قۇرىلىس باسىنداعى قىزمەتى – ارلەپ-سىرلاۋ پرورابى. سويلەگەندە قانداي جىلدام بولسا, ءىسى دە سونداي شيراق. تالاپشىل باسشى ەكەنى ءتۇر-تۇلعاسىنان-اق كورىنىپ تۇر. كوكشەتاۋدىڭ تۋماسى. وقىعان ماماندىعى – اگرونوم. كەڭەس ۇكىمەتى تۇسىندا كومسومول, پارتيانىڭ جۇمىسىنا ارالاسقان. اۋمالى-توكپەلى كەزەڭدە ەت جاقىندارىنان ايىرىلعان. جەكە ومىرىندەگى اۋىر سىناقتاردى كوتەرە بىلگەن انا جۇمىستىڭ قيىندىعىنا شاعىمدانىپ, مويىعان ەمەس. قولداۋ ءبىلدىرىپ, سەنىم ارتاتىن جاقىن ادامدارى قاسىندا. جۇمىسىنا ۇقىپتى, تىرلىگىنە تياناقتى, باستىسى, ادال نيەتپەن, ەسەلەپ ەڭبەك ەتىپ ءجۇر.
– ەلورداعا عاسىرلار توعىسىندا كەلدىك. ول كەز قالا ەندى-ەندى قالىپتاسىپ, عيماراتتار كوپتەپ سالىنا باستاعان تۇس. تالاي قۇرىلىستىڭ باسى-قاسىندا بولدىق. سىلاپ, سىرلاۋدى ۇيرەندىك. تاجىريبە جيعان سوڭ, وزگەلەرگە ۇيرەتە باستادىق. زامان وزگەردى, زامانمەن بىرگە ەڭبەك نارىعى, ەڭبەككە كوزقاراس جاڭاردى. ءبىز قۇرىلىسقا كەلگەن جىلدارى ءۇيدىڭ ءىشى-سىرتىن سىلاپ, سىرلاۋمەن تۇگەل ايەلدەر اينالىساتىن. ارلەۋ-سىرلاۋمەن اينالىسامىن دەگەنگە قازىر دە جۇمىس كوپ. ءۇي بولعان سوڭ توزباي تۇرمايدى, ونى جوندەۋگە بىلىكتى مامان كەرەك. 25 جىلدىق تاجىريبەمە سۇيەنىپ ايتارىم, قۇرىلىسشى بولۋ دا – ونەر. وعان ەرەكشە ەپ, ىجداعاتتى ىقىلاس كەرەك. شەبەر جۇمىسشىنى كەز كەلگەن كومپانيا ءتاۋىر جالاقى ۇسىنىپ, شاقىرتىپ الادى. ءوزىمنىڭ ءبىر دە جۇمىسسىز جۇرگەن كەزىم بولعان ەمەس. جۇمىس بولسا, ەڭبەكتەن قاشپايمىز, – دەگەن ل.بەكقۇلوۆا ءبىزدى قاسىنا ەرتىپ, ادەتىمەن قۇرىلىس بارىسىن باقىلاۋعا شىقتى.
كەيىپكەرىمىزدىڭ جاسى قازىر 62-دە. ەڭبەگىنە 500 مىڭ تەڭگەدەن جوعارى جالاقى الادى. ءۇيدى ارلەپ-سىرلايتىن بريگادالاردىڭ جۇمىسىن تەكسەرىپ, قابىلدايدى. قاتە-كەمشىن تۇسىن كورە قالسا, تۇزەۋگە, قايتا ىستەۋگە مىندەتتەيدى. كەزەكتى قاباتتىڭ ساپاسىن تەكسەرىپ ءجۇرىپ, اڭگىمە اۋانىن قالاداعى قۇرىلىستاردىڭ ساپاسىنا بۇردى.
