ەڭبەك جولىن اۋداندىق باسىلىمنان باستاعان جاقسىلىق شايمان ۇلى وبلىستىق «سىر بويى» گازەتىنىڭ باس رەداكتورى بولعان تۇستا ءداستۇرلى ءباسپاسوزدى زامان تالابىنا بەيىمدەپ, جاڭا باعىتقا جول اشتى. قازاقستان جازۋشىلار جانە جۋرناليستەر وداعىنىڭ وڭىردەگى فيليالىن باسقارىپ, قالامى قۋاتتى تالاي جانعا قولداۋ تانىتتى.
كونفەرەنتسيادا «سىر بويى» گازەتىنىڭ باس رەداكتورى, جۋرناليستەر وداعى وبلىستىق فيليالىنىڭ توراعاسى قۋات شارابيدينوۆ قالامگەر رۋحىنا قۇرمەت كورسەتۋ ماقساتىندا ۇيىمداستىرىلىپ جاتقان ءىس-شارالار جايلى ايتىپ ءوتتى. ال وبلىستىق قوعامدىق دامۋ باسقارماسى باسشىسىنىڭ ورىنباسارى ارتۋر قامباروۆ بايانداماسىن جاقسىلىق شايمان ۇلىنىڭ ءوز ءداۋىرىنىڭ شەجىرەسىن شىنايى جازعاندىعىنان باستادى. حالىقارالىق «الاش» ادەبي سىيلىعىنىڭ لاۋرەاتى قارشىعا ەسىمسەيىتوۆا جازۋشى شىعارماشىلىعىنا توقتالدى. قورقىت اتا اتىنداعى قىزىلوردا ۋنيۆەرسيتەتىنىڭ اعا وقىتۋشىسى اياگوز ابدىرازاقوۆا ءوڭىر جۋرناليستيكاسىندا قولتاڭباسى قالعان كورنەكتى قالامگەردىڭ شىعارماشىلىعىنا تولىمدى تالداۋ جاسادى.
قالامداس ءىنىسى دۇيسەنبەك اياش ۇلى وبلىستىق گازەتتى باسقارعان جىلدارى جاقسىلىق راحماتۋللانىڭ گازەت جانىنان نارىق سۇرانىسىنا ساي بىرنەشە قوسىمشا شىعارىپ, ءوزىن-ءوزى قارجىلاندىرۋ ءادىسىن ءساتتى باستاعانىن ايتتى.
كونفەرەنتسيادا قالامگەردىڭ قاتارلاستارى دا ەستەلىكتەر ايتىپ, «سىر بويى» گازەتى رەداكتسياسىنىڭ ۇيىمداستىرۋىمەن جاقسىلىق راحماتۋللانىڭ 80 جىلدىعىنا وراي جاس جۋرناليستەر اراسىندا وتكىزىلگەن «قىزىلوردا – قۇندىلىقتار قالاسى» اتتى شىعارماشىلىق بايقاۋ جەڭىمپازدارى ماراپاتتالدى.
قىزىلوردا
