«پسيحولوگيا – اسكەردىڭ جاۋىنگەرلىك دايىندىعىن قامتاماسىز ەتۋدىڭ ماڭىزدى ەلەمەنتى. اسكەري قىزمەتشىلەرمەن جانە ولاردىڭ وتباسىلارىمەن ءتيىمدى جۇمىس ىستەۋ ارميانىڭ مورالدىق كۇشىنىڭ نەگىزى بولىپ تابىلادى», دەدى قورعانىس ءمينيسترىنىڭ تاربيە جانە يدەولوگيالىق جۇمىستار جونىندەگى ورىنباسارى ۆيتسە-ادميرال سەرىك بورامباەۆ جيىندى اشۋ كەزىندە.
ونىڭ ايتۋىنشا, قازىرگى زاماننىڭ تالاپتارى يننوۆاتسيالىق تسيفرلىق شەشىمدەردى ەنگىزۋدى قاجەت ەتەدى. سولاردىڭ ءبىرى – AI-sulu بوتى. بوتتى ۇلتتىق اسكەري-پاتريوتتىق ورتالىعى اقپاراتتىق ءبولىمىنىڭ باستىعى مايور قاسىمحان تۋيتين تانىستىردى.
«AI-sulu ءتىرى ماماننىڭ ورنىن الماستىرا المايدى, بىراق ول قيىن ساتتەردە العاشقى كومەك كورسەتىپ, تىڭداي وتىرىپ, قاجەتتى كەڭەس پەن رەسۋرستارعا باعىتتاي الادى», دەپ اتاپ ءوتتى تۋيتين.
تسيفرلىق كەڭەسشى قازاق جانە ورىس تىلدەرىندە قولجەتىمدى. ونىڭ باستى ارتىقشىلىعى – انونيمدىلىك پەن تاۋلىك بويى قولجەتىمدىلىك.
جاڭا قىزمەتتى تانىستىرۋ بارىسىندا دەسترۋكتيۆتى مىنەز-ق ۇلىقتىڭ الدىن الۋ, كۇيزەلىس تۇراقتىلىعىن دامىتۋ, پسيحولوگيالىق جۇمىستاردا IT-قۇرالداردى قولدانۋ جانە جاستارمەن جۇمىس ىستەۋدىڭ ەرەكشەلىكتەرى تالقىلاندى. پسيحوتەراپيا, سۋيتسيدولوگيا جانە اسكەري پسيحولوگيا سالاسىنداعى ساراپشىلار ءسوز سويلەدى.
قاتىسۋشىلار بۇل تاجىريبە اسكەري قۇراممەن جۇمىس ىستەۋدە وتە پايدالى بولاتىنىن جانە اسكەري پسيحولوگيا قىزمەتى ءۇشىن جاڭا ادىستەمەلىك ماتەريالداردىڭ نەگىزىنە اينالاتىنىن اتاپ ءوتتى.
