بۇگىندە ەكونوميكا, بيزنەس, مەملەكەتتىك قىزمەت, ءبىلىم, عىلىم, دەنساۋلىق ساقتاۋ سالالارىن تسيفرلاندىرۋ قارقىندى ءجۇرىپ جاتىر. ماسەلەن, عىلىم جانە جوعارى ءبىلىم مينيسترلىگىنىڭ مالىمەتىنشە, 30 جوعارى وقۋ ورنىندا جاساندى ينتەللەكتىگە قاتىستى 38 جاڭا باعدارلاما ىسكە قوسىلعان. ونىڭ ىشىندە قولدانبالى جي, مەديتسيناداعى جي, بلوكچەين ينجەنەرياسى سياقتى سالالار بار.
ال دەنساۋلىق ساقتاۋ مينيسترلىگى جاساندى ينتەللەكتىگە نەگىزدەلگەن 40-قا جۋىق ستارتاپ جوبانى قابىلداعان. سونىڭ ىشىندە 15 جوبا دياگنوستيكاعا باعىتتالعان ەكەن. بەسەۋى قاناتقاقتى رەجىمدە سىناقتان وتسە, ەكەۋى كلينيكالىق پراكتيكاعا ەنگىزىلگەن. پرەزيدەنت تاپسىرماسىنا سايكەس, الەۋمەتتىك ماڭىزى جوعارى التى جوباعا ەرەكشە قولداۋ كورسەتىلىپ جاتىر. سولاردىڭ ءبىرى جي-تەراپەۆت – داۋىس پارمەنى ارقىلى مەديتسينا-لىق قۇجاتتاردى اۆتوماتتى تۇردە دايىندايتىن جاساندى ينتەللەكت جۇيەسى. ول ناۋقاستىڭ ەمدەلۋ تاريحىن جازىپ, الدىن الا دياگنوزدار قويادى جانە كلينيكالىق ۇسىنىستاردى قامتيتىن مەديتسينالىق ەسەپتى اۆتوماتتى تۇردە شىعارادى.
مادەنيەت جانە اقپارات مينيسترلىگى دە وسى باعىتتا ناقتى شارالاردى قولعا الىپ وتىر. ماسەلەن, جالعان كونتەنت پەن ديپفەيكتەردى اۆتوماتتى تۇردە انىقتايتىن تسيفرلىق باستاما ىسكە قوسىلدى. سونداي-اق اقپاراتتىق كەڭىستىكتى تاۋلىك بويى قاداعالايتىن «مەرگەن» جۇيەسى زاڭعا قايشى ينتەرنەت-دۇكەندەردى انىقتاپ, بۇعاتتاپ وتىر.
ەڭبەك جانە حالىقتى الەۋمەتتىك قورعاۋ مينيسترلىگى «Skills.enbek» پلاتفورماسىن جي نەگىزىندە تولىق جەتىلدىرگەن. بۇرىن كۋرستاردى ىزدەۋ مەن جاريالاۋ قيىندىق تۋدىرسا, قازىر جاساندى ينتەللەكت رەزيۋمە مەن بوس ورىنداردى تالداپ, قولدانۋشىعا سايكەس كۋرستاردى ءوزى ۇسىنادى. سونىمەن قاتار اۆتورلارعا باعدارلامالارىن تىركەۋگە كومەكتەسەدى. بۇگىنگە دەيىن پلاتفورمانىڭ چات-بوتى مەن سەرۆيستەرىن ازاماتتار التى ءجۇز ەلۋ مىڭنان استام رەت پايدالانىپ ۇلگەرگەن.
بۇدان بولەك, «SmartCity Astana» جوباسى قالاداعى ءومىر ساپاسىن ارتتىرۋعا باعىتتالعان. جوبا اياسىندا جاساندى ينتەللەكت قولدانىلاتىن استانانىڭ تسيفرلىق كوشىرمەسى جاسالادى. وعان 100 مىڭنان استام بەينەباقىلاۋ كامەرالارى قوسىلىپ, قوعامدىق ورىندارداعى قاۋىپتەردى ونلاين-رەجىمدە انىقتاپ, جەدەل ارەكەت ەتۋگە مۇمكىندىك بەرەدى.
«AlemLLM» – قازاق تىلىندە جاسالعان ءىرى تىلدىك مودەل. ول جوعارى دالدىككە يە جانە جەرگىلىكتى جاعدايدا قولدانۋعا بەيىمدەلگەن. مودەل قازىر قولدانىستاعى ۇقساس شەشىمدەردىڭ ىشىندەگى ەڭ ءتيىمدىسى سانالادى ءارى ءتۇرلى سالادا كەڭىنەن پايدالانۋعا باعىتتالعان.