– جۇمىستىڭ ساپاسىنا جاۋاپتى بولعان سوڭ قاتە كورسەك, بىردەن ەسكەرتەمىز. ويتكەنى جۇمىستى راستاپ, قۇجاتقا قول قوياتىن ءوزىمىز. ءبىز ايتقاندا كەمشىلىگىن مويىنداپ, لەزدە جۇمىسىن رەتتەۋگە كىرىسەتىن اپتال ازاماتتار بار. سونداعىسى ماعان ەمەس, وزدەرىنە نامىستانادى. ولاردىڭ قولىنان جۇمىستى قاتە ىستەۋ كەلمەيدى. مىقتى قۇرىلىسشى تاربيەلەگەن بالالار العىر, تىرلىگىنە ۇقىپتى بولادى. مەن بىلەتىن ناعىز جۇمىسشى ماماندار سولار. ءوز مىندەتىمىز تۋرالى ايتسام, اۋەلى ءۇيدىڭ قابىرعالارىن سىلايمىز, سىلاعان سوڭ اعارتامىز. ىزىنشە بەتىندەگى كەدىر-بۇدىرىن تەگىستەپ, بويايمىز. قۇرىلىس الاڭىندا 12 قاباتتى ەكى ءۇيدىڭ, 18 قاباتتى ءبىر ءۇيدىڭ ءار قاباتىنا كۇندە ەكى مارتە كوتەرىلەمىن. جۇمىس اۋقىمدى. ءبىر مەزگىلدە 500 ادامنىڭ جۇمىسىن باقىلاعان كەزىمىز بولدى. قۇرىلىستا جۇمىسشى ءبىرىنشى ءادىل, سوسىن شىنشىل بولۋعا ءتيىس. جۇمىستى شالا-جانسار ىستەگەندەردىڭ وتىرىگى ءتۇبى اشكەرە بولادى. ءبىز ونداي ولقىلىقتارعا جول بەرمەيمىز. حالىقتىڭ سەنىمىمەن, قاۋىپسىزدىگىمەن ويناۋعا بولمايدى, – دەيدى ل.بەكقۇلوۆا.
ل.بەكقۇلوۆا استانا قالاسىنداعى ساۋلەتى مەن داۋلەتى كەلىسكەن 50-گە جۋىق عيماراتتىڭ ساپاسىن ءوزى قاداعالاعان. بىرنەشە قۇرىلىس كومپانياسىندا جۇمىس ىستەگەن. زاماننان قالماي, قۇرىلىس سالاسىنداعى جاڭاشىلدىقتارعا, ستاندارتتارعا ىلەسىپ وتىرادى. ءبىز كوتەرىلگەن عيماراتتىڭ بۇرىش-بۇرىشىنىڭ دالدىگىن ارنايى اسپاپتارمەن ءجىتى تەكسەردى. قۇرىلىستىڭ ساپاسىن جاقسارتقان ستاندارتتاردى ءسوز ەتىپ, سونىڭ قانشالىقتى ساقتالعانىن ناقتى كورسەتىپ بەردى. تاجىريبەلى مامان ءوز سوزىندە جىل وتكەن سايىن قۇرىلىس كومپانيالارى دا ساپالى جۇمىس ىستەۋگە داعدىلانىپ كەلە جاتقانىن ايتتى. مۇنىڭ سەبەبىن قۇرىلىس باسشىلىعىنىڭ, تۇرعىنداردىڭ تالابى جوعارىلاعاننان دەپ ءتۇسىندىردى.
– ءاتۇستى جاسالعان جۇمىستى ءۇي تۇرعىندارى قابىلدامايدى. «تام – تۇبىنەن» دەگەن ءسوز بار. تۇرعىن ءۇيدىڭ الدىمەن ىرگەسى بەرىك بولعانى ابزال. ودان كەيىن كىرپىشتىڭ ءتۇزۋ قالانعانى, سىلاقتىڭ ءساتتى شىعۋى, سىرلاۋ جۇمىستارى – ءبارى-ءبارى تۇبىندە ساپاعا اسەر ەتەدى. ساپالى ءۇيدى ادال قۇرىلىسشىلار كوتەرەدى. مىقتى قۇرىلىسشى بولۋ – تاجىريبەدەن. سالادا ەڭبەك ەتىپ ءجۇرىپ, نەبىر شەبەر قۇرىلىسشىلاردى, ينجەنەرلەردى كوردىك. ءالى كۇنگە ماقتاۋىن اسىرىپ, وزگەلەرگە ۇلگى ەتىپ جۇرەمىز. قۇرىلىس سالاسى دامىپ كەلەدى. سوندىقتان وزىمىزدەن كەيىنگىگە بىلگەنىمىزدى ايتىپ, بىلمەگەنىمىزدى ۇيرەنىپ ءجۇرمىز, – دەدى ل.بەكقۇلوۆا.
كەيىپكەرىمىزدىڭ قاپىسىز قارىم-قابىلەتىنە, جىلدار بويعى تاجىريبەمەن كەلگەن شەبەرلىگىنە ءتانتى بولا وتىرىپ, ەل ايتىپ جۇرگەن ەڭبەك ادامىنىڭ شىنايى بەينەسى وسىنداي بولسا كەرەك دەگەن وي قورىتتىق.
