فوتو: ERG
سالتاناتتى ءىس-شارادا ERG تابىستى تاجىريبەسىن بۇكپەسىز كورسەتتى: فورۋمعا قالا تۇرعىندارى, كەنشىلەر, بەلسەندى جاستاردان بولەك, «قازاقمىس», «Qarmet», «قازاتومپروم» سياقتى تاۋ-كەن مەتاللۋرگيا كومپانيالارىنىڭ وكىلدەرى, سونداي-اق مونوقالالاردىڭ اكىمدەرى قاتىستى.
فورۋمعا قاتىسۋشىلاردى قۇتتىقتاي كەلگەن ليساكوۆ قالاسىنىڭ اكىمى اباي يبراەۆ كوپشىلىكتى قالادا جەرگىلىكتى اكىمدىك پەن «ERG» كومپانياسى بىرلەسە وتىرىپ ىسكە اسىرىلعان يگى ىستەر جايىنان حاباردار ەتتى.
«ERG» كومپانياسى ليساكوۆ قالاسىنىڭ الەۋمەتتىك, ەكونوميكالىق دامۋىنا ەرەكشە ۇلەس قوسىپ كەلەدى. ال كومپانيا ىسكە اسىرىپ جاتقان «Tugan Qala» جوباسىنىڭ ماڭىزى ەرەكشە. اتالعان الەۋمەتتىك جوبا اياسىندا قالامىزدا تۇرعىنداردىڭ ۇسىنىسى بويىنشا كوپكە پايداسى تيەتىن ءبىرتالاي جاڭا نىساندار سالىندى. «Tugan Qala» قىسقا مەرزىم ىشىندە ءوزىنىڭ ناعىز حالىقتىق جوبا ەكەنىن دالەلدەپ بەردى», دەدى قالا اكىمى.
ءبىرتالاي جىلدان بەرى رۋدنىي, ليساكوۆ, حرومتاۋ, اقسۋ قالالارى مەن قاشار, وكتيابرسك كەنتتەرىندە جۇزەگە اسىرىلىپ كەلە جاتقان «Tugan Qala» الەۋمەتتىك جوباسىنىڭ باستى ماقساتى – حالىقپەن بىرلەسە وتىرىپ قالانىڭ ينفراقۇرىلىمىن جاقسارتۋ, كەلبەتىن كوركەيتۋ, ءبىلىم مەن مەديتسينا ساپاسىن كوتەرۋ, مادەنيەت پەن بۇقارالىق سپورت تۇرلەرىن دامىتۋ. مۇنىڭ ءبارى حالىقتىڭ قالاۋىمەن عانا ىسكە اسىرىلادى. ياعني, «Tugan Qala» جوباسى اياسىندا «ERG» كومپانياسىنا تۇرعىنداردان سان الۋان ماسەلەگە قاتىستى جۇزدەگەن الەۋمەتتىك جوبا كەلىپ تۇسەدى. كەيىن تۇرعىندار بۇل جوبالاردىڭ ارقايسىنا داۋىس بەرەدى. كومپانيا ەڭ كوپ داۋىس جيناعان جوبالاردى ىرىكتەپ الىپ, وعان قوماقتى قاراجات ءبولىپ, قىسقا مەرزىم ىشىندە جۇزەگە اسىرادى.
مىسالى, سوڭعى 5 جىلدىڭ ىشىندە عانا «ERG» كاسىپورىندارى جۇمىس ىستەپ تۇرعان قالالاردان 1 297 جوبالىق ۇسىنىس تۇسكەن. ونىڭ 423-ءى داۋىس بەرۋگە جىبەرىلىپ, 185 جوبا قالا تۇرعىندارى تاراپىنان قولداۋ تاپقان.
اتالعان باستاما ليساكوۆ قالاسىندا وتكەن جىلى عانا قولعا الىنا باستاعان. سوعان قاراماستان اۋىز تولتىرىپ ايتارلىقتاي دۇنيە كوپ. فورۋمعا كەلگەن 150-دەن استام ادام قالالىق جاعاجايداعى ۆوركاۋت-الاڭى, سپورت الاڭى, ترەناجەرلار بۇرىشى, كوپ قاباتتى ءۇيدىڭ تۇرعىندارى كوپتەن بەرى قول جەتكىزە الماي كەلگەن اۆتوتۇراق, فۋتبول الاڭى ءتارىزدى قالا تۇرعىندارىنىڭ قالاۋىمەن سالىنعان نىسانداردى ارالاپ كوردى.
