20 قىركۇيەكتە دۇنيەجۇزىلىك تازالىق كۇنى اتالىپ وتەدى. «جۇمىسشى ماماندىقتارى اللەياسىنىڭ» اشىلۋى وسى اتاۋلى كۇنمەن تۇسپا-تۇس كەلگەن سوڭ, جۇمىسشىلار مەن قالا تۇرعىندارى بىرلەسىپ اعاش كوشەتتەرىن وتىرعىزدى. ونىڭ ىشىندە «استانا تازالىق» سەرىكتەستىگى, قۇرىلىس كومپانيالارى, سۋعا, جىلۋعا, جارىققا جاۋاپتى مەكەمەلەر, باسقا دا ەڭبەك ۇجىمدارىنان ۇزىن-سانى 500-گە جۋىق جۇمىسشى بولدى. اللەيا تەمىربەك جۇرگەنوۆ پەن ماعجان جۇماباەۆ كوشەسىن جالعايدى. اۋدانى – 1 گا. نەگىزى وسى اۋماققا جاڭا اللەيا سالۋ تۋرالى ۇسىنىستى قالا اكىمىمەن كەزدەسۋدە اۋدان تۇرعىندارى العا تارتىپتى. ەندى مىنە, تۇرعىنداردىڭ تىلەگى ورىندالدى. سارايشىق اۋدانىنىڭ اكىمى ماقسات سامات ۇلىنىڭ ايتۋىنشا, اللەيانى اباتتاندىرۋعا ءۇش ايعا جۋىق ۋاقىت كەتكەن.
– سارايشىق قالاداعى ەڭ جاس اۋدان بولعانىنا قاراماستان, كوركەيىپ كەلەدى. بۇگىن اللەياعا 400-دەن استام اعاش كوشەتتەرى, گۇلزارلار ەگىلدى. «تازا قازاقستان» اكتسياسى اياسىندا اپتا سايىن سەنبىلىكتەر ءوتىپ تۇرادى. تۇرعىندار دا اباتتاندىرۋعا, تازالالىققا قول ۇشىن سوزىپ ءجۇر. اۋداندا جىل باسىنان بەرى 5000-عا جۋىق اعاش ەگىلدى, تاعى 5 مىڭ اعاشتى جاقىن ارادا ەگەمىز, – دەدى ماقسات سامات ۇلى.
اللەيانى اباتتاندىرۋعا كەلگەن جۇمىسشىلار قاتارىندا «استانا تازالىق» سەرىكتەستىگىندە جۇرگىزۋشى بولىپ جۇمىس ىستەيتىن قۋانىش نيازبەك تە بار.
– تازالىققا جاۋاپتى مەكەمەدە 1999 جىلدان بەرى جۇمىس ىستەيمىن. بەرىدە مەكەمەلەر جەكەشەلەنىپ, «استانا تازالىق» سەرىكتەستىگىنە وتتىك. وسىندا ءجۇرىپ قۇم توگەتىن «زيل», «كاماز» كولىكتەرىن جۇرگىزدىم, قازىر كوشە سىپىراتىن كولىكتى تىزگىندەپ ءجۇرمىن. ەكى كوشەنى جالعايتىن اللەيا دەمدە ادام تانىماستاي وزگەرىپ شىعا كەلدى. اللەيانىڭ اشىلۋى – جۇمىسشى ماماندىقتارىندا تەر توگىپ جۇرگەن ادامدارعا قۇرمەتتىڭ بەلگىسى, – دەدى قۋانىش نيازبەك.
تۇرعىندار بۇل كۇنى اللەيا ماڭىندا قاز-قاتار تىزىلگەن عيماراتتاردىڭ قاسبەتىنەن جۇمىسشى ماماندىق يەلەرىنە ارنالعان مۋرالدى, فوتوكورمەنى, قۇرىلىس تەحنيكالارىن تاماشالادى. مەرەكە اياسىندا «ەڭبەك جولى» بايقاۋىنىڭ جەڭىمپازدارى ماراپاتتالىپ, سوڭى كونتسەرتتىك باعدارلاماعا ۇلاستى.
