بۇگىندە ەربولات تولەپبايدىڭ ەسىمى ەلىمىزبەن بىرگە شەت مەملەكەتتەردە دە كەڭىنەن تانىمال. ول بەينەلەۋ ونەرىندە قالىپتاسقان ءداستۇردى لايىقتى جالعاستىرىپ, ءابىلحان قاستەەۆ, گۇلفايرۋس يسمايلوۆا, جاڭاتاي شاردەنوۆ سياقتى ايگىلى سۋرەتشىلەردەن ۇزىلمەگەن ساباقتاستىقتى ساقتاۋعا ۇلكەن ۇلەس قوسىپ كەلەدى. ەربولات تولەپباي ۇلتتىق بوياۋدى ەۋروپا جانە ازيا مانەرىمەن شەبەر ۇشتاستىرۋ ارقىلى ەلىمىزدە قازاقى سيۋررەاليزمنىڭ نەگىزىن قالاۋشىلاردىڭ ءبىرى ەكەنىن دە اتاپ وتكەن ءجون.
ماۋلەن اشىمباەۆ مەرەيتوي يەسى وتاندىق بەينەلەۋ جانە كەسكىندەمە ونەرىنىڭ دامۋىنا زور ەڭبەك سىڭىرگەنىنە نازار اۋدارىپ, ونىڭ شىعارماشىلىعى جان-جاقتى ەكەنىن تىلگە تيەك ەتتى. سۋرەتشىنىڭ داستۇرگە نەگىزدەلگەن جانە رۋحاني مازمۇنعا يە كارتينالارى كوركەمدىك يننوۆاتسيا مەن مادەني جاڭعىرۋدى, ەجەلگى ميفتەر مەن زاماناۋي شىنايىلىقتى ۇيلەستىرىپ, بىرەگەيلىكتىڭ ماڭىزىن ارتتىرا تۇسكەنى ءسوزسىز.
پالاتا سپيكەرى ۇلتتىق بىرەگەيلىكتى دارىپتەۋ, جالپىادامزاتتىق قۇندىلىقتاردى قالىپتاستىرۋ, سونداي-اق ۇلتتىق كود پەن ساباقتاستىقتى ساقتاۋ جولىندا زاماناۋي مادەنيەتتىڭ جانە ونەردىڭ ءمانى زور ەكەنىن ايتتى. سوندىقتان اتالعان سالا مەملەكەت باسشىسىنىڭ ەرەكشە نازارىندا.
«پرەزيدەنت قاسىم-جومارت توقاەۆ ۇلتتىق مادەنيەتىمىزدى دامىتۋعا ۇنەمى باسا ءمان بەرىپ كەلەدى. بۇگىندە بۇل باعىتتا ءتۇرلى باعدارلاما مەن ماڭىزدى جوبا ىسكە اسىرىلىپ جاتىر. سونىڭ ىشىندە ۇلتتىق مادەني مۇرامىزدى دارىپتەۋگە ارنالعان اۋقىمدى ءىس-شارالار جۇيەلى تۇردە ۇيىمداستىرىلىپ جاتىر. وسى كورمە دە سونداي يگى ءىستىڭ لايىقتى جالعاسى ەكەنى انىق. ەربولات تولەپباي قازاق بەينەلەۋ ونەرىنىڭ ىلگەرىلەۋىنە ەلەۋلى ۇلەس قوستى. ونىڭ ءار تۋىندىسىندا ۇلكەن وي, تەرەڭ فيلوسوفيا جاتىر. اسىرەسە كوشپەلىلەر ءداستۇرى مەن دالا دانالىعى ارقىلى سۋرەتشى ۇلتتىق كود, تاريحي سانا, ساباقتاستىق سياقتى قۇندىلىقتاردىڭ ماڭىزىن ايرىقشا دارىپتەيدى», دەگەن م.اشىمباەۆ قىلقالام شەبەرىنە ىزگى لەبىزىن ارناپ, شىعارماشىلىق تابىس تىلەدى.
ءىس-شاراعا ەلىمىزدىڭ مادەنيەت قايراتكەرلەرى, زيالى قاۋىم وكىلدەرى جانە سۋرەتشىلەر وداعىنىڭ مۇشەلەرى قاتىسىپ, ەربولات تولەپبايدى مەرەيلى بەلەسىمەن قۇتتىقتادى.
