«ونەر» ورتالىعىندا «التىن ساپا» سىيلىعىنىڭ يەگەرى, «التىن وردا» ءسان ءۇيىنىڭ نەگىزىن قالاۋشى ىرزا تۇرسىنزادا ۇلتتىق ونەردى دامىتۋداعى تاجىريبەسىن ءبولىستى.
«كۇندە وزگەرىپ جاتقان مىنا زاماندا ۇلتتىق سالت-ءداستۇرىمىزدى عانا ەمەس, قازاق ايەلىنىڭ بولمىسىن ساقتاپ كەلە جاتقان قازاقتىڭ قولونەرشى قىز-كەلىنشەكتەرى ساناۋلى ەكەنىن باسا ايتقىم كەلەدى. الداعى ۋاقىتتا وسى كاسىپكە بار ىنتا-جىگەرىمەن كىرىسەتىن قىز-كەلىنشەكتەرىمىزدىڭ قاتارى كوبەيىپ, ولاردىڭ اراسىنان ون ساۋساعىنان ونەرى تامعان, حالىقارالىق دەڭگەيدە مويىندالاتىن ىسمەرلەر شىعادى دەگەن ويدامىن. ءۇش كۇن ىشىندە قولدارىنان شىققان تۋىندىلارىن كورمەگە قويىپ, استانادان كەلگەن شەبەرلەردەن وقىپ-ۇيرەنۋگە ىنتا تانىتقان قىز-كەلىنشەكتەردىڭ قاتارىندا ونەرگە بەيىمى بار, تالانتتى ارۋلاردى بايقاپ قالدىم. ولارعا ورتا جولدا توقتاپ قالماي, شەبەرلىكتەرىن شىڭداي بەرسە دەگەن تىلەك ايتامىن. جۇمىسسىز جۇرگەن قىز-كەلىنشەكتەر وسى كاسىپتى ۇيرەنسىن دەگەن نيەتپەن استاناداعى «باقىتتى وتباسى» ورتالىعىندا تەگىن وقۋ كۋرستارىن اشتىق. بىرنەشە جىل بۇرىن باستالعان يگى باستاما ناتيجەسىن بەرىپ تە جاتىر. ولاردىڭ ىشىنەن ءوز باعىتتارىن تاڭداعان تاماشا قولونەرشى شەبەرلەر شىقتى», دەدى ىرزا تۇرسىنزادا.
«شەبەرلەر شەرۋى» فەستيۆالىن ۇيىمداستىرۋداعى ماقسات – جۇمىسسىز قىز-كەلىنشەكتەرگە استاناداعى «باقىتتى وتباسى» ورتالىعىنان كەلگەن مامانداردىڭ دارىستەرىن ۇيرەنۋگە مۇمكىندىك بەرۋ. وسى جەردە ءبىر-بىرلەرىڭىزبەن تاجىريبە الماستىڭىزدار, اقىل-كەڭەس بەردىڭىزدەر, تىڭ باستامالار الدىڭىزدار. جان-جاعىمىزدا زاماناۋي ۇلتتىق قولونەرىمەن الەمگە تانىلىپ جاتقان ەلدەر قاتارى كوبەيىپ كەلەدى. سىزدەر دە بويلارىڭىزداعى قابىلەتتى جەتىلدىرىپ, قولونەردى سۇيىكتى ىسكە اينالدىرۋعا تىرىسىڭىزدار. تابيعي ونىمدەردەن تاماشا ورنەك توقىپ, كيىم تىگىپ, تۇرمىسقا قاجەتتى سان ءتۇرلى بۇيىم جاساپ, باردى ۇقساتقان انا-اجەلەرىمىزدىڭ كيەلى ونەرىن جاڭا زامانعا لايىقتاپ جالعاستىرا بەرىڭىزدەر», دەدى وبلىس اكىمىنىڭ ورىنباسارى جولداس باتىرحان.
