كتك تەلەارناسىنىڭ حابارلاۋىنشا, اقتوبەدە وقۋ-جاتتىعۋ جيىندارىنان كەيىن 15 جاستاعى مەكتەپ وقۋشىسى قازا تاپتى. تراگەديا اقپاندا بولعانىمەن, مارقۇمنىڭ اتا-اناسى بۇل تۋرالى تەك قازىر – استانادا وسىعان ۇقساس جاعداي بولعاننان كەيىن عانا ايتىپ وتىر. وتباسى مۇنىڭ ءبارى ۇيىمداستىرۋشىلاردىڭ سالعىرتتىعىنان بولدى دەپ ەسەپتەيدى.
– جيىنعا بۇكىل وبلىستان 80 بالا قاتىستى, بىراق مەديتسينا قىزمەتكەرلەرى بولعان جوق. ۇلىم قۇلاپ قالعان كەزدە, جاتتىقتىرۋشى ونى تۇرعىزعان دا, قايتا جىبەرگەن. راقىمجان ەدەنگە قۇلاپ, قوزعالا الماي قالعان. جەدەل جاردەمدى كەش شاقىردى. ال وعان دەيىن ەس-ءتۇسسىز جاتقان بالانى سىرتقا – قول-اياعىنان ۇستاپ, جالاڭاش دەنەسىمەن الىپ شىققان, – دەيدى ءجاسوسپىرىمنىڭ اكەسى نۇرلىبەك مۇقانعاليەۆ.
وبلىستىق دەنە شىنىقتىرۋ جانە سپورت باسقارماسى الداعى ۋاقىتتا مۇنداي جاعدايعا جول بەرمەۋ ءۇشىن شارا قابىلداۋ قاجەت ەكەنىن مويىندادى. الايدا ۇيىمداستىرۋشىلاردىڭ كىناسىن جوققا شىعارعانداي بولدى.
– ارينە, وقيعا وتە قايعىلى. ءبىز بۇدان ساباق الىپ, مۇنداي جايتتىڭ قايتالانباۋىنا كۇش سالۋىمىز كەرەك. بىراق, مىسالى, ەرەيمەنتاۋداعى جاعدايدى الايىق: ول جەردە دە مەديتسينا قىزمەتكەرى تەك العاشقى قاراپايىم كومەك كورسەتتى. سوسىن ءبارىبىر جەدەل جاردەم شاقىرىلدى. قالاي بولعاندا دا, كىمنىڭ كىنالى ەكەنىن تەرگەۋ انىقتايدى دەپ ويلايمىن, – دەدى اقتوبە وبلىستىق سپورت باسقارماسىنىڭ باسشىسى مەيرامبەك ماحامبەتوۆ.
الايدا تەرگەۋ ءىستى سوڭىنا دەيىن جەتكىزبەدى. قىلمىستىق ءىس ناۋرىز ايىنىڭ سوڭىندا, راقىمجان ءالى جانساقتاۋ بولىمىندە ءومىر ءۇشىن كۇرەسىپ جاتقان كەزدە جابىلىپ قالعان. اتا-اناسى ءىستى قايتا قاراۋدى تالاپ ەتىپ وتىر.
