كەشە مەملەكەت باسشىسى نۇرسۇلتان نازارباەۆ استاناداعى قوشقارباەۆ جانە جۇماباەۆ كوشەلەرىنىڭ قيىلىسىندا ورنالاسقان «جەرۇيىق» ساياباعىنداعى گەنەرال ي.ۆ.پانفيلوۆتىڭ ەسكەرتكىشىن اشۋ راسىمىنە قاتىستى.
سالتاناتتى ءراسىم بارىسىندا ەلباسى بارشا ارداگەرلەر مەن ەل تۇرعىندارىن وتان قورعاۋشى كۇنىمەن جانە ۇلى جەڭىستىڭ 70 جىلدىق مەرەيتويىمەن قۇتتىقتادى.
«بۇل – كەڭەس وداعىنىڭ باتىرى يۆان پانفيلوۆقا عانا ارنالعان ەسكەرتكىش ەمەس, فاشيزمگە قارسى كۇرەسكە قاتىسقان بارلىق قازاقستاندىقتارعا, ۇرىس دالاسىندا قازا تاپقاندارعا جانە امان-ەسەن ورالىپ, ەلدى دامىتۋعا وراسان ەڭبەك سىڭىرگەن ارداگەرلەرگە دەگەن تاعزىم», – دەدى قازاقستان پرەزيدەنتى.
نۇرسۇلتان نازارباەۆ گەنەرال-مايور پانفيلوۆتىڭ باسشىلىعىندا بولعان 316-شى اتقىشتار ديۆيزياسى الماتى وبلىسىندا قۇرىلعانىن ەسكە سالدى.
«وسى ديۆيزيانىڭ 28 پانفيلوۆشى جاۋىنگەرى ماسكەۋ تۇبىندەگى ەڭ سۇراپىل شايقاسقا قاتىستى. ديۆيزيا قاتارىندا كەڭەس وداعىنىڭ باتىرى باۋىرجان مومىش ۇلى بولدى. ولار فاشيستەردىڭ تانكتەرمەن جاساعان شابۋىلىنا بىرگە تويتارىس بەردى. سول سەبەپتى دە, گەنەرال پانفيلوۆتىڭ ەسىمى ۇلى وتان سوعىسى تاريحىندا قالدى. بىزدەر, قازاقستاندىقتار, ولاردى وزگە باتىرلارمەن بىرگە قاستەر تۇتىپ, جادىمىزدا ساقتايمىز», – دەدى مەملەكەت باسشىسى.
قازاقستان پرەزيدەنتى بۇگىن بار سىي-قۇرمەت پەن تىلەك سوعىس ارداگەرلەرىنە ارنالاتىنىن اتاپ ءوتتى.
«ەلىمىز قاجەتتى قولداۋى مەن جاردەمىن كورسەتۋدە. ارقايسىڭىز مەملەكەتتىڭ قامقورلىعىنداسىزدار. مەن ارقايسىڭىزدى دا جاڭا جىلمەن قۇتتىقتاۋعا تىرىستىم. ءبىز ارداگەرلەردى مەرەكەلەردە عانا ەمەس, بارلىق ۋاقىتتا ارداقتايتىن بولامىز, ويتكەنى, سىزدەر بۇعان لايىقسىزدار. بۇگىنگى ۇرپاقتىڭ تۇراقتى, تاۋەلسىز ءارى تاتۋ قازاقستاندى قۇرۋى – سىزدەردىڭ ەرلىكتەرىڭىزدىڭ وتەۋى. ەلىمىز قالاي وركەندەپ كەلە جاتقانىن كورىپ وتىرسىزدار, سوندىقتان بەكەرگە سوعىسىپ, قان توكپەگەن ەكەنبىز دەپ ويلاۋلارىڭىزعا تولىق نەگىز بار. ارامىزدا امان-ساۋ ءجۇرىپ, جاستاردى پاتريوتتىق پەن وتانعا ادالدىق رۋحىندا تاربيەلەي بەرىڭىزدەر!» – دەدى نۇرسۇلتان نازارباەۆ.
كەڭەس وداعىنىڭ باتىرى, گەنەرال-مايور ي.ۆ.پانفيلوۆ ەسكەرتكىشىنىڭ اۆتورى – ءمۇسىنشى رەنات ابەنوۆ. بيىكتىگى 2,5 مەترلىك ەسكەرتكىش قولادان قۇيىلعان. ونىڭ ورتا تۇسىندا گۇل شوقتارىن قوياتىن ارناۋلى تاقتا بار.
مونۋمەنتتىڭ شىعىس جاعىندا اللەيا بويىمەن ماسكەۋدى قورعاۋ كەزىندە شەيىت بولعان 28 پانفيلوۆشى-جاۋىنگەردىڭ تۋعان جىلدارى مەن قازا تاپقان كۇندەرى جازىلعان, تابيعي گرانيتتەن جاسالعان تاباقشا-پليتالار قويىلىپتى. بۇل جەردەن كەڭەس وداعى باتىرىنىڭ «التىن جۇلدىزى» مەدالى بەدەرلەنگەن 28 ستەلانى دا كورۋگە بولادى.
اينالاسى كوگالداندىرىلعان جانە جاسىل جەلەكپەن كومكەرىلگەن اللەياعا ساۋلە شىعاراتىن 2 ارنايى قوندىرعى مەن 16 شامنان جارىق تۇسىرىلەدى.
ءلايلا ەدىلقىزى,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.
