سۋرەت: ult.kz
الماتى قالاسى ازاماتتىق اليانسىنىڭ توراعاسى قايىرجان ابدىحالىقوۆ پرەزيدەنت كەزەكتى جولداۋىندا ەلدەگى بارلىق سالانى قامتيتىن ۇلكەن جوسپار ۇسىنعانىن, اسىرەسە, تسيفرلىق تەحنولوگيالار مەن جاساندى ينتەللەكتىنىڭ مۇمكىندىكتەرىن جەتىك مەڭگەرۋ بارلىق سالاعا سەرپىن بەرەتىنىن العا تارتتى.
– جولداۋدا جاساندى ينتەللەكت جانە تسيفرلىق دامۋ مينيسترلىگىن قۇرۋ ۇسىنىلدى. بۇل مينيسترلىك تسيفرلاندىرۋ ءىسىن ۇيلەستىرىپ, اۋىل شارۋاشىلىعى, ءبىلىم بەرۋ, تۇرعىن ءۇي-كوممۋنالدىق شارۋاشىلىق پەن سۋ رەسۋرستارى سياقتى بىرنەشە سالاعا جاۋاپتى بولماق. بۇل ەلىمىزدەگى تسيفرلىق ترانسفورماتسيا ۇدەرىسىنىڭ جاڭا كەزەڭگە اياق باسقانىن بىلدىرەدى. جاساندى ينتەللەكت – ۋاقىت سۇرانىسى. ەلىمىز وسى مۇمكىندىكتى دەر كەزىندە پايدالانىپ, حالىقارالىق باسەكەدە ءوز ورنىن ناقتىلاي الۋى كەرەك. ول ءۇشىن كادر دايارلاۋ, يننوۆاتسيالىق ەكوجۇيە قالىپتاستىرۋ, عىلىم مەن ءوندىرىستى ۇشتاستىرۋ باستى باسىمدىق بولماق. بۇگىندە جي تەك تەحنولوگيالىق قۇرال ەمەس, ۇلتتىق قاۋىپسىزدىك, ەكونوميكالىق ءوسىم, دەنساۋلىق ساقتاۋ, ءبىلىم بەرۋ, ءتىپتى ونەر مەن مادەنيەتتىڭ دە تىرەگىنە اينالدى. وزىق ەلدەردىڭ ءبارى جي-ءدى دامىتۋعا تريلليونداعان قارجى ءبولىپ وتىر. ويتكەنى كىم وسى سالانى مەڭگەرەدى, سول ەل بولاشاقتى قالىپتاستىرادى. وسى ورايدا پرەزيدەنت ونەركاسىپتىڭ دامۋىنا ەرەكشە توقتالدى. ونىڭ ايتۋىنشا, جاڭا تەحنولوگياسىز ەكونوميكانى ءارتاراپتاندىرۋ مۇمكىن ەمەس. اۋىل شارۋاشىلىعىندا دا وزگەرىس بولادى. عىلىمي ورتالىقتار بازاسىندا اگروتەحنولوگيالىق حاب قۇرىلىپ, سۋ رەسۋرستارىن باقىلاۋ ءۇشىن تسيفرلىق جۇيەلەر ەنگىزىلمەك. مۇنىڭ ءبارى ۋاقىت تالابىنان تۋعان شەشىمدەر, – دەدى ق.ابدىحالىقوۆ.
ساياساتتانۋشى نۇرلان اسقار ۇلى الەمدىك تاجىريبە جي-ءدىڭ قاۋپىنەن بۇرىن, بەرەر مۇمكىندىگى مول ەكەنىن كورسەتىپ وتىرعانىن, بىراق بۇل تەحنولوگيا ادامزات يگىلىگىنە جۇمىس ىستەۋى ءۇشىن ەتيكالىق, قۇقىقتىق جانە ادامي باقىلاۋ ماڭىزدى ەكەنىن ايتادى. ساراپشىنىڭ ايتۋىنشا, پرەزيدەنتتىڭ مينيسترلىك قۇرۋ تۋرالى ۇسىنىسى – وسى ۇدەرىستى باقىلاۋدا ۇستاپ, ۇلتتىق مۇددە تۇرعىسىنان دامىتۋعا باعىتتالعان ۇتىمدى شەشىم.
– بۇگىندە ەل ازاماتتارى شەتەلدىك پلاتفورمالار مەن سەرۆيستەردى كەڭىنەن پايدالانادى. بۇل – ءبىر جاعىنان ىڭعايلى بولعانىمەن, ەكىنشى جاعىنان دەرەكتەر قاۋىپسىزدىگى تۇرعىسىنان الاڭ تۋعىزادى. جي مينيسترلىگى ۇلتتىق ونىمدەرگە باسىمدىق بەرىپ, ەلدىڭ تسيفرلىق ەگەمەندىگىن قامتاماسىز ەتۋگە ىقپال ەتەدى, – دەدى ول.
جولداۋدا ايتىلعان كولىك پەن لوگيستيكا سالاسىنىڭ بولاشاعى, كوممۋنالدىق جۇيەلەردى جاڭارتۋ, ەنەرگيا ۇنەمدەيتىن جاڭا تەحنولوگيالار ەنگىزۋ, جول-كولىك قاۋىپسىزدىگى ماسەلەلەرى دە نازاردان تىس قالعان جوق. جولداۋ تەك تاپسىرمالار جيىنتىعى ەمەس, ەل ءۇمىتى مەن بولاشاعىنىڭ باعدارى ەكەنىن ايتقان ساراپشىلار كەزەكتى قۇجاتتا ەل دامۋىنا باستايتىن نەگىزگى باسىمدىقتار قامتىلعانىن اتادى.
الماتى
