دەپۋتاتتىڭ پىكىرىنشە, پارتيالىق سايلاۋ جۇيەسىنە كوشۋ – ۋاقىت تالابى.
ء«بىز حالىقارالىق قوعامنىڭ ءبىر بولشەگى رەتىندە الەمدە قالىپتاسقان جالپىعا ورتاق پارتيالىق سايلاۋ جۇيەسىنە بىرتىندەپ كوشۋىمىز كەرەك. اقش-تا ەكى پارتيالىق جۇيە ورنىققان, ەۋرووداق ەلدەرىنىڭ بارلىعى دەرلىك پارتيالىق نەگىزدەگى پارلامەنتى مەن ۇكىمەتىن سايلايدى», دەدى ەرمۇرات ءباپي.
سونداي-اق ول حالىقارالىق ۇيىمدار تاراپىنان قازاقستانداعى ساياسي وزگەرىستەرگە قىزىعۋشىلىقتىڭ ارتقانىن جەتكىزدى.
ء«بىز ازيا كونتينەنتىندەگى قوعامدىق-ساياسي دامۋى تەرەڭ ستاگناتسياعا ۇشىراعان مەملەكەتتەردىڭ قورشاۋىنداعى ەلمىز. اۆتوريتارلىق فورمادان اتتاپ وتۋگە بەت العان ءبىزدىڭ وزگەرىستەرگە ول مەملەكەتتەر ۇركە قارايدى», دەدى دەپۋتات.
بۇعان قوسا ول پارلامەنتتىك رەفورمانى حالىقتىق تالقىلاۋعا سالۋ – دەموكراتيالىق قادام ەكەنىن ەرەكشە اتاپ ءوتتى.
«ەندەشە, ەكى جىلعا جۋىق ارالىقتا قوعامدىق تالقىعا تۇسەتىن بۇل پارلامەنتتىك رەفورماعا كونسترۋكتيۆتى ىجداھاتپەن بەلسەنە ارالاسۋىمىز كەرەك», دەدى ەرمۇرات ءباپي.
