كاسىپورىندا وزىق تاجىريبە مەن جوعارى تەحنولوگيالار نەگىزىندە جۇمىس ىستەيتىن جىلجىمالى تۋننەلدى پەش جۇيەسى قولدانىلادى. جوبا سوڭعى ۇلگىدەگى يننوۆاتسيالىق تەحنولوگيامەن جابدىقتالعان. ءوندىرىس ۇدەرىسى تولىعىمەن اۆتوماتتاندىرىلعان. زاۋىت ەكولوگيالىق جاعىنان دا ءتيىمدى. كىرپىش كۇيدىرۋ ءۇشىن گاز پايدالانىلادى. بۇل اتموسفەراعا بولىنەتىن زياندى قالدىقتاردىڭ مولشەرىن ازايتىپ, قورشاعان ورتاعا تۇسەتىن سالماقتى جەڭىلدەتەدى.
– مەملەكەت باسشىسى «جەرگىلىكتى ءونىم وندىرۋشىلەردىڭ الەۋەتىن بارىنشا پايدالانۋ ماڭىزدى. مەملەكەت وتاندىق ءونىم وندىرۋشىلەردى قولدايدى», دەپ اتاپ وتكەن ەدى. بۇل باعىتتا تۇركىستان وبلىسىندا جۇيەلى جۇمىس اتقارىلىپ جاتىر. بۇگىندە قىسقا مەرزىمدە سالىنىپ, ىسكە قوسىلعان زاۋىتتىڭ ناقتى ءونىمىن كورىپ وتىرمىز. بۇل – جەرگىلىكتى اتقارۋشى ورگاننىڭ, ينۆەستورلاردىڭ جانە بارلىق مۇددەلى تاراپتىڭ ءتيىمدى ءىس-قيمىلىنىڭ ناتيجەسى. ءوندىرىس شاعىن جانە ورتا بيزنەستىڭ دامۋىنا, سالىق تۇسىمدەرى مەن جەرگىلىكتى بيۋدجەتتىڭ نىعايۋىنا ۇلەس قوسادى. كاسىپورىن وبلىسىمىزداعى قۇرىلىس سالاسىنىڭ دامۋىنا سەرپىن بەرەتىن ماڭىزدى نىسان بولاتىنىنا سەنىمدىمىن. وسى باعىتتاعى جوبالارعا وبلىس اكىمدىگى تاراپىنان الداعى ۋاقىتتا دا جان-جاقتى قولداۋ كورسەتىلەدى, – دەدى وبلىس اكىمى نۇرالحان كوشەروۆ.
وسى اۋدانداعى قاراقۇم اۋىلىندا سۋارۋ جۇيەلەرىنە ارنالعان پارابولالىق بەتون لوتوكتار شىعاراتىن ءوندىرىس تە ىسكە قوسىلدى. «تۇران سۋ» مەملەكەتتىك كوممۋنالدىق كاسىپورنى بازاسىندا ىسكە قوسىلعان ءوندىرىس ورنى شىعاراتىن پارابولالىق لوتوكتاردىڭ كانالدارعا ورناتىلۋى سۋ شىعىنىن 40%-عا دەيىن ازايتۋعا مۇمكىندىك بەرەدى. جاڭا ءوندىرىس الاڭىندا تاۋلىگىنە 45 دانا پارابولالىق بەتون لوتوك جاسالادى. جوبا قۇنى – 350 ملن
تەڭگە.
زاۋىتتا 20 تۇراقتى جۇمىس ورنى قۇرىلدى. لوتوكتار لر6, لر8, لر10 ماركالارىندا شىعارىلىپ, بولاشاقتا ىشكى نارىقپەن قاتار ەۋروپا ەلدەرى مەن قىتايعا ەكسپورتتالۋى مۇمكىن. زاۋىت بەتون ارالاستىرۋ قوندىرعىسى, بۋ قازاندىعى, پورتالدى كران, ارماتۋرالى سەتكا توقۋ جابدىقتارىمەن تولىق جابدىقتالعان. وندىرىلەتىن قۇرىلعىلاردىڭ نارىقتاعى باعادان 20-30%-عا ارزان بولۋى – جەرگىلىكتى شارۋالار مەن سۋ شارۋاشىلىعى قۇرىلىمدارى ءۇشىن ۇلكەن جەڭىلدىك.
«تۇران سۋ» – ستراتەگيالىق نىسانداردى باسقاراتىن ماڭىزدى كاسىپورىن. كاسىپورىن تەڭگەرىمىندە 20 سۋقويماسى, 3 سۋ تورابى, 1 400 شاقىرىمدى قامتيتىن 110 كانال, 3 وندىرىستىك-تەحنيكالىق بازا, 81 ارنايى تەحنيكا بار.
وبلىس اكىمدىگىنىڭ قولداۋىمەن سۋ شارۋاشىلىعىن جاڭعىرتۋ باعىتىندا 3,6 ملرد تەڭگەگە 60 ارنايى تەحنيكا ساتىپ الىندى, ونىڭ ىشىندە, 24 تەحنيكا اۋدان, قالا اكىمدىكتەرىنە بەرىلىپ, 1 200 شاقىرىم كانالدار مەن قاشىرتقىلار تازالاندى. 650 ملن تەڭگەگە «سۋ ۇنەمدەۋ تەحنولوگياسى ءوندىرىس جەلىسى» ىسكە قوسىلدى. ول جىلىنا 9 مىڭ گەكتار ەگىستىككە قىزمەت كورسەتەدى.
تۇركىستان وبلىسى
