بىرنەشە جىل بۇرىن بەلگىلى پيانيست, ەلىمىزدىڭ ەڭبەك سىڭىرگەن قايراتكەرى تيمۋر ۋرمانچەەۆتىڭ ىجداعاتىمەن «FORTE TRIO» ءانسامبلى قۇرىلدى. سكريپكا, ۆيولونچەل جانە فورتەپيانونىڭ ۇندەستىگىمەن العاشقى مۋزىكالىق ۇجىم جاساقتالدى. شىعارماشىلىق توپ الەمدىك ساحنالاردا ونەر كورسەتىپ, كورەرمەن ىقىلاسىنا بولەنە بەردى. سونداي گاسترولدىك ساپار اياسىندا «FORTE TRIO» فرانتسيانىڭ ميۋلۋز قالاسىندا بولدى. بۇل تۋراسىندا ۇجىم جەتەكشىسى تيمۋر ۋرمانچەەۆ بىلاي دەپ ايتادى:
«بۇل قالادا الەمگە ايگىلى كومپوزيتور پەر تيللۋا تۇراتىن. ول ءبىزدىڭ كونتسەرتىمىزگە كەلىپ, تاڭدانىسىن جەتكىزدى. قازاقستانداعى كلاسسيكالىق مۋزىكا دەڭگەيىنە جوعارى باعا بەردى. سول ساتتەن باستاپ ءبىز تىعىز شىعارماشىلىق بايلانىس ورناتتىق. ول تريومىز ارقىلى ۇلى دالانىڭ اۋەن الەمىمەن تانىسا باستادى. حالىق شىعارمالارى مەن حالىق كومپوزيتورلارىنىڭ مۇراسىن زەردەلەي ءتۇستى. ىزدەنىس ىزىمەن ءجۇرىپ ۇلتىمىزدىڭ ۇلىق داناسى حاكىم اباي الەمىنە تاپ كەلدى. ونىڭ سان قىرلى بولمىسى, بيىكتىگى مەن تەرەڭدىگى كومپوزيتور ساناسىنا جاڭاشا ساۋلە ءتۇسىردى», دەيدى ت. ۋرمانچەەۆ. ونىڭ ايتۋىنشا, باتىس الەمى ءۇشىن شىعىس الىمساقتان قىزىق ءھام عاجايىپ مەكەن. پەر تيللۋا دا ابايدىڭ ءومىر مۇراتىنا, كوزقاراس ەرەكشەلىگىنە اڭسار قىلىپ, ارنايى تريوعا ارناپ «اباي ارمانى» اتتى شىعارمانى جازىپ شىققان.
بۇعان دەيىن تۋىندى ەۋروپانىڭ بىرنەشە شاھارى مەن رەسەيدىڭ كراسنويارسك قالاسىندا ورىندالدى. اۆستريالىق ديرەجەر ماريا بەنيۋموۆا: «بۇل قالالارداعى گاسترولدەر حاكىمنىڭ تۋعان ەلىنە دايىندىق دەپ ەسەپتەيمىز. ويشىلدىڭ 180 جىلدىق مەرەيتويىنا تارتۋىمىز دەپ بىلەمىز», دەدى ول.
روزا باعلانوۆا اتىنداعى «قازاقكونتسەرت» ۇيىمىنىڭ باسشىسى التاير قوجاحمەتوۆ كونتسەرتتىك ۇجىم اباي تويىنا جاڭا ىزدەنىسپەن كەلگەنىن جەتكىزدى. «كونتسەرتتىك ۇجىم حاكىم مۇراسىن ءداستۇرلى, ەسترادالىق جانە كلاسسيكالىق باعىتتا ناسيحاتتاۋدى ماقسات ەتەدى. بۇل ادامداردىڭ مۋزىكالىق تالعامىنا ساي ابايدى جان-جاقتى تانىستىرۋعا مۇمكىندىك بەرەدى. بۇعان قوسا اقىننىڭ شىعارماشىلىق زەرتحاناسىن كەشەندى تانىتۋ ءۇشىن, ارناۋلى ءدارىس-كونتسەرتتەر ءوتىپ تۇرادى», دەدى ا.قوجاحمەتوۆ.
