رەنتگەن, كومپيۋتەرلىك توموگراف (كت), ماگنيتتى-رەزونانستى توموگراف (مرت), ۋزي اپپاراتىن باسقارۋ ءۇشىن تالاپتى جاس الدىمەن ەل قاتارلى جالپى مەديتسينادا التى جىل وقيدى. كەيىن ينتەرناتۋراعا تۇسكەندە ساۋلەلىك دياگنوستيكا باعىتىن تاڭدايدى. ك.نۇرىشەۆا دا وسى جولمەن استانا مەديتسينا ۋنيۆەرسيتەتىندە وقىعان. 2008 جىلى وقۋىن ءساتتى اياقتاپ, تۋعان ولكەسى كوكشەتاۋ قالاسىندا ەڭبەك جولىن باستايدى. №1 قالالىق ەمحانادا باقىت جۇماتاي ۇلى سىندى سالا بىلگىرىمەن بىرگە جۇمىس ىستەيدى. تەوريالىق ءبىلىمىن تاجىريبەدە شىڭدايدى. بىلىكتى تالىمگەر جاس مامانعا اسپاپتارمەن جۇمىس ىستەۋدى ۇيرەتۋمەن شەكتەلمەي, قانداي دا ءبىر سىرقاتتى قالت جىبەرمەيتىندەي قىراعىلىققا باۋليدى. مەديتسينانىڭ قاي باعىتىن الساق تا وڭايى جوق. دەگەنمەن سالاعا كەلگەن جاستىڭ كوبى حيرۋرگيادا جۇمىس ىستەۋدى نەمەسە وفتالمولوگ, لور, كارديولوگ تاعىسىن-تاعى كاسىبي مامان بولۋدى كوزدەيدى. كۇنسۇلۋدىڭ تاڭداۋى اۋەل باستان مەديتسينانىڭ دياگنوستيكا باعىتىنا ءتۇستى.
«بالا كەزدەن فيزيكا-ماتەماتيكا باعىتى, تەحنيكا جانىما جاقىن بولدى. اكەم مەكتەپتە وقىپ جۇرگەنىمدە دارىگەر بولاسىڭ دەيتىن, سول ءسوز ىقپال ەتتى مە, وسى ماماندىققا اڭسارىم اۋدى. تەحنيكاعا اۋەستىگىمنىڭ اسەرىمەن ساۋلەلىك دياگنوستيكاعا دەن قويدىم. قازىر بالا كەزدە ارمانداعانداي, اسقان دالدىكتى, جاۋاپكەرشىلىكتى تالاپ ەتەتىن ۇلكەن تەحنيكالارمەن جۇمىس ىستەيمىن. كوكشەتاۋدا تاجىريبە جيناقتاعان سوڭ, 2010 جىلى استاناعا قونىس اۋداردىق. سالادا ءجۇرىپ بايقاعانىم, اۋىلداعى فەلدشەرلىك-اكۋشەرلىك پۋنكتتەردىڭ نىساندارى شاعىن. رەنتگەن سەكىلدى ۇلكەن اپپاراتتى ورنالاستىرۋعا عيماراتتارى ساي كەلمەيدى. وسى ماسەلە شەشىمىن تاپسا, دياگنوستيكا ماماندارىن دايارلاۋعا دا كوبىرەك كوڭىل بولىنەدى دەپ بىلەمىن. باستى ماسەلە – مەديتسينالىق مەكەمەلەردى جەتكىلىكتى جاراقتاندىرۋ», دەيدى كۇنسۇلۋ.
ونىڭ ايتۋىنشا, ساۋلەلىك دياگنوستيكا مامانى بولۋدىڭ قيىندىعى از ەمەس. تۋبەركۋلەز, قاتەرلى ىسىك سەكىلدى اۋرۋلاردى وتكىزىپ الۋعا مۇلدە جول بەرۋگە بولمايدى.