ماسەلەن, №14-ءشى شاعىن اۋداندا بىرنەشە كوپ قاباتتى ءۇي, 300-گە تارتا جەكە تۇرعىن بار. مۇندا مىڭنان استام ادام تۇرىپ جاتىر. بۇعان دەيىن نە سپورت الاڭى, نە بالالار وينايتىن الاڭقايى بولماي كەلگەن شاعىن اۋداندا تاياۋدا عانا ۆوركاۋت جانە كوشە ترەناجەرلارى بار سپورت الاڭى پايدا بولدى. بۇل الاڭ ءار ءتۇرلى جاستاعى ادامداردىڭ تازا اۋادا سپورتپەن شۇعىلدانىپ, دەنساۋلىعىن نىعايتۋىنا سەپتىگىن تيگىزىپ وتىر. سپورت الاڭىنىڭ جانىنا جەرگىلىكتى اكىمدىك بالالار الاڭقايىن سالىپ بەرگەن. وسىنىڭ ءبارى «Tugan Qala» جوباسىنا قاتىسقان وسى شاعىن اۋداننىڭ قاراپايىم تۇرعىنى الەكساندرا گورباچەۆسكايانىڭ باستاماسىمەن سالىنعان دۇنيە.
«الەۋمەتتىك جاۋاپتى كومپانيا رەتىندە ءبىز قىزمەتكەرلەرىمىزدىڭ جۇمىس جاعدايىن جاقسارتۋعا قوماقتى قاراجات قۇيىپ كەلەمىز. الايدا قىزمەتىمىز مۇنىمەن شەكتەلمەيدى. جۇمىسىمىزدىڭ اۋقىمدى بولىگى قىزمەتكەرلەردىڭ وتباسىنا, ولار تۇرىپ جاتقان قالالاردىڭ ينفراقۇرىلىمىن جاقسارتۋعا باعىتتالعان. قالا تۇرعىندارى تۇگەل بىلە بەرمەۋى دە مۇمكىن, بىراق, «ERG» مەن قوستاناي وبلىسىنىڭ اكىمدىگى اراسىندا بىرلەسكەن الەۋمەتتىك دامىتۋ باعدارلامالارى بار. اكىمدىك پەن «ERG» الەۋمەتتىك ينۆەستيتسيالاردى قايدا باعىتتاپ, قانداي تۇيتكىلدەردى شەشۋ كەرەك دەگەن ماسەلەلەر بويىنشا بىرلەسە قىزمەت ەتەدى. وسى ورايدا, سوناۋ 2017 جىلى الەۋمەتتىك جوبالار بايقاۋىندا ايتىلعان «Tugan Qala» باستاماسى وسىنشالىقتى كەڭ قانات جايعانى ءبىزدى قۋانتادى. 2022 جىلدان بەرى 207 ملن. تەڭگەدەن استام قاراجاتقا 23 جوبا ىسكە استى. سونىڭ 6-ۋى وسى ليساكوۆتا», دەيدى «ERG»-ءدىڭ الەۋمەتتىك قامتاماسىز ەتۋ ءىسى جونىندەگى ديرەكتورى شاتتىق ابدىحالىقوۆ.
فورۋم اياسىندا قالا تۇرعىندارىنا «الەۋمەتتىك جەلىلەردىڭ بيزنەسكە جاردەمى: ساتىلىم جانە ىلگەرىلەتۋ», «كۇندەلىكتى تۇرمىستا جي-ءدى قالاي پايدالانۋ كەرەك؟» دەگەن تاقىرىپتا شەبەرلىك ساباقتارى ءوتتى.
فورۋم سوڭىندا «تۋعان قالام ليساكوۆ» ونلاين بايقاۋىنىڭ جەڭىمپازدارى ماراپاتتالدى.
«ERG» كومپانياسى ەلىمىزدىڭ الەۋمەتتىك ينفراقۇرىلىمىن دامىتۋعا مول ينۆەستيتسيا قۇيىپ كەلەدى. «ERG» كاسىپورىندارى ورنالاسقان وڭىرلەرگە قۇيىلعان الەۋمەتتىك ينۆەستيتسيالاردىڭ كولەمى بۇگىندە 400 ملرد تەڭگەگە جۋىقتاعان.
جالپى «Tugan Qala» جوباسى العاش رەت 2020 جىلى قولعا الىندى. سودان بەرى اتالعان جوبا اياسىندا 144 الەۋمەتتىك نىسان سالىنىپ, ىسكە قوسىلعان. ولاردىڭ قاتارىندا بالالار مەن سپورت الاڭدارى, ارت-نىساندار, ينكليۋزيۆتى جاعاجايلار, شاڭعى روللەر جولى سياقتى جوبالار بار. «Tugan Qala» جوباسى اياسىنداعى باستامالاردى ىسكە اسىرۋعا «ERG» جالپى سوماسى 1,8 ملرد تەڭگەدەن استام قاراجات جۇمساعان.
