فوتو: pinterest.com
قارجى جانە بيۋدجەت كوميتەتىنىڭ ءتورايىمى تاتيانا ساۆەلەۆانىڭ ايتۋىنشا, زاڭ جوباسى 2025 جىلدىڭ 29 تامىزىندا ۇكىمەت قاۋلىسىمەن ماجىلىسكە ەنگىزىلگەن. بۇل قۇجات مەملەكەت باسشىسىنىڭ قارجى سەكتورىن دامىتۋ جونىندەگى تاپسىرماسىن ىسكە اسىرۋ ماقساتىندا ازىرلەنگەن. جوبا بانك قىزمەتىن جەتىلدىرۋگە, جاڭا بانكتەردىڭ اشىلۋىنا جاعداي جاساۋعا جانە بانك سەكتورىنداعى باسەكەلەستىكتى ارتتىرۋعا باعىتتالعان.
زاڭ جوباسى بويىنشا بيزنەستى نەسيەلەندىرۋدى جەڭىلدەتەتىن بازالىق بانكتىك ليتسەنزيا ەنگىزۋ كوزدەلگەن. سونىمەن بىرگە قارجىلىق ۇيىمداردىڭ باسشىلارىنا قويىلاتىن تالاپتار كۇشەيتىلەدى. ەندى بانكتەر مەن قارجى ۇيىمدارىن باسقارۋعا تەك كاسىبي دايىندىعى جوعارى, بىلىكتى ماماندار عانا تاعايىندالادى.
تاعى ءبىر ماڭىزدى جاڭالىق رەتىندە تولەمگە قابىلەتسىز بانكتەردىڭ قىزمەتىن رەتتەۋ تەتىكتەرى ەنگىزىلەدى. بۇل سالىمشىلاردىڭ مۇددەلەرىن قورعاۋعا جانە قارجى جۇيەسىنىڭ تۇراقتىلىعىن ساقتاۋعا مۇمكىندىك بەرەدى.
سونىمەن قاتار زاڭ جوباسى اياسىندا ۇلتتىق تسيفرلىق قارجىلىق ينفراقۇرىلىم قۇرۋ جانە تسيفرلىق تەڭگە مەن تسيفرلىق اكتيۆتەردىڭ اينالىمى ءۇشىن زاڭنامالىق بازا ازىرلەنەدى.
