كەزدەسۋگە قالا اكىمدىگى مەن اۋماقتىق ورگانداردىڭ وكىلدەرى, ساراپشىلار, ءماسليحات دەپۋتاتتارى, قوعامدىق كەڭەستىڭ جانە قازاقستان حالقى اسسامبلەياسىنىڭ مۇشەلەرى, شىعارماشىلىق قاۋىم جانە ۇكىمەتتىك ەمەس ۇيىمدار قاتىستى.
«الماتى – ەلىمىزدىڭ ەڭ ءىرى مەگاپوليسى, عىلىم مەن ءبىلىمنىڭ ورتالىعى. سوندىقتان پرەزيدەنتىمىزدىڭ ستراتەگيالىق مىندەتتەرىن جۇزەگە اسىرۋدا, اسىرەسە تسيفرلىق ترانسفورماتسيا مەن جاساندى ينتەللەكتتى ەنگىزۋدە قالامىزدىڭ ءرولى ايرىقشا», – دەدى الماتى اكىمى.
قالا اكىمى بۇگىندە ەلىمىزدەگى IT-قىزمەت نارىعىنىڭ 53 پايىزى الماتىنىڭ ۇلەسىندە ەكەندىگىن اتاپ ءوتتى. ونىڭ كولەمى – 4 ترلن تەڭگە. قالادا Alatau Creative HUB, Farabi Hub جانە ەلىمىزدەگى العاشقى Almaty Digital Medical Center – تسيفرلىق مەديتسينا ورتالىعى جۇمىس ىستەيدى.
اكىم باستى مىندەتتەردىڭ ءبىرى – ينۆەستيتسيا كولەمىن ارتتىرۋ ەكەندىنىن العا تارتا وتىرىپ: "2030 جىلعا دەيىن الماتىدا جالپى قۇنى 3,6 ترلن تەڭگەدەن اساتىن 190 جوبا جۇزەگە اسىرىلادى, – دەدى.
ءتۋريزمدى دامىتۋعا دا ەرەكشە كوڭىل ءبولىنىپ وتىر. نەگىزگى جوبا – الماتىنىڭ تاۋ كلاستەرى. ول 2029 جىلعا قاراي ورتالىق ازياداعى ەڭ ءىرى جىل بويى جۇمىس ىستەيتىن تۋريستىك ورتالىققا اينالادى. ناتيجەسىندە جىل سايىن شامامەن 1 ملن شەتەلدىك تۋريست كەلىپ, قالا ەكونوميكاسىنا 300 ملرد تەڭگەدەن استام كىرىس كىرگىزەدى.
جولداۋداعى ماڭىزدى باعىتتاردىڭ ءبىرى – ەكولوگيا. بۇل – بىرىڭعاي ەكولوگيالىق ستاندارتتاردى ەنگىزۋ, سۋ رەسۋرستارىن ۇنەمدەۋ جانە ولاردى باسقارۋعا ارنالعان تسيفرلىق پلاتفورما قۇرۋ. سونىمەن بىرگە, «تازا قازاقستان» باعدارلاماسى ۇلتتىق باسىمدىق رەتىندە بەلگىلەندى.
كەزدەسۋ سوڭىندا دارحان ساتىبالدى مەملەكەت باسشىسى ايقىنداعان مىندەتتەر – بارشاعا ورتاق ماقسات ەكەنىن اتاپ ءوتتى. ولاردى جۇزەگە اسىرۋ جەرگىلىكتى اتقارۋشى ورگانداردىڭ, اۋماقتىق قۇرىلىمداردىڭ, عىلىمي قاۋىم مەن ازاماتتىق سەكتوردىڭ بىرلەسكەن ءىس-قيمىلىن تالاپ ەتەدى. قالانىڭ اكتيۆىمەن وتكەن اشىق ديالوگ ناقتى شەشىمدەر ازىرلەۋگە جول اشادى.
