سۋرەتتى تۇسىرگەن – ءلاززات شاعاتاي
ءسابيىن ايالاي كوتەرگەن انانىڭ ساۋلەتتى بەينەسى ورال قالاسىنداعى جاس جۇبايلاردىڭ نەكەسىن قياتىن سالتانات سارايى الدىنا ورناتىلدى. ەسكەرتكىشتىڭ اۆتورى – استانالىق ءمۇسىنشى بولاتبەك سالاەۆ بولسا, قارجىلاي قولداعان – ورال قالالىق ءماسليحاتىنىڭ دەپۋتاتى, كاسىپكەر, «پريوريتەت» كومپانياسىنىڭ باسشىسى جاننا كەنجينا.
– بۇل ەسكەرتكىش جوباسى وبلىستىق ىسكەر ايەلدەر قاۋىمداستىعىنىڭ 30 جىلدىعىنا وراي جۇزەگە استى. ەكى جىل بۇرىن وتكەن فورۋمدا وڭىرگە بەلگىلى ۇستاز شالقىما حايروللاقىزى, اقىن اقۇشتاپ باقتىگەرەيقىزى ء«بىزدىڭ قالاعا انا وبرازىن اشاتىن, كۇللى قازاق اناسىنا تاعزىم ەتەتىن ءبىر ەڭسەلى ەسكەرتكىش كەرەك-اق» دەگەن يدەيا كوتەرگەن بولاتىن. ارينە, بۇل ۇسىنىستى ءبىز, ىسكەر ايەلدەر قاۋىمداستىعى بىردەن قولدادىق. مىنە, ەكى جىل بويى جوسپارلاپ, بۇگىن جۇزەگە اسىرىپ وتىرمىز, – دەيدى قاۋىمداستىق جەتەكشىسى جانسۇلۋ مەڭەشقىزى.
– بۇگىن بارشامىز ءۇشىن جۇرەككە جاقىن, ەرەكشە ءسات بولدى! ەسكەرتكىشتىڭ ءدال وسى جەردە تۇرۋىنا قولداۋ بىلدىرگەن وبلىس پەن قالا اكىمدىگىنە, ىسكەر ايەلدەر قاۋىمداستىعىنىڭ باسشىسى جانسۇلۋ مەڭەشقىزىنا العىس بىلدىرەمىز. پەرزەنت ءۇشىن انادان اياۋلى جان جوق. بىزگە عالامنىڭ جارىعىن سىيلاعان اياۋلى جاندارعا شىنايى قۇرمەتىمىزدى سوزبەن ەمەس, ىسپەن بىلدىرگەندى ءجون كوردىك. وسى ءىس ارقىلى ۇرپاققا ۇلگى بولعىمىز كەلدى, – دەيدى كاسىپكەر جاننا تاجىعۇلقىزى.
ورالداعى قالا كۇنى مەرەكەسى اياسىندا اشىلعان ەسكەرتكىش سالتاناتى «ەڭبەگى جانعان ارۋلار» اتتى ىسكەر ايەلدەر فورۋمىنا جالعاستى. جيىندا ءسوز العان پەداگوگيكا عالىمدارىنىڭ دوكتورى, پروفەسسور شالقىما قۇرمانالينا: «بۇل ءجاي ەسكەرتكىش ەمەس, بۇل دومالاق انادان باستاپ, بارلىق انالارعا ارنالعان قۇرمەت, تاعزىم» دەپ باعالادى. ماعىنالى ءمۇسىننىڭ نەكە سارايى الدىندا تۇرۋى ايەل, انا بەينەسىن, وتباسى قۇندىلىعىن ارتتىرا تۇسەدى.
باتىس قازاقستان وبلىسى
