پەتروپاۆلدا بيىل كومباين شىعارىلادى

پەتروپاۆل. 8 مامىر.  “سامۇرىق-قازىنا-ينۆەست”, “قازينتەرتەحسەرۆيس” جشس-لەرىنىڭ جانە فينليانديانىڭ “Sampo Rosenlew Ltd”, پولشانىڭ “Pronar SP.z.o.o.” كومپانيالارىنىڭ وكىلدەرى بىلتىر  قىزىلجار وڭىرىندە بولعان جۇمىس ساپارىندا  اۋىل شارۋاشىلىعى جانە كوممۋنالدىق تەحنيكالار شىعاراتىن بىرلەسكەن كاسىپورىن اشۋ جونىندە وبلىستىق اكىمدىكپەن مامىلەگە كەلگەن بولاتىن.  وسى كەلىسىمگە وراي قۇرىلعان “قازتەحماش” كاسىپورنىنا 1,9 ميلليارد تەڭگە ينۆەستيتسيا تارتۋ جوسپارلانعان. بۇل تۋرالى يندۋستريالىق-يننوۆاتسيالىق دامۋ باسقارماسىنىڭ باسشىلىعى حابارلادى. «قازتەحماش» جشس-ءى بۇرىنعى شاعىن ليتراجدى قوزعالتقىشتار زاۋىتى عيماراتىنا ورنالاسىپ, ءوندىرىس ورىن جاساقتاۋعا كىرىسكەن. ونىڭ ديرەكتورى ءسابيت شاكەنوۆتىڭ ايتۋىنشا, سەرپىندى جوبا يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ەكىنشى بەسجىلدىعىنىڭ يندۋستريالاندىرۋ كارتاسىنا ەنگىزىلگەن.  بۇگىندە جالپى اۋماعى 7 مىڭ شارشى مەتر بولاتىن قۇراستىرۋ تسەحى 3 جەلى ورناتۋعا ءازىر.  قاجەتتى جابدىقتار مەن قوندىرعىلار شەتەلدەن جەتكىزىلۋدە. كومباين قۇراستىرۋعا باسشىلىق جاسايتىن 14 مامان فينليانديانىڭ “Sampo Rosenlew Ltd”, پولشانىڭ “Pronar SP.z.o.o.” كومپانيالارىندا وقىپ, تاجىريبەدەن وتكەن. العاشقى كەزدە وسى كومپانيالاردىڭ ينجەنەرلەرى سەرىكتەستىك ماماندارىن وزىق تەحنولوگيالاردىڭ قىر-سىرىنا ۇيرەتەتىن بولادى. «يننوۆاتسيالىق جوبانىڭ ءبىرىنشى كەزەگىندە دايىن بولشەكتەردەن كومبايندار قۇراستىرۋمەن اينالىسىپ, وتاندىق ۇلەستى ارتتىرۋعا بىرتىندەپ كوشەمىز. زاۋىت تولىق قۋاتىندا جۇمىس ىستەگەن كەزدە جىلىنا 400 كومباين, 500 تراكتور, 1200 كوممۋنالدىق تەحنيكا شىعاراتىن بولامىز.  168 ادام جۇمىسپەن قامتىلادى.  نەسيەنىڭ سىياقى ستاۆكاسى “بيزنەستىڭ جول كارتاسى – 2020” مەملەكەتتىك باعدارلاماسى اياسىندا قارجىلاندىرىلادى. العاشقى كومبايندار بيىل شىعارىلادى», دەيدى ءسابيت شاكەن ۇلى. ءومىر ەسقالي. دەرەك: يندۋستريالدىق-يننوۆاتسيالىق دامۋ باسقارماسى. سۋرەت: egemen.kz