ءاز ناۋرىز قۇت-بەرەكە اكەلسىن!
كەشە استانادا قازاقستان, رەسەي, بەلارۋس مەملەكەتتەرى باسشىلارىنىڭ ءۇشجاقتى كەزدەسۋى بولىپ ءوتتى. وسى باسقوسۋ قارساڭىندا قازاقستان پرەزيدەنتى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى. كەزدەسۋ بارىسىندا مەملەكەتتەر باسشىلارى ساۋدا-ەكونوميكالىق, ينۆەستيتسيالىق, ترانزيتتىك-كولىكتىك ىنتىماقتاستىقتىڭ باسىمدىعى بار سالالارىن قاراستىردى. قازاقستان مەن رەسەي پرەزيدەنتتەرى, سونداي-اق, حالىقارالىق جانە وڭىرلىك كۇن تارتىبىندەگى وزەكتى ماسەلەلەرگە توقتالدى. نۇرسۇلتان نازارباەۆ ءوزارا ءىس-قيمىلدىڭ قازىرگى احۋالى مەن ەكىجاقتى قارىم-قاتىناستاردىڭ ودان ءارى دامۋ جايىن تالقىلاۋ ءۇشىن بۇل كەزدەسۋدىڭ ماڭىزدىلىعىن اتاپ ءوتتى.
– الدا الۋان ءتۇرلى وقيعالار تۇر, سونىڭ ەڭ باستىسى – ۇلى وتان سوعىسىنداعى جەڭىستىڭ 70 جىلدىعى. سونىمەن قاتار, ءبىزدىڭ ەلىمىز تمد-عا توراعالىق ەتەدى, سوعان بايلانىستى استانادا دوستاستىق مەملەكەتتەرى باسشىلارىنىڭ كەزدەسۋى وتەتىن بولادى. بۇدان بولەك, قازاقستان مەن رەسەيدىڭ وڭىرارالىق ىنتىماقتاستىعى فورۋمىن وتكىزۋ جوسپارلانعان. جالپى, ەكىجاقتى ءىس-قيمىلدىڭ كوپتەگەن ماسەلەلەرى تيىسىنشە شەشىلۋدە, – دەدى قازاقستان مەملەكەتىنىڭ باسشىسى.
قازاقستان پرەزيدەنتى ءۇش مەملەكەت باسشىسىنىڭ كەزدەسۋى وڭىردە جانە الەمدە بولىپ جاتقان وقيعالار جونىندە پىكىر الماسۋعا, سونداي-اق, جاھاندىق ەكونوميكاداعى داعدارىس كورىنىستەرىنە قارسى تۇرۋ شارالارىن پىسىقتاۋعا مۇمكىندىك بەرەتىنىن ايتىپ ءوتتى.
ۆلاديمير پۋتين ۇشجاقتى كەزدەسۋ وتكىزۋ تۋرالى باستاماسى ءۇشىن نۇرسۇلتان نازارباەۆقا العىسىن ءبىلدىردى.
– ءبىز ءۇشىن جاقىن سەرىكتەس جانە وداقتاستىڭ ءبىرى بولىپ سانالاتىن قازاقستانعا ءاردايىم زور ىقىلاسپەن كەلەمىن. الەمدىك ەكونوميكاداعى احۋال وڭاي بولىپ تۇرعان جوق. قازاقستاندا جانە بۇكىل پوستكەڭەستىك كەڭىستىكتە, سونىڭ ىشىندە, ءسىزدىڭ تىكەلەي قاتىسۋىڭىزبەن قۇرىلىپ جاتقان ەكونوميكا مەن الەۋمەتتىك سالا جۇمىسىنىڭ نەگىزدەرى قيىندىقتاردى ەڭسەرۋگە سەپتىگىن تيگىزەدى دەپ سەنەمىن. ارينە, ءبىز مۇنى بۇدان بۇرىنعى جىلدارداعىداي بىرلەسىپ اتقارساق, بۇگىنگى قالىپتاسقان قيىن جاعدايدان وڭاي شىعا الامىز, – دەدى رەسەي پرەزيدەنتى.
كەزدەسۋ بارىسىندا قازاقستان مەن رەسەيدىڭ اراسىنداعى ساۋدا-ەكونوميكالىق قاتىناستاردىڭ بىرقاتار ماسەلەلەرى تالقىلاندى.
سونداي-اق, الەمدىك ەكونوميكالىق داعدارىس تۋدىرعان قيىندىقتاردى ەڭسەرۋ ماسەلەلەرى تۋرالى دا ءسوز بولدى. بىزگە بەلگىلى بولعانىنداي, قازاقستان مەن رەسەيدىڭ سىرتقى ەكسپورتىنىڭ وزەگىن قۇرايتىن مۇناي مەن گاز باعالارىنىڭ الەمدىك رىنوكتا قۇلدىراۋى ەلدەر ەكونوميكاسىنا كەرى اسەرىن تيگىزۋدە. وسىنىڭ ىقپالىندا ەكى ەلدىڭ اراسىنداعى ءوزارا ساۋدا كولەمىنىڭ تومەندەگەندىگى بايقالادى. جالپى, بۇل قۇبىلىس بارلىق ەلدەر اراسىنداعى ەكونوميكالىق قاتىناستارعا ءتان پروبلەما بولىپ وتىر. كەزدەسۋ بارىسىندا قازىرگى كەزەڭنىڭ وسىنداي كۇردەلى دە توسىن پروبلەمالارىن بىرلەسە وتىرىپ ەڭسەرۋ ماسەلەلەرى باستى اڭگىمە ارقاۋىنا اينالدى.
سۇڭعات ءالىپباي,
«ەگەمەن قازاقستان».
