9 مامىر! وسى ايتۋلى كۇنى مەن سۇيىكتى وتانىمىزدىڭ تۇكپىر-تۇكپىرىندەگى ءار سوعىس ارداگەرىن جەكە-جەكە قۇتتىقتاعىم كەلەدى! ويتكەنى, ولاردىڭ بارلىعى وسىنداي قۇرمەتكە لايىق جاندار, ەرلىكتەرىنە باعا جەتپەيدى, ناعىز باتىرلار.
كىشكەنتاي كەزىمدە اتامنان ونىڭ جاساعان ەرلىكتەرى تۋرالى سۇراۋ ويىما كەلمەپتى. ال قازىر وسى كەمشىلىگىمە قاتتى وكىنەمىن. ءبىر قۋانىشتىسى, ۇلى جەڭىستىڭ 70 جىلدىعى قارساڭىندا رەسەي قورعانىس مينيسترلىگىنىڭ «حالىقتىڭ قاھارماندىعى» دەپ اتالاتىن سايتىنان اتام – ابدراحمان وسپانوۆقا ارنالعان «ماراپات قاعازى» دەگەن ماقالانى وقىدىم. وندا اتامنىڭ «قىزىل جۇلدىز» وردەنىنە ۇسىنىلعانى تۋرالى انىق تا ناقتى جازىلىپتى.
«وسپانوۆ جولداس 1945 جىلدىڭ 16 ساۋىرىندە براندەنبۋرگ پروۆينتسياسىنىڭ گروس-نوەندور اۋدانىنداعى دۇشپاننىڭ مىقتى كۇشەيتىلگەن قورعانىسىن بۇزىپ وتۋدە 3-ءشى ەكپىندى ارميانىڭ 79-شى اتقىشتار كورپۋسىنا قاراستى 150-ءشى اتقىشتار ديۆيزياسىنىڭ 674-ءشى اتقىشتار پولكى قۇرامىنداعى 1-ءشى باتالونعا ۇلكەن قولداۋ كورسەتتى. بۇل ۇرىس قيمىلدارى بەرلينگە جاقىن تۇستاردا دا جالعاسىن تاپتى. ا.وسپانوۆ قارشا جاۋعان وققا قاراماستان, جاۋدىڭ ءبىر پۋلەمەتشىسىن جەر جاستاندىرىپ, ەكى پۋلەمەتىنىڭ ءۇنىن ءوشىردى. بۇعان قوسا, جاۋدىڭ ەكى جاياۋ اسكەر ۆزۆودىنىڭ كۇل-تالقانىن شىعارىپ, ءوزىنىڭ قولداۋ كورسەتۋىندەگى بولىمشەلەردىڭ بەرلينگە شابۋىلدارىن تابىستى جالعاستىرۋلارىن قامتاماسىز ەتتى».
ماراپاتقا ۇسىنۋ قاعازىن 276-شى لەنين وردەندى قىزىل تۋلى جەڭىل ارتيللەريا گۆارديالىق پولكىنىڭ كومانديرى پولكوۆنيك مەدۆەدەۆ تولتىرىپتى. وسى جەردە مەنىڭ ويىما اتامنىڭ تاعى ءبىر «قىزىل جۇلدىز» وردەنى بار ەكەنى ورالدى. سونداي-اق, ومىراۋىندا «گەرمانيانى جەڭگەنى ءۇشىن», «بەرليندى العانى ءۇشىن», «ۆارشاۆانى ازات ەتكەنى ءۇشىن», «كەنيگسبەرگتى ازات ەتكەنى ءۇشىن» مەدالدارى جارقىرايتىن.
بۇگىنگى كۇنى اتامنىڭ سۇراپىل سوعىستا قانداي اۋىرتپالىقتاردى باسىنان وتكەرگەنىن كوز الدىما ەلەستەتۋىمنىڭ ءوزى قيىن. ەسەسىنە, بەيبىت قازاقستاندا ءومىر ءسۇرىپ جاتىرمىز. اتاما جانە باسقا دا ۇلى وتان سوعىسىنىڭ ارداگەرلەرىنە بۇگىنگى اشىق اسپانىمىز ءۇشىن زور ريزاشىلىعىمدى بىلدىرسەم دەيمىن.
قاجىمۇرات وسپانوۆ.
