كەڭەسكە ۆيتسە-مينيسترلەر, قۇرىلىمدىق بولىمشەلەردىڭ, كوميتەتتەردىڭ جانە ۆەدومستۆوعا قاراستى ۇيىمداردىڭ باسشىلارى قاتىستى.
«مەملەكەت باسشىسى اوك-ءتى ساپالى جاڭا دەڭگەيگە شىعارۋدى تاپسىردى. بۇل جۇيەلى ءتاسىلدى, زاماناۋي تەحنولوگيالار مەن تسيفرلىق شەشىمدەردى, جاساندى ينتەللەكتىنى ەنگىزۋدى قاجەت ەتەدى. ءبىز سالانىڭ تيىمدىلىگىن, اشىقتىعىن جانە ۇيلەسىمدىلىگىن بارلىق دەڭگەيدە قامتاماسىز ەتۋىمىز كەرەك. باسىمدىقتاردىڭ قاتارىندا – مال شارۋاشىلىعىن دامىتۋ, اۋىل شارۋاشىلىعى ونىمدەرىن قايتا وڭدەۋدى كەڭەيتۋ جانە زاماناۋي اگروحابتار قۇرۋ بار», – دەدى مينيستر ايداربەك ساپاروۆ.
ۆيتسە-مينيستر امانعالي بەردالين مال شارۋاشىلىعى سالاسىندا اگروبيزنەستى قولداۋدىڭ كەشەندى جوسپارىن تانىستىردى.
قۇجاتتا اينالىم قاراجاتىن 5% مولشەرلەمەمەن جەڭىلدەتىلگەن نەسيەلەۋ, ىقم مەن ۇم اسىل تۇقىمدى مال ساتىپ الۋعا ۇزاق مەرزىمدى قارىز بەرۋ, «دامۋ» قورى ارقىلى نەسيەلەردى 80%-عا دەيىن كەپىلدەندىرۋ جانە سالا قىزمەتكەرلەرىنە الەۋمەتتىك قولداۋدى كۇشەيتۋ شارالارى قاراستىرىلعان.
ەكسپورتتىق الەۋەت پەن ۆەتەريناريالىق قاۋىپسىزدىكتى ارتتىرۋ ءۇشىن ۆەتەريناريالىق نىساندار سالۋعا جانە زەرتحانالىق جابدىق ساتىپ الۋعا قارجى ءبولىندى. قىتاي, رەسەي, تۇركياعا ەكسپورت شەكتەۋلەرى الىنىپ تاستالدى. بيىل يران مەن گرۋزيا نارىقتارى اشىلدى, ەو-عا بال ەكسپورتتاۋعا رۇقسات بەرىلدى. سونداي-اق اكۆاشارۋاشىلىعى جانە جىلقى ەتى ونىمدەرىن ەو-عا شىعارۋ ماسەلەسى قارالۋدا, جاپونيا, مالايزيا, ۆەتنام, سينگاپۋر, پاكىستان جانە باسقا ەلدەرمەن كەلىسسوزدەر جۇرگىزىلۋدە. ءونىمنىڭ تولىق قاداعالانۋىن قامتاماسىز ەتەتىن, مەملەكەتتىك كىرىستەر كوميتەتىنىڭ جۇيەلەرىمەن ينتەگراتسيالانعان بىرىڭعاي ۆەتەريناريالىق تسيفرلىق پلاتفورما ازىرلەنۋدە.
ۆيتسە-مينيستر ەرمەك كەنجەحان ۇلى اوك-كە ينۆەستيتسيالار تارتۋ شارالارى جونىندە باياندادى.
2025 جىلدىڭ جەتى ايىندا سالاعا 710,6 ملرد تەڭگە ينۆەستيتسيا قۇيىلىپ, جالپى سوماسى 1 ترلن تەڭگەگە 5 كەلىسىم جاسالدى, 115,5 ملرد تەڭگەگە 81 جوبا جۇزەگە اسىرىلدى.
