ەلىمىزدە نارەستە ءولىمى ەداۋىر ازايدى

ۇكىمەت باسشىسى حالىق دەنساۋلىعىنا قاتىستى وڭ وزگەرىستەردى اتاپ ءوتتى.

ء«بىز 2029 جىلعا قاراي حالىقتىڭ ءومىر ءسۇرۋ ۇزاقتىعىن كەمىندە 77 جاسقا جەتكىزۋ ماقساتىنا بىرتىندەپ جاقىنداپ كەلەمىز. وتكەن جىلدىڭ قورىتىندىسى بويىنشا ءومىر ءسۇرۋ ۇزاقتىعى العاش رەت 75 جىل 4 ايعا جەتتى. مەملەكەت باسشىسىنىڭ قولداۋى مەن تۇراقتى نازارىنىڭ ارقاسىندا دەنساۋلىق سالاسىنداعى نەگىزگى كورسەتكىشتەردى جاقسارتۋعا قول جەتكىزىلدى», دەدى ولجاس بەكتەنوۆ.

ونىڭ مالىمەتىنشە, «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە 655 نىساننىڭ 540-ى سالىنىپ, 1 ميلليونعا جۋىق اۋىل تۇرعىنى العاشقى مەديتسينالىق قىزمەتپەن قامتىلدى.

الەۋمەتتىك ينفراقۇرىلىم دا نازاردان تىس قالعان جوق. بيىل حالىقتى تولىق اۋىز سۋمەن قامتۋ مىندەتى ورىندالماق. بۇل ماقساتقا رەسپۋبليكالىق بيۋدجەتتەن 147 ملرد تەڭگە, ال ارناۋلى مەملەكەتتىك قوردان 160 ملرد تەڭگەدەن استام قاراجات بولىنگەن. جىل سوڭىنا دەيىن 17 قالا مەن 463 اۋىلدا ءتيىستى جوبالار اياقتالادى.

سونىمەن قاتار, «اۋىل اماناتى» باعدارلاماسى اياسىندا 25 مىڭ جوباعا قولداۋ كورسەتىلىپ, 30 مىڭعا جۋىق جاڭا جۇمىس ورنى اشىلادى. ال 2026 جىلعا دەيىن وڭىرلەردى دامىتۋعا 5,4 ترلن تەڭگە ءبولۋ جوسپارلانعان.

پرەمەر-ءمينيستردىڭ ايتۋىنشا, وڭىرلەردىڭ الەۋەتىن كوتەرۋ تەك تىكەلەي قارجىلاندىرۋ ارقىلى ەمەس, دامۋ ينستيتۋتتارىنىڭ قولداۋىمەن دە جۇزەگە اسادى.

«مىسالى, «بايتەرەك» حولدينگى جىل باسىنان بەرى كاسىپكەرلەرگە 4 ترلن تەڭگەدەن استام قارجىلىق قولداۋ كورسەتتى. بۇل 8 ترلن تەڭگە بولاتىن جىلدىق جوسپاردىڭ 50 پايىزىنان استامىن قۇرايدى. ونىڭ شامامەن 2 ترلن تەڭگەسى شاعىن جانە ورتا بيزنەستى دامىتۋعا, 1,5 ترلن تەڭگەدەن استامى قوسالقى شاعىن كاسىپورىندارمەن تىعىز بايلانىس ورناتاتىن ءىرى بيزنەستى قولداۋعا باعىتتالدى», دەدى ۇكىمەت باسشىسى.