21 قىركۇيەكتە الماتى پەرزەنتحانالارىندا 69 ءسابي دۇنيەگە كەلدى, ونىڭ 32-ءسى ۇل بولسا, 37-ءسى قىز بالا. وسىلايشا تالاي وتباسى سۇيىكتى قالانىڭ تۋعان كۇنىمەن قاتار پەرزەنتىنىڭ دۇنيەگە كەلگەنىن تويلادى.
«ەندى بۇل مەرەكە ءبىزدىڭ اۋلەت ءۇشىن ەڭ باستى كۇنگە اينالدى. قىزىمىزدىڭ تۋعان كۇنىن بۇدان بىلاي الماتىلىقتارمەن بىرگە تويلايمىز», – دەدى جاس انا قۋانىشىن ءبولىسىپ.
قالانىڭ قوعامدىق دەنساۋلىق ساقتاۋ باسقارماسى ومىرگە كەلگەن بارلىق نارەستە مەن ولاردىڭ انالارىنىڭ جاعدايى جاقسى ەكەنىن حابارلادى.
ال مەرەكە قارساڭىندا قالالىق پەريناتالدىق ورتالىقتا سيرەك ءارى عاجايىپ وقيعا بولدى – ۇشەم دۇنيەگە كەلدى.
سالماعى 1968 گرامم, بويى 42 سانتيمەتر ۇل بالا, ال قالعان ەكەۋى قىز بالا: ءبىرىنىڭ سالماعى 1648 گرامم, بويى 40 سانتيمەتر, ەكىنشىسىنىڭ سالماعى 1699 گرامم, بويى 41 سانتيمەتر. وتباسى «اڭساعان ءسابي» مەملەكەتتىك قولداۋ باعدارلاماسىنا جۇگىنگەن.
دارىگەرلەردىڭ شەشىمىمەن اناسى 32-اپتادا شۇعىل تۇردە بوساندى. سابيلەردىڭ اناسى 30 جاستا.
تاڭعى ءتورت شاماسىندا پەريناتالدىق ورتالىقتىڭ بىلىكتى ماماندارى تەز ارادا جۇمىلىپ, وتا ءساتتى ءوتتى. كەسار تىلىگى ارقىلى دۇنيەگە كەلگەن ساتتەن باستاپ نارەستەلەرگە جەدەل كومەك كورسەتىلىپ, جانساقتاۋدان سوڭ پاتولوگيا بولىمىنە اۋىستىرىلدى.
قالا كۇنى تۋعان 69 ءسابي مەن ۇشەم – ءبىر وتباسىنىڭ قۋانىشى عانا ەمەس, بۇكىل الماتى ءۇشىن ۇلكەن جاڭالىق. ءاربىر جاڭا ءومىر – ەرتەڭگە دەگەن سەنىم, بولاشاققا دەگەن ءۇمىت. بۇل بالالار قالا تاريحىن جالعاستىرىپ, ونىڭ كەلەشەگىن وركەندەتەر جاڭا ۇرپاق.