جۇقا كيىزدەن جاسالعان ءساندى قالپاقتارى, تىزىلگەن مونشاقتارمەن كومكەرىلگەن قول سومكەلەرى مەن ورنەكتى كيىز گوبەلەندەرىن كورمەگە اكەلگەن ءشاربانۋ دۇيسەنقۇلوۆا ىرعىز اۋدانى, اقشي اۋىلىنداعى مىرزاعالي تولەگەنوۆ اتىنداعى ورتا مەكتەپتە بەينەلەۋ پانىنەن ساباق بەرەدى. تاجىريبەلى ۇستاز ساباقتان تىس ۋاقىتتا مەكتەپتەگى قولونەر ۇيىرمەسىنە جەتەكشىلىك ەتەدى.وبلىستاعى كوركەم ەڭبەك ءپانى مۇعالىمدەرى قاۋىمداستىعىنىڭ مۇشەسى. وقۋشىلارى 2015 جىلدان بەرى عىلىمي جوبالارعا قاتىسىپ ءجۇر. گاۋھار تۇلكىباي, نازكەن سادىق سياقتى قولونەرگە قابىلەتتى شاكىرتتەرى وبلىستىق, رەسپۋبليكالىق «زەردە» ورتالىعى, كىشى عىلىم اكادەميانىڭ جوبالارىنان جۇلدەلى ورىندار الىپ كەلگەن.
«60ح70 سم, 1ح70 سم ولشەمدەگى كيىز گوبەلەندى جاساۋعا شامامەن 23 كۇن ۋاقىت كەتەدى. وعان ارنايى تاڭدالعان مەرينوس قويىنىڭ ءجۇنى جۇمسالادى. استىنا جۇمساق توسەنىش قويىپ, جۇقا ەتىپ جايىلعان كيىزدىڭ بەتىنە باسى كەرتىلگەن ارنايى ينەسىمەن ءتۇرلى ورنەك سالىپ توقيمىز. كيىز توقۋ قۇرالى 40-50 تەڭگەنىڭ شاماسىندا. ونى اقتوبەدەن ساتىپ الىپ كەتەمىز. كورمەلەردەن قالمايمىز. سەبەبى ول جەردە بالالاردىڭ ەڭبەگى كوزگە تۇسەدى. مەكتەپتە قولونەرگە قاتىسقان وقۋشىلارىم البينا التاەۆا, نۇراي قورقىتقىزى جەرگىلىكتى ۋنيۆەرسيتەتتە ۆيزۋالدى ونەر, ديزاين ماماندىعىنا وقۋعا ءتۇستى. تاعى ءبىر وقۋشىم شۇعىلا شايقاقوۆا وبلىستىق عىلىمي جوبادان ۇزدىك شىعىپ, ق.جۇبانوۆ اتىنداعى وڭىرلىك ۋنيۆەرسيتەتتىڭ ۆيزۋالدى ونەر ماماندىعىنىڭ وقۋ گرانتىن ۇتىپ الدى. وسى شارا بارىسىندا ەۋرازيالىق ديزاينەر ورتالىعىنىڭ مۇشەسى, رەسپۋبليكالىق «التىن شەبەرلەر» ۇيىمىنىڭ جەتەكشىسى, تەرمە باۋ توقۋدىڭ شەبەرى گۇلميرا اپايدىڭ ءۇش كۇندىك ساباعىنا قاتىسىپ, كيىز باسۋ مەن تەرمە باۋ تىگۋ تاجىريبەسىن ۇيرەندىم. كوپتەن بەرى كيىز ءۇيدىڭ ءساندى بۇيىمى – تەرمە باۋ توقۋدى ۇيرەنە الماي ءجۇر ەدىم. وسىعان قۋانىشتىمىن. تەرمە باۋدىڭ قۇرالىن ساتىپ الدىم. ەندى وقۋشىلارىما ۇيرەتەمىن», دەيدى ءشاربانۋ رافيكقىزى.
«شەبەرلەر شەرۋى» مەگافەستيۆالىنىڭ جەڭىمپازدارى وبلىس اكىمىنىڭ العىسحاتتارىمەن ماراپاتتالىپ, تىگىن ماشينالارى سىيلىققا بەرىلدى. كورمەگە قاتىسقان مەكتەپ وقۋشىلارى دا سىيلىقسىز قالعان جوق. وسى فەستيۆال اياسىندا ۇيىمداستىرىلعان «اتا كاسىبى – بالا ءناسىبى» كونكۋرسىندا نازىم بەرىكقىزى, كامشات نۇرداۋلەتقىزى, ءۋاليحان ۇلان ۇلى ۇزدىك شىعىپ, باعالى سىيلىقتارمەن ماراپاتتالدى.
اقتوبە وبلىسى
