قازاقستان تاريحي جىبەك جولىنىڭ تورابىندا ورنالاسقان ەل عانا ەمەس, سونىمەن قاتار ءارتۇرلى مادەنيەتتەر مەن رۋحانياتتاردىڭ تۇيىسەتىن تۇعىرلى كەڭىستىگىنە اينالدى. مۇندا «دومبىرا مەن گيتارا, ارفا» قاتار ۇندەسىپ, الەمدىك مادەنيەتتەر سيمفونياسىنا اينالىپ وتىر. بۇل – قازاقستاننىڭ مادەني اشىقتىعى مەن رۋحاني بايلىعىنىڭ كورىنىسى.
ء«بىر بەلدەۋ – ءبىر جول» باستاماسى اياسىندا جۇزەگە اسقان حالىقارالىق ءىس-شارالار قازاقستاننىڭ مادەني جانە رۋحاني پلاتفورما رەتىندەگى ءرولىن نىعايتا ءتۇستى. مۇنداي جوبالار وركەنيەتتەر اراسىنداعى ءوزارا بايلانىستى جاڭا دەڭگەيگە كوتەرىپ, ءوزارا قۇرمەت پەن اشىقتىق رۋحىن قالىپتاستىرۋعا باعىتتالعان. بۇل – وسى سەزدىڭ باستى تاقىرىبىمەن تولىق ۇندەسەتىن قۇندىلىقتار.
بۋدديزم الەمدەگى بارلىق نارسە ءبىر-بىرىمەن تىعىز بايلانىستى دەپ ۇيرەتەدى. حريستيان دىنىندە ادامعا جاقسىلىق جاساپ, جاقىنىڭدى وزىڭدەي ءسۇيۋ كەرەك دەيدى. يسلامدا سابىر ساقتاۋ پەن مەيىرىمدىلىك باستى قاسيەتتەردىڭ ءبىرى. ال داوسيزم بولسا, تابيعاتپەن ۇيلەسىمدە ءومىر ءسۇرۋدى ناسيحاتتايدى. وسى دىندەردىڭ ءبارى, ارينە, ارقايسىسى ءوز جولىمەن, ادامداردى ىزگىلىككە, تۇسىنىستىككە جانە بەيبىت ومىرگە شاقىرادى. سوندىقتان بۇل رۋحاني ىلىمدەر دىنارالىق ديالوگ ءۇشىن بەرىك نەگىز قالىپتاستىرادى. ءدىني داستۇرلەر ادامزاتتىڭ ورتاق رۋحاني تاجىريبەسى رەتىندە بىرىگە وتىرىپ, بەيبىت ءومىر مەن كەلىسىمدى قامتاماسىز ەتە الادى.
بۇگىندە ءبىزدى الاڭداتاتىن جاھاندىق پروبلەمالار كليماتتىڭ وزگەرۋى, اشارشىلىق, قاقتىعىستار – بارشامىزعا ورتاق سىن-قاتەرلەر. بۇل ماسەلەلەردى تەك ساياسي نەمەسە تەحنولوگيالىق تاسىلدەرمەن ەمەس, رۋحاني جانە مورالدىق كوزقاراسپەن دە قاراستىرۋىمىز قاجەت. سوندىقتان ءدىن كوشباسشىلارى جاستار تاربيەسىنە, وتباسىلىق جانە ادامگەرشىلىك قۇندىلىقتاردى نىعايتۋعا, مادەني جوبالار اياسىنداعى ىنتىماقتاستىققا ەرەكشە نازار اۋدارۋعا ءتيىس.
ءدىن وكىلدەرى ناسيحاتپەن عانا ەمەس, ناقتى ارەكەتتەرمەن دە ۇلگى كورسەتۋلەرى قاجەت. ءبىز يگى يدەيالاردى ناقتى ىسكە اينالدىرۋىمىز كەرەك. بوس ءسوز ەمەس, شىنايى رۋحاني ەنەرگيا ادامزاتقا ءۇمىت ساۋلەسىن سىيلايدى. سول ارقىلى بەيبىت ومىرگە جول اشىلادى.
بۇل رەتتە قىتاي بۋدداشىلار قاۋىمداستىعى الەمدىك دىندەرمەن بىرلەسە ارەكەت ەتۋگە دايىن ەكەنىن جەتكىزگىم كەلەدى. ءبىز كەلىسپەۋشىلىكتى كەلىسىم كەمەسىنە سالىپ, سەنىمدى جەلكەن ەتىپ, ناقتى ارەكەتتى ەسكەككە اينالدىرساق قانا, ورتاق بەيبىت جانە باقىتتى بولاشاققا جەتە الامىز.
تسزين بو,
قىتاي بۋدداشىلار قاۋىمداستىعى توراعاسىنىڭ ورىنباسارى
