فوتو: اشىق دەرەككوز
سوڭعى جىلدارى وسى باعىتتا ايتارلىقتاي جۇمىستار جۇرگىزىلىپ جاتىر. اسىرەسە جايىلىمداردى سۋلاندىرۋعا ەرەكشە ءمان بەرىلىپ وتىر. ماڭعىستاۋ وبلىستىق اۋىل شارۋاشىلىعى باسقارماسىنىڭ دەرەگىنشە, 2022 جىلى 21 قۇدىق قازىلىپ, وعان 119,7 ملن تەڭگە سۋبسيديا بولىنگەن. 2023 جىلى تاعى 22 قۇدىققا 129,3 ملن تەڭگە قاراجات قارالسا, 2024 جىلى ءبىر قۇدىققا 3,5 ملن تەڭگە بولىنگەن. وسىلايشا سوڭعى ءۇش جىلدا 47 قۇدىققا جالپى 238 ملن تەڭگە مەملەكەتتىك قولداۋ كورسەتىلگەن.
بيىلدان باستاپ «جايىلىمداردى سۋلاندىرۋ ينفراقۇرىلىمىن قۇرۋ جانە مال ءوسىرۋشى شارۋاشىلىقتاردى سۋمەن قامتاماسىز ەتۋ» جوباسى اياسىندا شارۋالارعا بۇرىنعىدان دا كوپ مۇمكىندىك بەرىلمەك. بۇعان دەيىن قۇدىق قازۋعا كەتكەن شىعىننىڭ 50 پايىزى وتەلەتىن بولسا, ەندى بۇل كورسەتكىش 80 پايىزعا دەيىن ۇلعايماق.
قازىرگى ۋاقىتتا وبلىستا يەسىز 546 قۇدىق تىركەلگەن. سونىڭ 503-ءى اۋدان اكىمدىكتەرىنىڭ تەڭگەرىمىندە. اۋداندار بويىنشا ءبولىنىسى: بەينەۋ – 61, قاراقيا – 5, ماڭعىستاۋ – 430, مۇنايلى – 2, تۇپقاراعان – 5 قۇدىق. قالعان 43 قۇدىقتى زاڭداستىرۋ جۇمىستارى جۇرگىزىلۋدە, وعان جەرگىلىكتى بيۋدجەتتەن 6,9 ملن تەڭگە قاراستىرۋ جوسپارلانعان.
ماڭعىستاۋ ءۇشىن قۇدىق – تەك سۋ كوزى ەمەس, بۇكىل تىرشىلىكتىڭ نەگىزگى تىرەگى. ەل مەن مالعا ءومىر بەرەتىن, ايماقتىڭ ەڭ باستى قازىناسى. قاتال كليمات جاعدايىندا جەراستى سۋىن يگەرۋ قازىرگى كۇننىڭ عانا ەمەس, بولاشاقتىڭ دا ماڭىزدى مىندەتى. مەملەكەتتىڭ كورسەتىپ وتىرعان قولداۋى اۋىل شارۋاشىلىعىمەن اينالىساتىن ادامدارعا سەنىم بەرەدى جانە الداعى كۇنگە دەگەن ءۇمىتىن ارتتىرادى.
