مۇسا جالەل ەسكەرتكىشى اشىلدى

وسكەمەندە تاتار حالقىنىڭ بەلگىلى اقىنى, كەڭەس وداعىنىڭ باتىرى مۇسا جالەلدىڭ ەسكەرتكىشى اشىلدى. تاريحتان بەلگىلى, مۇسا جالەل 1942 جىلى اۋىر جارالانىپ, تۇتقىنعا تۇسەدى. كونتسلاگەردە جاسىرىن توپ قۇرىپ, كەڭەستىك تۇتقىن-جاۋىنگەرلەردىڭ لاگەردەن قاشۋىن ۇيىمداستىرادى. ونىڭ جازعان ولەڭ-جىرلارى تۇتقىنداعى سەرىكتەرىنىڭ اراسىندا كەڭىنەن تارالادى. ول قۇپيا ۇيىم قۇرۋعا قاتىسقانى ءۇشىن پلەتتسەنزەە اسكەري تۇرمەسىندە ءولىم جازاسىنا كەسىلگەن. وبلىس ورتالىعىنىڭ پرو­توزانوۆ پەن قايسەنوۆ كوشەلەرىنىڭ قيىلىسىندا بوي كوتەرگەن ەسكەرتكىشتىڭ اشىلۋ سالتاناتىنا تاتارستان رەسپۋبليكاسىنىڭ مادەنيەت ءمينيسترى ايرات سي­با­عاتۋللين باستاعان مەيماندار كەلدى. دەلەگاتسيا قۇرامىندا «تا­تارستان – جاڭا عاسىر» تەلەارناسىنىڭ ءتۇسىرىلىم توبى دا بار. سونداي-اق, شاراعا ەلىمىزدىڭ پارلامەنت ءماجىلىسىنىڭ دەپۋتاتى سۆەتلانا فەرحو, وبلىس اكىمىنىڭ ورىنباسارى جاقسىلىق ومار, وسكەمەن قالاسىنىڭ اكىمى تەمىربەك قاسىمجانوۆ, وبلىستىق تاتار ەتنومادەني بىرلەستىگىنىڭ جەتەكشىسى عابدۋلحاي ءىشمۇراتوۆ جانە وڭىردەگى تاتار ەتنوسىنىڭ وكىلدەرى قاتىستى. – ەسكەرتكىش قىسقا مەرزىمدە تۇرعىزىلدى. وعان قالاداعى بارلىق ەتنومادەني بىرلەستىكتەر, كاسىپكەرلەر مەن قالانىڭ قارا­پايىم تۇرعىندارى اتسالىستى. ولاردىڭ بارلىعىنا العىس ايتامىز. بۇل – ءبىزدىڭ ەلىمىزدىڭ بىرلىگى مەن دوستىعىنىڭ ايناسى. ءبىز بىرگە بولعاندا بارلىق يگىلىككە قول جەتكىزەمىز! – دەدى شاھار باسشىسى تەمىربەك قاسىمجانوۆ. ەسكەرتكىشتىڭ اشىلۋ راسىمىندە ۇلى وتان سوعىسىنىڭ ەرجۇرەك باتىرى تۋرالى سىر شەرتىلىپ, جاۋىنگەردىڭ جالىندى جىرلارى وقىلدى. اقىننىڭ ءوزى دە جىر جولدارىندا «ولىمنەن كەيىنگى عۇمىر جالعاستىعى ءۇشىن دە ءومىر ءسۇرۋ قاجەت» ەكەنىن ايتىپ كەتتى ەمەس پە؟! ۇلى  جەڭىستىڭ 70 جىلدىق مەرەيتويى اياسىندا بوي كوتەرگەن ەسكەرتكىش تاتار اقىنىنىڭ ەسىمى ءالى ەل ەسىندە ەكەنىن اڭداتتى. اتالعان شارا ەتنواۋىلدا تاتار حالقىنىڭ ۇلتتىق سابانتوي مەرەكەسىمەن جالعاستى. دۋمان اناش, «ەگەمەن قازاقستان». وسكەمەن.