2027 جىلعا دەيىن جالپى قۇنى 3,4 ترلن تەڭگەگە باعالانعان 711 جوبادان تۇراتىن جول كارتاسى دايىندالدى.
ءىرى جوبالاردىڭ قاتارىندا: جىلىنا 155 مىڭ توننا قىزاناق وندىرەتىن جىلىجاي كەشەنى («Alsera», $650 ملن), جىلىنا 5 ملن توننا قانت قىزىلشاسىن وڭدەپ, 500 مىڭ توننا قانت وندىرەتىن زاۋىت («QazaqArab Sugar», $580 ملن), قۋاتتىلىعى 1 ملن توننا جۇگەرىنى تەرەڭ وڭدەيتىن ونەركاسىپتىك پارك («Fufeng Group», $350 ملن), سونداي-اق 240 مىڭ توننا بيداي مەن 80 مىڭ توننا بۇرشاقتى قايتا وڭدەيتىن كەشەن («Tiryaki Holding», $320 ملن).
2025–2027 جىلدارعا ارنالعان «اوك-كە ينۆەستيتسيالارعا تاپسىرىس» جوباسى ازىرلەنۋدە. ول 1,2 ترلن تەڭگە كولەمىندە ۇزاق مەرزىمدى جەڭىلدەتىلگەن قارجىلاندىرۋدى كوزدەيدى.
ۆيتسە-مينيستر ەربول تاسجۇرەكوۆ اگرارلىق ەكسپورت جوسپارىن تانىستىردى. جوسپاردا ەكسپورتتىق لوگيستيكانى دامىتۋ, يمپورتتاۋشى ەلدەردىڭ تالاپتارىنا سايكەستىكتى قامتاماسىز ەتۋ, قازاقستاندىق ونىمدەردى شەتەل نارىقتارىنا ىلگەرىلەتۋ جانە ماركەتينگتىك ستراتەگيالاردى ىسكە اسىرۋ كوزدەلگەن. ەكسپورت گەوگرافياسى كەڭەيىپ, ماروككو, الجير, ۆەتنام ەلدەرىنە شىعارۋ جوسپارلانۋدا. ەكسپورتتاۋشىلارعا ساۋدا جانە ينتەگراتسيا مينيسترلىگى ارقىلى قولداۋ كورسەتىلەدى.
اگرارلىق عىلىمدى دامىتۋعا دا ەرەكشە نازار اۋدارىلۋدا.
جەر رەسۋرستارىن باسقارۋ كوميتەتىنىڭ توراعاسى مۇرات تەمىرجانوۆ جاساندى ينتەللەكت پەن عارىشتىق مونيتورينگ نەگىزىندە بىرىڭعاي تسيفرلىق جەر كارتاسىن جاساۋ بارىسى تۋرالى باياندادى.
2022 جىلدان بەرى 13,7 ملن گا جەر مەملەكەت مەنشىگىنە قايتارىلدى, ونىڭ 6,2 ملن گا جەرگىلىكتى اتقارۋشى ورگاندارمەن قايتا ءبولىندى. جەر كودەكسىنە كونكۋرستاردى ەلەكتروندىق فورماتقا كوشىرۋ تۋرالى تۇزەتۋلەر ازىرلەندى.
2025 جىلدىڭ سوڭىنا دەيىن اۋىل شارۋاشىلىعى ماقساتىنداعى 190 ملن گا جەردى, 74 ملن گا توپىراقتىق جانە 71 ملن گا گەوبوتانيكالىق زەرتتەۋدى تولىق تسيفرلاندىرۋ جوسپارلانعان. جاڭا زاماناۋي جەر كاداسترى اقپاراتتىق جۇيەسى ىسكە قوسىلادى.
«ارقايسىمىز پرەزيدەنت تاپسىرمالارىن ورىنداۋدا جەكە ءارى كاسىبي جاۋاپكەرشىلىك ارقالايمىز. ەشبىر باعىت باقىلاۋسىز جانە جۇيەلى پىسىقتاۋسىز قالماۋى ءتيىس», – دەپ تۇيىندەدى مينيستر.
