ەلورداداعى ۇلتتىق مۋزەيدە بەلگىلى ساياساتكەر بەرىك ابدىعالي ۇلىنىڭ «ۇمىت قالعان باتىرلار» («زابىتىە گەروي») اتتى كىتابىنىڭ تۇساۋكەسەر ءراسىمى ءوتتى. كىتاپقا كەڭەس وداعىنىڭ باتىرى اتاعىنا ۇسىنىلعان, الايدا, ءارتۇرلى سەبەپتەرمەن الا الماي قالعان قازاقستاندىق حاس باتىرلار تۋرالى ماتەريالدار توپتاستىرىلعان. سونداي-اق, ءبىر سوزبەن ايتقاندا جيناققا «حالىق باتىرى» اكتسياسى اياسىندا انىقتالعان 10 وتانداسىمىزعا قاتىستى قۇجاتتار مەن ناقتى ايعاقتار توپتاستىرىلعان ەكەن. بۇلاردىڭ باسىم بولىگى قازاقستاندىقتار ءۇشىن ءالى دە بولسا بەيمالىم كۇيىندە قالىپ وتىرعانىن ەسكە سالا كەتسەك دەيمىز. كىتاپتا رەسەي قورعانىس مينيسترلىگىنىڭ مۇراعاتىنان الىنعان ماتەريالدارى مەن قۇندى قۇجاتتارى تۇڭعىش رەت جاريالانىپ وتىرعانى جانە بار.
سالتاناتتى شارانى اتالمىش مۋزەي ديرەكتورى دارحان مىڭباي اشىپ, كىتاپ تۋرالى جان-جاقتى مالىمەت بەردى. ول ءوز سوزىندە, ەل قورعاعان ەرەن ەرلەرىمىزدىڭ ەرلىگىن حالىق جادىندا ساقتاۋ ءۇشىن تەك جەڭىس كۇنىندە عانا ەمەس, ۇزدىكسىز ناسيحات جۇمىسىن جۇرگىزۋ قاجەت ەكەنىن باسا ايتتى.
باسقوسۋ بارىسىندا جوبا اۆتورى بەرىك ابدىعالي ۇلى: «بۇل جاۋىنگەرلەردىڭ بارلىعى دا جان اياماي ەرلىك كورسەتكەن باتىرلار دەۋگە بولادى. جاس ۇرپاق سول قاھارماندارعا قاراپ بوي تۇزەيدى. ماقتان ەتەدى. وتان ءۇشىن وت كەشكەن باتىرلارىمىزدىڭ ەرلىگى ءوز دارەجەسىندە دارىپتەلۋى ءتيىس. نەگىزىنەن بۇل جيناققا ماسكەۋدەن الىنعان قۇجاتتار جيناقتالعان», دەدى.
جوبا اۆتورىنىڭ وسىدان بەس جىل بۇرىن مەملەكەتتىك ءتىلدى دامىتۋ قورىنىڭ ديرەكتورى قىزمەتىن اتقارىپ تۇرعان كەزىندە قولعا العان «حالىق باتىرى» باعىتى بويىنشا جەڭىستىڭ 70 جىلدىعى اياسىندا جۇزەگە اسىپ وتىر. جوباعا «نۇر وتان» پارتياسىنىڭ قوعامدىق ساياسات ينستيتۋتى مەن «بايكادام حولدينگ» كومپانياسى ۇلكەن قولداۋ ءبىلدىرىپتى. تاعى ءبىر ايتا كەتەرلىگى, اتالمىش يگى شارا سوڭى «جەڭىسكە قۇرمەت» اتتى كورمەگە ۇلاستى. مۋزەيدىڭ «عاسىرلار قويناۋىنان سىر شەرتكەن قازاقستان» جوباسى اياسىندا اشىلعان بۇل كورمە نەگىزى 2 بولىمنەن تۇرادى. كورمەنىڭ ءبىرىنشى بولىمىندە «قازاقستان سوعىس جىلدارىندا» تاقىرىبىن قامتىپ قازاقستاندىق ديۆيزيا جاۋىنگەرلەرىنىڭ سۋرەتتەرى, مۇراعاتتىق قۇجاتتارى, ۇرىس جولدارى, كارتالار كورىنىس تاپسا, ەكىنشى ءبولىم «1942-1943 جىلدارداعى ستالينگراد شايقاسىنىڭ» فوتولارىنان قۇرالىپتى.
راۋشان تاۋىرحانقىزى, جۋرناليست.
