سول جىلى اۋىلدان بەلسەنىپ شىققان 15 جاس گەكتارلاپ باۋ-باقشا ەگىپ, اجەپتاۋىر تابىس تاۋىپتى. كەلەسى جىلى قاتارى كوبەيىپ, ءدان سەپكەن القاپتارى دا ۇلعايا ءتۇسىپتى. بۇگىندە وسى ەڭبەك بريگادالارى قاتارىندا جۇمىسسىز, NEET ساناتىنداعى, پروباتسيا ەسەبىندە تۇراتىن 200-گە جۋىق جاس جۇمىس ىستەيدى. تالاپتى جاستارعا مەملەكەت تاراپىنان قولداۋ دا كورسەتىلىپ كەلەدى. ماسەلەن, ەگىندىك جەر بەرىلىپ, ونى دەمەۋشىلىك ەسەبىنەن جىرتىپ, ەگىن القابىن قورشاۋ مەن جانار-جاعارمايمەن قامتاماسىز ەتىلگەن.
اۋدانداعى امانكەلدى اۋىلىندا دا 2023 جىلى وسىنداي بريگادا قۇرىلىپتى. وسى كۇنى اۋىلدىڭ 10 بالاسى قاۋىن-قاربىز, اسقاباق, جۇگەرى مەن كارتوپ ەگىپ, ونىمدەرىن جيناپ جاتىر. جاز بويعى ەڭبەگىنىڭ جەمىسىن كۇزدە وتەتىن جارمەڭكەلەردە ساۋداعا شىعارادى. تالاپشىل جاستارعا اۋىل اكىمدىگى تاراپىنان ەگىندىك جەر, اياقسۋ جاعىنان قولداۋ بار. داريا دەڭگەيى تومەندەگەلى بەرى ولارعا سورعى بەرىلىپ, ەگىنىن سۋارۋعا جاعداي جاسالىپ كەلەدى.
اۋىلدىق وكرۋگ اكىمى اپپاراتىنىڭ ادىسكەرى, جاستار ءىسى جونىندەگى مامان بەكسۇلتان سەرىكباەۆتىڭ ايتۋىنشا, جاستار قىستا دا جۇمىسسىز قالمايدى. قوعامدىق نەگىزدەگى جۇمىستاردان بولەك, ءبىرازى جالدانبالى كاسىپكە كوشەدى. كوكتەم شىعا باۋ-باقشانىڭ قامىنا قايتا كىرىسەدى.
«وسى اۋىلدا كوپ جىلدان بەرى ەگىن ەگىلمەي كەلگەن. 2021 جىلدان باستاپ قانا اۋىل اكىمدىگىنىڭ باستاماسىمەن ەگىن شارۋاشىلىعىمەن اينالىسۋعا قادام جاسالدى. العاشقىدا 30 ءۇي باستاسا, قازىر ولاردىڭ قاتارى 100 وتباسىنان استى. وسىلاردىڭ ىشىندە جاستار بريگاداسىنىڭ ورنى بولەك. قاتارىنا ۇلگى بولىپ, ەڭبەكتەن قاشپاعان جاستار ءۇشىن جۇمىسسىزدىق سىلتاۋ ەمەس ەكەنىن دالەلدەپ كەلەدى. رۇستەمبەك اۋباكىروۆ, عالىمجان جاناحمەتوۆ, شاراپات ابدىكارىموۆ, مەيىرحان يشانبەك سەكىلدى جاستاردىڭ ەڭبەگى كوپكە ۇلگى. ولاردىڭ قاتارى جىلدان-جىلعا ارتىپ جاتقانى دا قۋانتادى», دەيدى ب.سەرىكباەۆ.
امانكەلدىمەن قاتار ىرگەلەس ايدارلى اۋىلىنىڭ جاستارى دا – «قىستىڭ قامىن جازدا ويلايتىنداردىڭ» قاتارىندا. العاشىندا 6 جىگىتتەن قۇرالعان توپ قاتارى جىل ساناپ تولىعىپ كەلەدى. ماۋسىم كەزىندە الا تاڭنان جۇمىسقا كىرىسەتىن ولار باقشانى ارامشوپتەن وتاپ, سۋارادى, ءتۇبىن بىرلەيدى.
اۋدان جاستارىنىڭ باسىن قوسقان وسىنداي بريگادالار بۇگىندە وسى ەكى ەلدى مەكەننەن بولەك جەتىكول, بەسارىق, شىركەيلى, ا.توقماعانبەتوۆ اۋىلدارىندا جۇيەلى تۇردە ۇيىمداستىرىلعان. جوباعا قاتىسقان 150-گە جۋىق جاس 60 گەكتار جەرگە كارتوپ پەن باقشا ونىمدەرىن ەگىپ, مول ءونىم جيناپ وتىر.
جالپى, كەيىنگى جىلدارى سىر وڭىرىندە جاستاردىڭ بەلسەندىلىگى بايقالىپ كەلەدى. مىسالى, جاڭاقورعانداعى «جاڭارعان جاڭاقورعان جاستارى» ەرىكتىلەر توبىنداعىلاردىڭ قاتارى بۇگىندە 300-دەن اسىپتى. كاسىپكەرلەر مەن بەلسەندى جاستار مۇشە بولعان ەرىكتىلەر توبى مەن اۋدان تۇرعىندارى بىرىگىپ, مۇقتاج وتباسىلارعا جاڭا ءۇي كىلتىن تابىستاۋدى داستۇرگە اينالدىرعان.
سپورتتىق ءىس-شارالار ۇيىمداستىرىپ, قايىرىمدىلىق, رۋحانيات, ءبىلىم باعىتىندا جۇمىس ىستەيتىن ەرىكتىلەر توبى 6 جىل ىشىندە 13 وتباسىنا ءۇي سىيلاپتى. وسىنداي ۇزدىك ۇلگى قازالى جاستارىنا دا ءتان. ولار دا قيىندىقتا قالعان تالاي جەرلەستەرىنە قولۇشىن سوزىپ, بىرنەشە مارتە اسار ادىسىمەن باسپانا سالىپ بەردى.
قىزىلوردا
