ايگۇلمەن جاقىن ارالاسۋىم 2011 جىلى كۇزدە باستالدى. ول استانادا «حالىق ءسوزى» گازەتىندە قىزمەت ىستەپ جۇرگەندە مەنەن سۇحبات الدى. قازاق «جىلقى كىسىنەسكەنشە, ادام سويلەسكەنشە» دەيدى. بىراق اۋەلدە سىپايىلىقپەن سوزدەرى جاراسسا دا, ءبىر-بىرىمەن ىشكى قايشىلىق شەڭبەرىنەن شىعا الماي, جان سارايىنىڭ مازمۇنى قابىسىپ, ءوزارا ۇندەسىپ كەتپەيتىن سالقىندىق بولادى. ويتكەنى جەر بەتىندە تەك دۇنيەتانىمى ۇقساس, رۋحاني نيەتتەس ادامدار ءبىرىن-ءبىرى شىن باعالايدى ءارى سول قادىر تۇتار ارداقتى جانداردى اجالعا قيمايدى. سول قيماستىق ساعىنىش بەكەردەن-بەكەر تۋمايدى, دۇنيەدە شىن سىيلاستىققا جەتەر اسىل قازىنا جوق.
23 شىلدە كۇنى الماتىعا پويىزبەن ءوز شارۋاممەن كەلە جاتتىم, بيلەت ەرتەرەك الىنعان. قالاعا كىرە بەرە تەلەفونمەن قارالى حابار جەتتى. ايگۇل احانبايقىزى ومىردەن وزعانىن ەستۋ ماعان اۋىر ءتيدى. ونىڭ ومىرگە دەگەن قۇشتارلىعى ەرەكشە بولاتىن, ەڭ اقىرىنا دەيىن تىرشىلىكتەن ءۇمىت ۇزبەي, اۋىر ناۋقاسپەن الىسىپ, جىلدار بويى ەمدەلدى. جانازاعا بارعاندا ىشتەي قيماس ادامداردىڭ ءبىر-بىرىنە تارتىلىس كۇشى, قازاقى باۋىرمالدىق تۋرالى ويلادىم. ءدال وسى كۇنگە تاپ كەلگەنىم كەزدەيسوقتىق بولماي شىقتى. تىرىسىندە اۋزىنان شىققان ءاربىر ويلى, تەرەڭىنەن تولعانىپ, تالداپ-زەردەلەپ, سيتۋاتسيانى ءدال تانىپ ايتاتىن پىكىرىنە ءسۇيسىنىپ, كوڭىل تۇپكىرىندە ەشتەڭە جاسىرماي سويلەسەتىن جان مەن ءۇشىن ايگۇل بولاتىن.
ايگۇلدىڭ جازبالارى ءبىر-بىرىنە ۇقسامايدى. ول استانادا بىرەر جىل تۇرعان سوڭ وتباسىمەن الماتىعا قايتا ورالدى. تەلەفون ارقىلى سويلەسىپ, ارا-تۇرا كەزدەسۋدىڭ ءساتى ءتۇستى. قازىرگى قوعامدا كوۋچ دەگەندەر العا سۋىرىلىپ شىقتى. ولار ءبىلىم ساتادى, ەلگە اقىل-كەڭەسىن ايتىپ, پسيحولوگيالىق كومەك, جول كورسەتۋگە بەيىمدەلگەن پلاتفورمانى ۇستايدى.
ايگۇل احانبايقىزىنىڭ جازا الماي كەتكەن كىتابى, كوكىرەك كوزىندە سايراپ, تۇما-بۇلاق كوزىندەي تۇنىپ تۇرعان, كەرەك كەزىندە لىقسىپ شىعا كەلەتىن پسيحولوگيالىق زەردەلەۋ-تالقىلاۋ قابىلەتىمەن ارتىق, قازىرگى قازاق قوعامىنا وتە كەرەك كىتاپ بولاتىن. ايگۇل ەۋروپا نەمەسە ورىس پسيحولوگ مامانداردىڭ دايار كوزقاراسىمەن ايتپايدى, نە نارسە بولسىن ۇلتتىق مەنتاليتەتكە نەگىزدەپ, ەلدىك كوزبەن ايقىندايتىن ەدى. تەلەفونمەن ءار سويلەسكەن سايىن مەن وعان ۇنەمى: «ايگۇل, سەن جاڭا عانا ۇلتقا وتە قاجەت كىتاپتىڭ ءبىر تاراۋىن اۋىزشا ايتىپ بەردىڭ. ەندى وتىرا قالىپ, ۇمىتپاي تۇرعاندا وسىنى جازشى, تەز نوۋتبۋككە ءتۇسىرشى», دەيتىنمىن. ەڭ قىزىعى, وسى ءسوزدى وعان ايتپاعان كەزىم سيرەك. ەگەر شىن لايىق بولماسا, مۇنداي ءسوزدى ايتىپ نەم بار. ايگۇل بۇعان اقىرىن كۇلەتىن دە قوياتىن. تامىزدىڭ باسىندا ايگۇل استاناعا تاڭعى رەيسپەن ەم الۋ ءۇشىن ۇشىپ كەلدى. مەن ودان قازاق جازۋشىلارىنىڭ قىرعىز تىلىندە شىققان انتولوگياسىن الا كەلشى دەپ سۇراعان ەدىم. سوڭعى جۇزدەسۋ ەكەن, بوي جازىپ, قوشتاسۋ ءۇشىن كەلگەندەي.
ايگۇل احانبايقىزىنىڭ شىعارماشىلىق ەڭبەگى ەلەنىپ, «نۇر-سۇڭقار» سىيلىعى جانە «قۇرمەت» وردەنىمەن ماراپاتتالدى. بەرەكەلى وتباسىندا سۇيىكتى جار, بالاجان, اياۋلى انا اتانعانى ايگۇلدىڭ ەڭ ۇلكەن باقىتى بولاتىن. ماڭدايىنا 53 جاس جازىلعان قازاقتىڭ تەكتى قىزى, مەيىربان, ءبىلىمدى, ويلى, اقىلدى, ەلگە سىيلى, جارقىن جان ەكەنى كۇمانسىز. «Whats App»-تان تۋىستاي بولىپ كەتكەن شىنايى دوستىڭ داۋىس ارقىلى جىبەرگەن سوزدەرىن قايتا-قايتا تىڭداعاندا ول ماعان ءتىرى سياقتى اسەر ەتتى. ادام رۋحى ولمەيدى.
ايگۇل كەمەلباەۆا,
جازۋشى
