پەتروپاۆل. 8 مامىر. وبلىس ورتالىعىندا وسىمەن 23-ءشى رەت تويلانعان وتان قورعاۋشىلار كۇنى ەرلىكتىڭ پەن ەلدىكتىڭ جوعارى قاسيەتتى بەلگىسى رەتىندە جۇرتشىلىقتىڭ بەلسەنە قاتىسۋىمەن جوعارى دەڭگەيدە ۇيىمداستىرىلدى. بۇل تۋرالى egemen. kz ءتىلشىسى حابارلادى.
اسىرەسە, وسكەلەڭ ۇرپاق بويىندا قازاقستاندىق پاتريوتيزم سەزىمدەرىنىنىڭ جوعارى ۇلگىسىن قالىپتاستىراتىن ماڭىزدى شارا قازاق جەرىن جوڭعار شاپقىنشىلارىنان قورعاۋعا تىزە قوسىپ اتتانعان قوس ءباھادۇر – قاراساي مەن اعىنتاي باتىرلاردىڭ ەسكەرتكىشىنە گۇل شوقتارىن قويۋدان باستالدى. بۇل ءراسىم وتەلگەننەن كەيىن قاراقۇرىم كوپشىلىك ساپ تۇزەگەن بويى قازاقستان كونستيتۋتسياسى بويىمەن جىلجي وتىرىپ, ورتالىق الاڭعا كەلدى. مۇندا LED ەكرانى ارقىلى پرەزيدەنت ن. نازارباەۆتىڭ قازاقستان حالقىنا ارناعان مەرەكەلىك تىلەگى, رەسپۋبليكا قارۋلى كۇشتەرىنىڭ ەڭ ۇلگىلى قۇرىلىمدارىنان جاساقتالعان اسكەري شەرۋ تاماشالاندى.
«وتانعا قىزمەت ەتەمىن!» شارالار باعدارلاماسىن وبلىس اكىمى ەرىك سۇلتانوۆ اشىپ, سولتۇستىكقازاقستاندىقتاردى ايتۋلى مەرەكەمەن قۇتتىقتادى. ەلباسى اتىنان سوعىس جانە تىل ارداگەرلەرى سادىقان قازباەۆقا, پەتر يازىكوۆقا «قۇرمەت» وردەندەرىن سالتاناتتى جاعدايدا تابىس ەتتى. ۇلى جەڭىسكە ساناۋلى كۇندەر قالعاندا 92 جاسىندا كوز جۇمعان جۇسىپوۆ ەردەنباي اقساقالدىڭ مەملەكەتتىك ماراپاتىن ۇلى ەركىن قابىلدادى. 4 ارداگەر «ەرەن ەڭبەگى ءۇشىن» مەدالىنە, ەكى ارداگەر قۇرمەت گراموتاسىنا يە بولدى. وتان الدىنداعى مۇلتىكسىز ەڭبەگى, قىزمەتتەگى جوعارى كورسەتكىشتەرى, جەكە تارتىپتىلىگى ءۇشىن 20 اسكەري قىزمەتكەرگە ايماق باسشىسىنىڭ قۇرمەت گراموتالارى مەن العىس حاتتارى تارتۋ ەتىلدى.
«جەڭىس» ساياباعىندا اياقدوپ جانە ۆولەيبول شەبەرلەرى كۇش سىناسسا, ي. شۋحوۆ اتىنداعى ورتالىق كىتاپحانادا «قازاقستاننىڭ ەرجۇرەك ۇلدارى» اتتى ەرلىك ساعاتى ءوتتى. «داستۇرلەر سۇرلەۋىمەن» تاقىرىبىنداعى تاريحي ەكسكۋرس تا تانىمدىلىعىمەن ەستە قالدى.
وتان قورعاۋشى كۇنى ودان ءارى «جەلبىرە, جەڭىس جالاۋى!» ادەبي-سازدى كومپوزيتسياعا ۇلاسىپ, جەرگىلىكتى كوركەمونەرپازداردىڭ كونتسەرتتىك باعدارلاماسىمەن تۇيىندەلدى.
ءومىر ەسقالي.
دەرەك, سۋرەت: egemen.kz
