سۋرەتتى تۇسىرگەن – ەرلان ومار, «EQ»
استانادا جالپىحالىقتىق سەنبىلىك «تازا قازاقستان. استانا – تازالىق پەن ءتارتىپتىڭ ۇلگىسى» ەكولوگيالىق ايلىعى اياسىندا ءوتتى. سەنبىلىككە 100 مىڭنان استام قالا تۇرعىنى, ەڭبەك ۇجىمدارى, بەلسەندى, بەدەلدى ازاماتتار جۇمىلدى. ولار 12 مىڭعا جۋىق اۋلانى تازالاپ, 2 مىڭ توننا شاماسىندا قوقىس شىعاردى. 162 ساياباق پەن 41 تاريحي-مادەني مۇرا نىسانىن اجارلاندىرۋعا كۇش سالىپ, 3 مىڭعا جۋىق اعاش ەكتى. وسى كۇنى قالادا سانيتارلىق تازالاۋ جۇمىسى قاتار ءجۇردى. نوسەر, ارىق جەلىلەرى, كوشە, جۇرگىنشىلەر جولى مەن اۋلالار تازارتىلدى. اۋلالارعا بالالارعا ارنالعان ويىن, سپورت الاڭدارى ورناتىلدى. قوعامدىق ورىندارداعى تاس توسەنىشتەر, جيەكتاس پەن شاعىن ساۋلەتتىك نىساندار قايتا قالپىنا كەلتىرىلدى. ماۋسىمدىق اگروتەحنيكالىق جۇمىستار دا نازاردان تىس قالمادى. جاسىل جەلەكتەردى كۇتىپ-باپتاۋ, ساۋدا نىساندارىنىڭ ماڭىن تازالاۋ, رۇقساتسىز قوقىس ۇيىندىلەرىن جويۋ سىندى جۇمىس جۇرگىزىلدى.
«بايقوڭىر» اۋدانىنا قارايتىن ج.تاشەنوۆ كوشەسىنىڭ بويىنداعى گۇلزاردى اباتتاندىرۋعا 160 ادام كەلدى. ولاردىڭ اراسىندا ەلورداداعى «بەلسەندى ۇزاق ءومىر ءسۇرۋ ورتالىعىنىڭ» ارداگەرلەرى, «بايقوڭىر» اۋدانى اكىمى اپپاراتىنىڭ قىزمەتكەرلەرى, اۋداننىڭ بەلسەندى تۇرعىندارى, Esil University مەن «تۇران» كوللەدجىنىڭ ستۋدەنتتەرى بولدى. جينالعاندار گۇلزار اۋماعىنا 100 ءتۇپ اعاش ەگىپ, قوقىسىن تازالادى. بۇرىنىراقتا گۇلزاردىڭ ورنى بوس جاتاتىن, قازىردە قىلقان جاپىراقتى اعاشتار, قاراعاي, قايىڭى, وزگە دە كوشەتتەرى جايقالعان جاسىل ايماققا اينالىپ كەلەدى. كوكتەمدە مۇندا 500-دەن استام اعاش ەگىلسە, وتكەن اپتادا تاعى 50 اعاش وتىرعىزىلدى.
ەسىل اۋدانىنىڭ «پريگورودنىي» تۇرعىن الابىندا اكتسياعا قاتىسۋشىلار 700-دەن استام اعاش ەكتى. ونىڭ ىشىندە قاراعاش, تال, تەرەك, مامىرگۇل, ەمەن كوشەتتەرى بار. شارۋانى ۇيلەستىرۋگە جەرگىلىكتى تۇرعىندار, شاعىن جانە ورتا بيزنەس, پاتەر يەلەرى كووپەراتيۆتەرى, م ۇلىك يەلەرى بىرلەستىكتەرى, دەنساۋلىق ساقتاۋ, سپورت, مادەنيەت, ءبىلىم سالاسىنىڭ قىزمەتكەرلەرى, مەملەكەتتىك ورگاندار مەن قوعامدىق ۇيىم وكىلدەرى, سپورتشىلار, مۇعالىمدەر قاتىستى.
سول سەكىلدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 400 ستۋدەنتى «جەرۇيىق» ساياباعىندا, قالانىڭ مادەنيەت باسقارماسى, وعان قاراستى مەكەمەلەردىڭ قىزمەتكەرلەرى ە.راحماديەۆ اتىنداعى مەملەكەتتىك اكادەميالىق فيلارمونيا اۋماعىندا, ەلوردا سپورتشىلارى «عاشىقتار ساياباعىندا» تازالىق جۇمىسىن جۇرگىزدى. «عاشىقتار ساياباعىنداعى» سەنبىلىككە 100-دەن استام سپورتشى, باپكەر, سپورت مەكتەپتەرىنىڭ ۇجىمدارى قاتىستى. ولاردىڭ اراسىندا بوكستان ەكى دۇركىن الەم چەمپيونى سانجار تاشكەنباي, اۋىر اتلەتيكادان جاستار اراسىنداعى ازيا چەمپيوناتىنىڭ كۇمىس جۇلدەگەرى اڭسار تۇرسىنبەك, ازيا چەمپيونى, بىرنەشە دۇركىن ەلىمىزدىڭ چەمپيونى ۆەنەرا جاقسىباەۆا, پاريج پاراليمپياداسىنىڭ كۇمىس جۇلدەگەرى ەرعالي شامەي, ازيا چەمپيوناتىنىڭ كۇمىس جۇلدەگەرى نيكول تسەنگەل سىندى ساڭلاقتار بولدى.
ەلوردادا «تازا قازاقستان. استانا – تازالىق پەن ءتارتىپتىڭ ۇلگىسى» ۇرانىمەن ءوتىپ جاتقان ەكولوگيا ايلىعى 13 قىركۇيەك – 11 قازان ارالىعىندا جالعاسادى. ەكواكتسيانىڭ باستى ماقساتى – قالا كوشەلەرىنىڭ تازالىعىن ساقتاۋعا قوعام نازارىن اۋدارىپ, تۇرعىندار اراسىندا ەكولوگيالىق مادەنيەت قالىپتاستىرۋ.
