جوبانىڭ ماقساتى – ءبىرتۇتاس شىعارماشىلىق ورتا قۇرۋ, تاريحى تەرەڭگە جايىلعان ونەر, ەجەلگى سالت-ءداستۇر ارقىلى تۇركى حالىقتارىنىڭ بىرلىگى مەن رۋحانياتىن ۇلىقتاۋعا باعىتتالعان تۇركى مادەنيەتىن دارىپتەۋ. فەستيۆال ۇزدىك ونەرپازدار تاجىريبە الماسىپ, ۇرپاقتار ساباقتاستىعىن ناسيحاتتايتىن الاڭعا اينالادى. سونىمەن قاتار, جاس ورىنداۋشىلاردىڭ كوركەمدىك تالعامىن تاربيەلەۋگە جانە ولاردى ۇزدىك مادەني قۇندىلىقتارعا باۋلۋعا باعىتتالعان.
كونتسەرتتىك باعدارلامادا كورەرمەندەر فولكلورلىق داستۇرلەرمەن تىعىز بايلانىستى, تۇركى الەمىنىڭ مۋزىكالىق مۇراسىن جاڭا قىرىنان تانىتاتىن ورىنداۋشىلاردىڭ ونەرىن تاماشالايدى. سونداي-اق, دالا اۋەندەرىنىڭ بايىرعى ۇلگىلەرى مەن حالىق اندەرىنىڭ زاماناۋي وڭدەلگەن نۇسقالارى, ۇلتتىق اسپاپتارعا ارنالعان تۋىندىلار مەن ورىنداۋشىلىقتىڭ تىڭ فورمالارى ۇسىنىلادى.
فەستيۆال 18-19 قازان كۇندەرى ساعات 18:00-دە روزا باعلانوۆا اتىنداعى «قازاقكونتسەرتتە» وتەدى. العاشقى كۇنى ساحناعا شىعاتىن شەتەلدىك ونەرپازدار: رەسەي فەدەراتسياسىنان «نامعار» توبى (بۋرياتيا), زاكير دۇيشەنبەك (قىرعىزستان) جانە جانىبەك پيازوۆ (قاراقالپاقستان). سونداي-اق, قازاقستاندىق ونەر ۇجىمدارى مەن تالانتتى ورىنداۋشىلارى دا ءوز ونەرلەرىن ورتاعا سالادى. اتاپ ايتقاندا, «استانا سازى» قازاق مەملەكەتتىك فولكلورلىق ءانسامبلى, «جوشى» ءانسامبلى, «Satzhan Project» توبى, ەدىل قۇسايىنوۆ, قازىبەك ادىكەي, امانجول نىعمەت, ساندجاي الميشەۆ جانە ايحات قازيحان.
فەستيۆالدىڭ ەكىنشى كۇنى ساحناعا شىعاتىن شەتەلدىك ونەرپازدار: ارسلانبەك سۋلتانبەكوۆ (تۇركيا), «زافار» توبى (ازەربايجان), رەسەي فەدەراتسياسىنان ەركين الەكسەەۆ (ساحا رەسپۋبليكاسى) جانە ازات بيكچۋرين (باشقۇرتستان). سونداي-اق, «قورقىت» ەتنو-فولكلورلىق ءانسامبلى, «تۇركىستان» كامەرالىق ءانسامبلى, ەدىل قۇسايىنوۆ جانە سالتانات ەرسۇلتان.
2023 جىلى العاش رەت وتكەن «Kóshpendiler áýeni» حالىقارالىق ەتنيكالىق مۋزىكا فەستيۆالىنە ياكۋتيا, وزبەكستان, قىرعىز رەسپۋبليكاسى, تۇركيا جانە ماجارستان ەلدەرىنىڭ ونەرپازدارى قاتىسقان بولاتىن.
