-اق «كىتاپ – رۋحانيات وزەگى» رەسپۋبليكالىق اكتسياسى اياسىندا اۋىلدىق كىتاپحانالارعا 30 مىڭعا جۋىق جاڭا كىتاپتار تارتۋ ەتىلدى. بۇل باستاما اۋىل جاستارىنىڭ ءبىلىمىن كوتەرۋگە, مادەنيەتىن جوعارىلاتۋعا باعىتتالدى.
بۇدان بولەك, ستۋدەنتتەر اراسىندا «يننوۆاتسيالار. تۇراقتىلىق. بولاشاق» اتتى حاكاتون ۇيىمداستىرىلىپ, 21 وقۋ ورنىنان 175 جاس ءوز جوبالارىن ۇسىندى. سونداي-اق پارتيادا كرەاتيۆ جانە جاستارمەن جۇمىس دەپارتامەنتى بەلسەندى جۇمىس اتقارادى. دەپارتامەنت جاستاردىڭ باستامالارى مەن شىعارماشىلىق يدەيالارىن قولداۋعا, ولاردى شىنايى ىسكە اسىرۋعا قىزمەت ەتەدى. وسى ورايدا س.ەگىزباەۆ جاستاردا قانداي دا ءبىر ۇزدىك, مىقتى يدەيالار مەن ۇسىنىستار بولسا, پارتيا ولاردى بىرگە جۇزەگە اسىرۋعا ارقاشان دايىن ەكەنىن جەتكىزدى. سول ءۇشىن «اۋىلدىقتار» باستاماشىلدىق تانىتىپ, ەلدىڭ تسيفرلىق بولاشاعىنا ۇلەس قوساتىن جاستاردىڭ تابىستى جوبالارىنا قاشان دا قولداۋ كورسەتەدى دەدى.
فورۋمدا ءماجىلىس دەپۋتاتى ەربولات ساۋرىقوۆ, «اۋىل» پارتياسىنىڭ تۇركىستان وبلىستىق فيليالىنىڭ توراعاسى تورەگەلدى قالمۇراتوۆ, تولە بي اۋدانىنىڭ اكىمى ەركەعالي الىمقۇلوۆ جانە باسقا دا بىرقاتار قوناق ءسوز سويلەپ, جاستارعا وزدەرىنىڭ تىلەكتەرىن ارنادى.
رەسپۋبليكالىق «Auyl jastary» فورۋمىنىڭ سوڭىندا بارلىق قاتىسۋشى جاستار ءبىراۋىزدان ۇندەۋ قابىلدادى.
ء«بىز, «اۋىل جاستارى» اتتى رەسپۋبليكالىق جاستار فورۋمىنىڭ قاتىسۋشىلارى قۇرداستارىمىزدى, ونىڭ ىشىندە بىرلەستىكتەر مەن ەرىكتىلەر قاۋىمداستىعىنىڭ جاس مۇشەلەرىن ادىلەتتى قازاقستان قوعامىن قۇرۋعا باعىتتالعان پرەزيدەنت باستامالارىن قولداۋعا شاقىرامىز. ءبىز قوعامداعى «زاڭ مەن ءتارتىپتى», ەڭبەك ادامىنىڭ قادىرىن مويىندايمىز. ءبىز تەحنولوگيالىق ىلگەرىلەۋدىڭ, جاساندى ينتەللەكت پەن تسيفرلىق دامۋدىڭ جاڭا داۋىرىنە قادام باستىق. ءبىزدىڭ بۋىن ءوزىنىڭ ءبىلىم دەڭگەيىمەن ۋاقىتتىڭ جاڭا سىن-قاتەرلەرىنە توتەپ بەرۋگە ءتيىس. پرەزيدەنت جاس ۇرپاققا ۇنەمى ەرەكشە سەنىم ءبىلدىرىپ, مەملەكەتتىك دەڭگەيدە قابىلداناتىن بارلىق شەشىمدە ولاردىڭ ماسەلەسىن ەسكەرىپ وتىرادى. بۇل – ءبىز ءۇشىن زور مۇمكىندىك قانا ەمەس, ۇلكەن جاۋاپكەرشىلىك. بۇل ورايدا ءبىز مەملەكەت باسشىسىنىڭ باستامالارىن جۇزەگە اسىرۋ ءۇشىن بار كۇش-جىگەرىمىزدى, ءبىلىم مەن كاجىر-قايراتىمىزدى جۇمساۋعا دايىنبىز. ءبىز, «اۋىل» پارتياسىنىڭ جاستار قاناتى, ۇكىمەتتى, بارلىق مەملەكەتتىك جانە قوعامدىق ۇيىمداردى اۋىلدىڭ دامۋىنا, اۋىل تۇرعىندارىنىڭ ءومىر ءسۇرۋ ساپاسى مەن ەڭبەك جاعدايلارىن جاقسارتۋعا ەرەكشە نازار اۋدارۋعا شاقىرامىز!» دەلىنگەن ۇندەۋدە.
جالپى, پارتيا وكىلدەرى «ديپلوممەن – اۋىلعا!», «كەڭ دالا», «اگرو بيزنەس», «ىسكەر», «اۋىل اماناتى» سياقتى ءتۇرلى مەملەكەتتىك باعدارلامالاردى ءتيىمدى جۇزەگە اسىرۋ ارقىلى اۋىلدى كوركەيتۋگە, قازاقستاندى ەكونوميكاسى دامىعان, الەۋمەتتىك جاعدايى جاقسى ەلدەردىڭ قاتارىنا قوسۋعا بولاتىنىن جەتكىزدى. ال بۇل جولدا جاستاردىڭ بەلسەندىلىگى قاجەت-اق. اۋقىمدى فورۋمنىڭ ۇيىمداستىرىلۋ ماقساتىنىڭ ءبىرى وسى يدەياعا جاستاردى ۇيىستىرۋ ەكەنى ايان.
تۇركىستان وبلىسى
