– اسقاربەك مارات ۇلى, جىل سايىن قىركۇيەك ايىنىڭ سوڭعى جەكسەنبىسى ەڭبەك كۇنى رەتىندە اتالىپ وتىلەدى. ەڭبەك ارداگەرلەرى مەن وزاتتارعا قۇرمەت كورسەتىلەدى. اق ادال ەڭبەگىمەن ەلدىڭ وركەندەۋىنە ۇلەس قوسىپ جۇرگەن ازاماتتار ءاردايىم ماراپاتقا لايىق.
– دۇرىس ايتاسىز, 2014 جىلدان بەرى قىركۇيەك ايىنىڭ سوڭعى جەكسەنبىسى ەڭبەك كۇنى مەرەكەسى تويلانىپ, اتالىپ وتەدى. مۇنداي مەرەكە, ياعني ەڭبەك ادامدارىن قۇرمەتتەۋ الەمنىڭ 100-دەن استام ەلىندە بار. ەڭبەك جانە حالىقتى الەۋمەتتىك قورعاۋ مينيسترلىگى اتاۋلى كاسىبي مەرەكەگە وراي جىلدا رەسپۋبليكالىق فورۋم ۇيىمداستىرادى. بيىل دا بۇل يگى باستاما جالعاسىن تاۋىپ, 27 قىركۇيەكتە اۋقىمدى ءىس-شارا بولادى. فورۋم اياسىندا ۇزاق جىل جەمىستى جۇمىس ىستەپ, زەينەتكەرلىككە شىققان ەڭبەك ارداگەرلەرى, ءوز سالاسىنىڭ وزاتتارى, بىلىكتى تالىمگەرلەر مەملەكەتتىك ناگرادالارمەن ماراپاتتالادى.
– وسى جىلدىڭ باسىندا «ەڭبەك جولى» كونكۋرسى باستالىپ ەدى. قورىتىندىسى قاشان جاريالانادى؟
– بۇل كونكۋرس ەكى كەزەڭدە ۇيىمداستىرىلادى. الدىمەن 17 وبلىس, 3 قالادا ىرىكتەۋ ءوتتى. جەرگىلىكتى اتقارۋشى ورگاندار شىلدە ايىنا دەيىن ءار ايماقتاعى ىرىكتەۋ كەزەڭىن وتكىزدى. كونكۋرس جەڭىمپازدارى ءۇش نوميناتسيا بويىنشا انىقتالادى. «ۇزدىك ەڭبەك ديناستياسى» اتالىمىندا ءار سالاداعى ءوز ماماندىعىن عاسىردان جالعاپ, اكەدەن بالاعا ميراس ەتىپ كەلە جاتقان جاندار ماراپاتتالادى. «ۇزدىك تالىمگەر» نوميناتسياسىندا جاستاردى ەڭبەككە باۋلىپ جۇرگەن تالىمگەرلەردىڭ اراسىنان دارا شىققاندارى قۇرمەتكە بولەنەدى. ال «ۇزدىك جاس ءوندىرىس جۇمىسكەرى» اتالىمىندا اتاۋى ايتىپ تۇرعانداي, ءوندىرىس سالاسىنداعى دارىندى جاستاردىڭ العىرلىعى, بىلىكتىلىگى باعالانادى. جالپى بيىلعى كونكۋرسقا 505 ءوتىنىم ءتۇستى. سولاردىڭ اراسىنان ىرىكتەلگەن 66 ۇمىتكەردىڭ ەڭبەكتەرى رەسپۋبليكالىق كوميسسيانىڭ قاراۋىنا جىبەرىلدى. ەڭبەك جانە حالىقتى الەۋمەتتىك قورعاۋ مينيسترلىگىندەگى رەسپۋبليكالىق كوميسسيا ونىڭ ىشىنەن 20 ۇمىتكەردىڭ ءوتىنىمىن ىرىكتەپ الادى. كوميسسيا قۇرامىندا مينيسترلىك وكىلدەرى, پارلامەنت دەپۋتاتتارى, قاۋىمداستىقتىڭ وكىلدەرى, الەۋمەتتىك سالاداعى ۇيىمداردىڭ ماماندارى بار. جەلتوقسان ايىندا «جۇمىسشى ماماندىقتار جىلىن» قورىتىندىلاۋ شاراسىندا وسى كونكۋرستىڭ جەڭىمپازدارى دا انىقتالىپ, ماراپاتتالادى.
اڭگىمەلەسكەن –
قۋانىش نۇردانبەك ۇلى,
«Egemen Qazaqstan»