«قازىر ءبىزدىڭ بولىمگە قارايتىن 5 رەنتگەن, 3 ۋزي كابينەتى بار. دارىگەرلەر ەكى اۋىسىمدا جۇمىس ىستەيدى. بۇل سالادا جۇمىس ىستەگەن سوڭ, جەكە باستىڭ اماندىعىن ويلاماسقا بولمايدى. جۇمىستىڭ قاۋىپتى تۇستارى بار. اپپارات تۇرعان بولمەگە كىرىپ-شىعىپ جۇرگەندە ساۋلەسى وتە از مولشەردە بولسا دا تۇسەدى. سوندىقتان «دوزيمەترمەن» جۇرەمىز. دوزيمەتر – يونداعىش ساۋلەلەردىڭ مولشەرى مەن قۋاتىن ولشەۋگە ارنالعان قۇرىلعى. قاۋىپتى ەسكەرىپ, 5 ساعات 45 مينۋتتان ارتىق جۇمىس ىستەي المايمىز», دەيدى دارىگەر.
ساۋلەلىك دياگنوستيكا ماماندارى الدىنا كەلگەن پاتسيەنتتەردى الدىمەن رەنتگەن اپپاراتىنا تۇسىرەدى. سونىڭ ناتيجەسى بويىنشا قانداي دا ءبىر اۋرۋدىڭ بەلگىلەرى بايقالسا, ناۋقاستى كومپيۋتەرلىك توموگرافياعا جىبەرەدى. بۇل قادام دياگنوزدى دالىرەك انىقتاۋعا كومەكتەسەدى. ساۋلەلىك دياگنوستيكا اپپاراتتارىنا, ماماندارىنا كوروناۆيرۋس پاندەمياسى تۇسىندا سۇرانىس كوپ بولعانى بەلگىلى. سول كەزدە بىرنەشە وڭىردە جاڭا اپپاراتتار ساتىپ الىندى. دياگنوستيكا دارىگەرلەرى پنەۆمونيانىڭ بۇرىن-سوڭدى كورمەگەن تۇرىمەن بەتپە-بەت كەلدى. ك.نۇرىشەۆا دا 16 جىلدىق تاجىريبەسىندە مۇنداي بەلگىلەردى كورمەگەنىن ايتتى.
«راسىندا, ءبىز قايران قالدىق. كوپتەگەن ناۋقاستا وكپەنىڭ وڭ, سول جاعىمەن قوسا, ورتا, تومەنگى بولىكتەرىنە دەيىن داق ءتۇسىپ, اسقىنا باستاعان. سوسىن وكپەنىڭ قانشالىقتى اسقىنعانىن پايىزبەن ەسەپتەپ شىعارا باستادىق. كەيىن شەتەلدىك تاجىريبەگە جۇگىنىپ, پنەۆمونيانىڭ وسى تۇرىنە دياگنوز قويىلدى. قازىر قيىن كەزەڭ ارتتا قالدى. دەسەك تە دارىگەر بولعان سوڭ ەركىنسۋگە بولمايدى. ول ءۇشىن اركەز بىلىكتىلىكتى شىڭداپ وتىرۋ قاجەت», دەيدى كۇنسۇلۋ.
تاجىريبە دەمەكشى, قازىر ءاربىر ساۋلەلىك دياگنوستيكا دارىگەرى بەس جىل سايىن بىلىكتىلىگىن راستاۋ نەمەسە ارتتىرۋى ءتيىس دەگەن تالاپ بار. سونىڭ ارقاسىندا شەتەلگە بارىپ, تاجىريبە جيعاندار كوپ. ءبىزدىڭ كەيىپكەرىمىز دە بىلتىر فرانتسياعا بارىپ, بىلىكتىلىگىن ارتتىرىپ كەلدى. تۇيگەنىمىز, ساۋلەلىك دياگنوستيكا مامانى بولۋ ءۇشىن ءبىر عانا اپپاراتتىڭ ءتىلىن ءبىلۋ جەتكىلىكسىز. ويتكەنى قۇرىلعىلار جىل سايىن جاڭارىپ, اۋرۋ-سىرقاۋدىڭ دا ءتۇرى كوبەيىپ كەلەدى.
