وبلىستىق ءبىلىم باسقارماسىنىڭ مىندەتىن اتقارۋشى عالىمجان ورىنوۆتىڭ ايتۋىنشا, 2025–2026 وقۋ جىلىندا ءبىرتۇتاس تاربيە باعدارلاماسى – «ادال ازامات» جۇزەگە اسىرىلادى, بارلىق 1-11 سىنىپ وقۋشىلارى «Day of AI» كۋرستارىمەن قامتىلادى. مۇعالىمدەرگە جي قولدانۋ بويىنشا كۋرستار ۇيىمداستىرىلىپ, ادىستەمەلىك ۇسىنىمدار ەنگىزىلىپ جاتىر. بۋللينگتىڭ الدىن الۋ ماقساتىندا «دوسبولLIKE» باعدارلاماسى ەنگىزىلىپ, اس ءمازىرىن دەنساۋلىق ساقتاۋ باسقارماسى ازىرلەگەن. وڭىردەگى ءبىلىم بەرۋ ۇيىمدارىندا جۇرگىزىلىپ وتىرعان ينفراقۇرىلىمدىق جۇمىستار دا قارقىندى. بيىل وبلىستا 43 مەكتەپتىڭ قۇرىلىسى جۇرگىزىلدى, ونىڭ 29-ى «كەلەشەك مەكتەپتەرى» ۇلتتىق جوباسى اياسىندا, ال قور ەسەبىنەن 14 ءبىلىم ورداسى بوي كوتەرۋدە. سونداي-اق 100-دەن استام وقۋ ورنىنىڭ عيماراتىنا اعىمداعى جوندەۋ جۇمىستارى جۇرگىزىلىپ, 106 ءبىلىم بەرۋ ۇيىمىنىڭ جىلىتۋ جۇيەسى گازعا اۋىستىرىلادى. جوعارىدا ايتىلعان 29 مەكتەپتىڭ 13-ءى وتكەن جىلى پايدالانۋعا بەرىلگەن, بيىل 13 «كەلەشەك مەكتەپتەرىنىڭ» قۇرىلىسى اياقتالادى. سونداي-اق جەرگىلىكتى بيۋدجەت ەسەبىنەن 17 جاڭا ءبىلىم نىسانى سالىنىپ جاتىر. 115 مەكتەپ جاڭعىرتۋ جوباسىنا ەنگەن بولسا, بيىل 41 مەكتەپ رەنوۆاتسيادان وتۋدە. ءوڭىر بيۋدجەتى ەسەبىنەن 59 مەكتەپتە اعىمداعى جوندەۋ جۇمىستارى ءجۇرىپ جاتىر. مىسالى, ورداباسى اۋدانى تەمىرلان اۋىلىندا ورنالاسقان شوقان ۋاليحانوۆ اتىنداعى مەكتەپ-گيمنازياسى 1986 جىلى سالىنعان, جوبالىق قۋاتتىلىعى 780 ورىندىق ءبىلىم ورداسىنا ماۋسىم ايىنان باستالعان اعىمداعى جوندەۋ جۇمىستارى اياقتالۋعا جاقىن. ال شۇبارسۋ اۋىلىنداعى اتامەكەن جالپى ورتا مەكتەبىنىڭ عيماراتى 2010 جىلى پايدالانۋعا بەرىلگەن. 600 ورىنعا ارنالعان بۇل مەكتەپتە بۇگىندە 962 وقۋشى بار. جوندەۋ جۇمىستارىن «Gold-ART» جشس جۇرگىزگەن, ءبىلىم ۇياسى جاڭا وقۋ جىلىنا دايىن. تەمىرلان اۋىلىندا ونەر مەكتەبى 1974 جىلى سالىنعان, ابدەن ەسكىرگەن عيماراتتا جۇمىس ىستەپ كەلگەن بولاتىن. سىيىمدىلىعى نەبارى 200 ورىنعا ارنالعان ءبىلىم ورداسىندا 409 بالا وقىپ ءجۇر. قازىرگى تاڭدا جاڭا عيماراتى سالىنىپ جاتقان مەكتەپ 300 ورىنعا ارنالعان جانە زاماناۋي مۋزىكا, حورەوگرافيا زالدارىمەن, جاڭا تەحنيكالىق جابدىقتارمەن قامتىلاتىن بولادى. جالپى, وڭىردە 115 مەكتەپ رەنوۆاتسيا جوباسىنا ەنگىزىلگەن. ونىڭ 41-ءى 2025 جىلى جاڭعىرتىلسا, قالعانى الداعى ەكى جىلدا كەزەڭ-كەزەڭىمەن جۇزەگە اسىرىلادى.
جاڭا وقۋ جىلىندا وڭىردە «كەلەشەك مەكتەپتەرى» جوباسى اياسىندا 8 جاڭا مەكتەپ اشىلدى. بۇل ورايدا وبلىس اكىمىنىڭ ورىنباسارى بەيسەنباي تاجىباەۆ جاڭا وقۋ جىلىنا دايىندىق جۇمىستارى پىسىقتالعان جينالىستا ءبىلىم نىساندارىنداعى قۇرىلىس جانە جوندەۋ جۇمىستارىن ۋاقتىلى جانە ساپالى اياقتاۋ قاجەتتىگىن ايتقان ەدى. مەكتەپتەرگە مۇعالىمدەر مەن تەحنيكالىق قىزمەتكەرلەردى جۇمىسقا قابىلداۋ كەزىندە زاڭ تالاپتارىنىڭ ساقتالۋى تاپسىرىلدى.
تۇركىستان وبلىسى
