وبلىس اكىمى جينالعانداردى ەگىنگە وراق تۇسۋىمەن قۇتتىقتاپ, اتقارىلعان جۇمىستارعا توقتالدى.
«بۇگىنگى ءسات – ديقانداردىڭ ەككەن ءبىر ءدانى مىڭ ءدان بولاتىن, حالىقتىڭ ريزىق-نەسىبەسى قامباعا جينالاتىن جاۋاپتى شاق. بيىل وبلىس بويىنشا 189 600 گەكتارعا اۋىل شارۋاشىلىعى داقىلدارى ەگىلسە, ونىڭ ىشىندە كۇرىش كولەمى 80 900 گەكتار بولدى. كەيىنگى جىلدارداعى سۋ تاپشىلىعىن سىر ديقاندارى قاتتى سەزىنىپ كەلەدى. بيىلعى ۆەگەتاتسيالىق كەزەڭ دە وتە كۇردەلى جاعدايدا ءوتتى. وسى سىندارلى ساتتە سىرداريا وزەنىنىڭ جوعارى اعىسىنداعى مەملەكەتتەرمەن دەر كەزىندە جۇرگىزىلگەن كەلىسسوزدەر بىزگە ۇلكەن قولداۋ بولدى. مەملەكەت باسشىسىنىڭ تاپسىرماسىنا سايكەس ۇكىمەت رەزەرۆىنەن 53 جىلجىمالى-ديزەلدى ناسوس الۋعا 1 ملرد تەڭگە ءبولىنىپ, شارۋالار ونى يگىلىگىنە پايدالاندى. توتەنشە جاعدايلار مينيسترلىگى ەلىمىزدىڭ بارلىق وڭىرىنەن 139 قىزمەتكەردەن قۇرالعان جەكە قۇرامدى, 25 ديزەلدى قوندىرعىنى جەتكىزىپ, ەكى اي بويى سۋ تاپشىلىعى تۋىنداعان اۋماقتاردا ۋاقىتپەن ساناسپاي جۇمىس اتقارعانىن دا ايرىقشا ايتا كەتۋىمىز كەرەك», دەدى.
ونىڭ سوزىنشە, وڭىردە ارنايى جۇمىس توپتارى قۇرىلىپ, سۋدى ءتيىمدى پايدالانۋ ماقساتىندا ەگىستىكتى كەزەكتەسىپ سۋارۋ مەن قاشىرتقىداعى سۋدى ەكىنشى رەت پايدالانۋ جولعا قويىلدى. ناتيجەسىندە, كۇرىش كولەمىن بارىنشا شىعىنسىز ساقتاۋ مۇمكىن بولدى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەڭبەككەرلەردى قۇتتىقتاپ, ۆەگەتاتسيالىق كەزەڭدەگى كۇردەلى جاعدايعا قاراماستان جاقسى جەتىستىككە جەتكەن سىر ديقاندارىنا ريزاشىلىعىن ءبىلدىردى. كۇرىشكە العاشقى وراق تۇسەر ساتكە جينالعان جۇرت الدىندا قىزىلوردا وبلىسىنىڭ قۇرمەتتى ازاماتى بەكمىرزا ەلامانوۆ باتا بەردى.
باسقوسۋدا بىرقاتار ازاماتقا پرەمەر-ءمينيستردىڭ العىس حاتى, اۋىل شارۋاشىلىعى مينيسترلىگىنىڭ «اۋىل شارۋاشىلىعى سالاسىنىڭ ۇزدىگى» توسبەلگىسى, قۇرمەت گراموتاسى, ءمينيستردىڭ العىس حاتى, سۋ شارۋاشىلىعى جانە يرريگاتسيا مينيسترلىگىنىڭ «سۋ شارۋاشىلىعى سالاسىنىڭ ارداگەرى» توسبەلگىسى, قۇرمەت گراموتاسى تابىستالدى.
سىردارياداعى سۋ دەڭگەيى جىلدان-جىلعا تومەندەپ جاتىر. وسىعان بايلانىستى وڭىردەگى ەگىن شارۋاشىلىعىندا ءارتاراپتاندىرۋ جۇمىسى جاندانىپ, سۋ ۇنەمدەۋ تەحنولوگيالارى كەڭىنەن ەنگىزىلىپ كەلەدى.
قىزىلوردا وبلىسى,
جالاعاش اۋدانى