«AI Kitap» – جاساندى ينتەللەكت نەگىزىندەگى تسيفرلىق وقۋلىقتار پلاتفورماسى. جۇيە ءاربىر وقۋشىنىڭ ءبىلىم دەڭگەيىن, ۇلگەرىمىن جانە جەكە ەرەكشەلىكتەرىن ەسكەرە وتىرىپ, وقۋ بارىسىن جەكەلەگەن سيپاتتا جۇرگىزۋگە مۇمكىندىك بەرەدى.
«Baspana Hub» – تۇرعىن ۇيگە قاتىستى بارلىق قاجەتتىلىكتى ونلاين فورماتتا شەشۋگە ارنالعان تسيفرلىق ەكوجۇيە. جۇيە ارقىلى ازاماتتار جىلجىمايتىن م ۇلىكتى ماركەتپلەيس ارقىلى ىزدەپ, ساتىپ الا الادى, مەملەكەتتىك قىزمەتتەردى راسىمدەيدى, جوندەۋ جۇمىستارىنا تاپسىرىس بەرىپ, قۇرىلىس ماتەريالدارىن ونلاين-سمەتا ارقىلى الۋعا بولادى. جوبا سىرتقى قارجى مەن ينۆەستيتسيا تارتپاي-اق ىسكە اسقان.
«Biny.co» – جۇك تاسىمالى سالاسىنداعى وتاندىق ستارتاپ. جوبا «Google for Startups» – «Silkway Accelerator» باعدارلاماسىنا قاتىسىپ, ۇزدىك ۇشتىككە كىرگەن. ستارتاپتىڭ كليەنتتەرى قاتارىندا «QazPost», «Coca-Cola», «Gorilla Asia», «Zeta Trade» سياقتى ءىرى كومپانيالار بار.
«Surfaice.pro» – وتاندىق كاسىپكەرلەر كرەمني القابىندا قۇرعان تەحنولوگيالىق كومپانيا. جوبا قۇرىلىس سالاسىنا ارنالعان يننوۆاتسيالىق شەشىم ازىرلەۋدە جانە اقش-تىڭ بەس شتاتىندا جۇمىس ىستەپ جاتىر. ستارتاپ «Big Sky Capital» جانە «Shadow Ventures» قورلارىنان 1,5 ميلليون دوللار ينۆەستيتسيا تارتقان.
«OlympIQ» – سپورت سالاسىن دامىتۋعا باعىتتالعان تەحنولوگيالىق پلاتفورما. ول سپورتتاعى اناليتيكالىق, مەديتسينالىق, ۇيىمداستىرۋشىلىق جانە وپەراتسيالىق دەرەكتەردى جاساندى ينتەللەكت ارقىلى وڭدەۋگە مۇمكىندىك بەرەدى.
ەرتە كەزەڭدە ورمان ءورتىن انىقتاۋ جۇيەسى – بەينەمونيتورينگ, بەينەاناليتيكا جانە جاساندى ينتەللەكتىگە نەگىزدەلگەن جوبا. بۇل جۇيە ءورت وشاعىنا دەن قويۋ ۋاقىتىن قىسقارتىپ, اپاتتىڭ كولەمى مەن زاردابىن ەداۋىر ازايتادى. جوبا قازىردىڭ وزىندە «بۋراباي» مەملەكەتتىك ۇلتتىق تابيعي پاركىندە جانە «ەرتىس ورمانى» مەملەكەتتىك ورمان رەزەرۆاتى اۋماعىندا ىسكە اسىرىلىپ جاتىر.
جي-حاتتاماشى – مەملەكەتتىك ورگاندارداعى جينالىس اۋديوجازبالارىن ماتىنگە ءتۇسىرىپ, رەسمي حاتتامالاردى اۆتوماتتى تۇردە ازىرلەيتىن جاساندى ينتەللەكت جۇيەسى. بۇل قۇجات اينالىمىن جەدەلدەتۋگە, قول ەڭبەگىن ازايتۋعا جانە اقپاراتتىڭ دالدىگى مەن ساقتالۋىن قامتاماسىز ەتۋگە باعىتتالعان.
راديولوگيالىق زەرتتەۋلەردى ورتالىقتاندىرۋعا ارنالعان جوبالار – جاساندى ينتەللەكتىنى قولدانا وتىرىپ, ونكولوگيالىق اۋرۋلاردى ەرتە كەزەڭدە انىقتاۋعا مۇمكىندىك بەرەدى. بۇل جۇيە مەديتسينالىق كەسكىندەردى ساقتاپ, وڭدەۋگە ارنالعان.
