ۇلتتىق جوبا اياسىندا سالىنعان مەكتەپتەر اتا-انالار تاراپىنان جوعارى باعالانىپ جاتىر. مىسالى, شاردارا اۋدانى, وتەعۇل ەلدى مەكەنىندە ورنالاسقان №3 جالپى ءبىلىم بەرەتىن مەكتەپ اتا-انالارعا ارنايى اشىق ەسىك كۇنىن ۇيىمداستىردى. مەكتەپتە ءبىر اۋىسىمدا 300 وقۋشىنىڭ ءبىلىم الۋىنا بارلىق جاعداي جاسالعان. جاڭا مەكتەپ زاماناۋي تالاپتارعا ساي. ءپان كابينەتتەرى تولىق جابدىقتالعان. STEM-زەرتحانالار, بيولوگيا, حيميا, فيزيكا كابينەتتەرى تاجىريبەلىك ساباقتارعا ارنالعان قۇرال-جابدىقتارمەن قامتاماسىز ەتىلگەن. شارا بارىسىندا اتا-انالار مەكتەپتىڭ ىشكى تارتىبىمەن, وقۋ كابينەتتەرىمەن, زاماناۋي جابدىقتالعان سىنىپتارىمەن جانە وقۋشىلاردىڭ جان-جاقتى دامۋىنا ارنالعان قوسىمشا ۇيىرمەلەرمەن تانىستى. مەكتەپ ديرەكتورى ەركىنالى اقبەرديەۆ بۇل باستاما اتا-انالار مەن مەكتەپ اراسىنداعى ءوزارا بايلانىس پەن سەنىمدى نىعايتاتىنىن العا تارتتى.
– ءبىزدىڭ ماقساتىمىز – ءاربىر وقۋشىعا ساپالى ءبىلىم بەرىپ قانا قويماي, ولاردىڭ جان-جاقتى دامۋىنا جاعداي جاساۋ. بۇگىنگى اتا-انالارمەن كەزدەسۋ – سەنىمدى سەرىكتەستىك ورناتۋعا باعىتتالعان ماڭىزدى قادام. بالانىڭ تابىستى بولۋى – مەكتەپ پەن اتا-انانىڭ بىرلەسكەن ەڭبەگىنىڭ ناتيجەسى. مەملەكەت باسشىسى قاسىم-جومارت توقاەۆتىڭ پارمەنىمەن قولعا الىنعان «كەلەشەك مەكتەپتەرى» ۇلتتىق جوباسىنىڭ شاراپاتىن ءبىزدىڭ ەلدى مەكەن تۇرعىندارى دا كورىپ وتىر. بۇعان دەيىن اۋىلداعى ءبىلىم ۇياسى ءۇش اۋىسىمدى مەكتەپ قاتارىنا ەنۋگە شاق قالعان ەدى. جاڭا كەلەشەك مەكتەپتىڭ سالىنۋى – اۋىل بالاسىنىڭ ءبىلىمىن جەتىلدىرۋگە تاپتىرماس مۇمكىندىك بەرەدى. مۇندا وقۋشىلاردىڭ شىعارماشىلىق جانە سپورتتىق الەۋەتىن دامىتۋ ءۇشىن حورەوگرافيا زالى, زاماناۋي تالاپتارعا ساي سپورت زالى مەن سپورت الاڭى, مۋزىكا كابينەتتەرى ۇلتتىق جانە كلاسسيكالىق اسپاپتارمەن جابدىقتالعان. بەينەلەۋ ونەرى جانە گرافيكا كابينەتى, تاماقتانۋ مادەنيەتى كابينەتى, ەڭبەككە باۋلۋ شەبەرحانالارى قاراستىرىلعان. كىتاپحانا, اسحانا, ءماجىلىس زالى, كوۆوركينگ جانە دەمالىس ايماقتارى بار. جاڭا مەكتەپ ءاربىر وقۋشىعا تەك ساپالى ءبىلىم الۋعا عانا ەمەس, سونىمەن قاتار عىلىممەن, ونەرمەن, سپورتپەن جانە ەڭبەكپەن اينالىسۋعا تولىق مۇمكىندىك بەرەتىن زاماناۋي ءبىلىم ورداسىنا اينالادى, – دەيدى مەكتەپ ديرەكتورى.
اشىق ەسىك كۇنى اتا-انالارعا وقۋ ۇدەرىسىنىڭ ەرەكشەلىكتەرى, تسيفرلىق ءبىلىم بەرۋ پلاتفورمالارىن قولدانۋ ءتارتىبى جانە وقۋشىلاردىڭ تاربيەلىك ءىس-شارالارعا قاتىسۋ مۇمكىندىكتەرى جايىندا تولىق اقپارات بەرىلدى. سونىمەن قاتار مەكتەپ اسحاناسى, سپورت زالى مەن كىتاپحاناسى كورسەتىلىپ, وقۋشىلاردىڭ دەنساۋلىعى مەن بوس ۋاقىتىن ءتيىمدى وتكىزۋىنە جاسالعان مۇمكىندىكتەر تانىستىرىلدى. اتا-انالار جاڭا مەكتەپتىڭ زاماناۋي تالاپتارعا ساي سالىنعانىن, وقۋ-تاربيە ۇدەرىسىن ءتيىمدى ۇيىمداستىرۋعا جاعداي جاسالعانىن ايتتى. «بۇگىنگى تانىستىرۋ شاراسى بىزگە ۇلكەن اسەر قالدىردى. جاڭا مەكتەپتىڭ وقۋ كابينەتتەرى كەڭ, زاماناۋي جابدىقتالعان. اسىرەسە بالالاردىڭ قاۋىپسىزدىگى مەن دامۋىنا بارلىق جاعدايدىڭ قاراستىرىلعانىنا قۋانىپ وتىرمىز. وسىنداي ورتادا وسكەلەڭ ۇرپاقتىڭ بىلىمگە دەگەن ىنتاسى ارتا تۇسەتىنىنە سەنىمدىمىز. جاڭا مەكتەپتىڭ ءار بۇرىشى بالالاردىڭ يگىلىگى ءۇشىن ۇتىمدى پايدالانعان. بوس ۋاقىتتارىندا, ءۇزىلىس كەزىن ءتيىمدى پايدالانۋعا بولادى. ەندى بارلىق جاعدايى جاسالعان وسىنداي مەكتەپتە بالالارىمىز تەك ءبىلىم الۋ كەرەك. بالالاردىڭ يگىلىگى ءۇشىن جاسالعان مىقتى جوبا», دەيدى اتا-انالاردىڭ ءبىرى. مۇنداي كەزدەسۋلەر الداعى ۋاقىتتا دا ءداستۇرلى تۇردە جالعاسىن تاۋىپ, مەكتەپ پەن اتا-انالار اراسىنداعى بايلانىستى ارتتىرۋعا باعىتتالماق.
تۇركىستان وبلىسى
