– ەۆگەني اندرەەۆيچ, جىل سايىن وتكىزىلىپ جۇرگەن «مەكتەپكە جول» اكتسياسىنىڭ بيىل قانداي ەرەكشەلىگى بار؟
– اكتسيا – جاي عانا ماتەريالدىق كومەك ەمەس, بۇل ءار بالاعا قوعامنىڭ نازارىن اۋدارۋ, ولار جالعىز ەمەس ەكەنىن سەزىندىرۋ. «جومارت جان» ورتالىعى ارقىلى ءبىز مىڭداعان بالانىڭ مەكتەپكە دايىندىقپەن بارۋىنا ىقپال ەتىپ كەلەمىز. بيىل دا وسى باعىتتا بىرقاتار وڭىردە جۇمىس ءجۇرىپ جاتىر. تەك مەكتەپكە قاجەتتى قۇرال-جابدىقتارمەن قامتاماسىز ەتىپ قانا قويماي, ولارعا رۋحاني دەمەۋ بەرۋدى دە باستى ماقسات ەتتىك.
جاقىندا ەلوردالىق دوستىق ۇيىندە «باقىتتى شاڭىراق» قوعامدىق قورىنىڭ جانە «ەرەكشە بالالار اتا-انالارىنىڭ وداعى» رقب بالالارىنا جاڭا وقۋ جىلىنا دايىندىق الدىندا ماتەريالدىق كومەك كورسەتىلدى. قايىرىمدىلىق اكتسياسى بارىسىندا 100-دەن اسا بالا مەكتەپ سومكەلەرىمەن جانە وقۋ قۇرالدارىمەن قامتاماسىز ەتىلدى.
ال وتكەن جىلى وسى باعىتتا 7 199 وقۋشى مەن 4 544 وتباسىنا جالپى 260 ملن تەڭگە كولەمىندە قولداۋ كورسەتىلگەن ەدى. وعان قاجەتتى مەكتەپ قۇرال-جابدىقتارىن ساتىپ الىنىپ, سونىڭ ىشىندە سومكەلەر, كەڭسە تاۋارلارى, نوۋتبۋكتار, مەكتەپ كيىمى جانە تاعى باسقا دۇنيەلەر ۇلەستىرىلدى. مۇنداي جاناشىرلىق شارالارىنىڭ اۋقىمى كەڭ. ماسەلەن, بىلتىر قاراعاندى وبلىسىنداعى ەكى اۋىل مەكتەبىن ينتەراكتيۆتى تاقتالارمەن جابدىقتاپ, بالعىنداردىڭ ساپالى ءبىلىم الۋىنا جاعداي جاسادىق. ياعني قايىرىمدىلىق تەك ماتەريالدىق كومەكپەن شەكتەلمەيدى, بۇل ءبىلىم مەن بولاشاققا سالىنعان ينۆەستيتسيا دەۋگە بولادى.
ايتا كەتەيىك, جاڭا ەرەجەلەرگە ساي, جەكەمەنشىك مەكتەپتەردە وقيتىن, بىراق الەۋمەتتىك وسال ساناتقا جاتاتىن بالالار دا اكتسيا اياسىندا ماتەريالدىق كومەك الۋعا قۇقىلى.
– «جومارت جان» ورتالىقتارىنىڭ قىزمەتى تۋرالى كەڭىرەك ايتىپ بەرسەڭىز.
– پرەزيدەنت قاسىم-جومارت توقاەۆتىڭ اتىراۋداعى ءۇشىنشى ۇلتتىق قۇرىلتايدا بەلگىلەنگەن مىندەتتەرىنە سايكەس, قازاقستان حالقى اسسامبلەياسى ءوزىنىڭ قايىرىمدىلىق قىزمەتىنىڭ تيىمدىلىگىن ارتتىرۋ جانە ونىڭ الەۋمەتتىك ماڭىزدىلىعىن نىعايتۋ بويىنشا ءتۇرلى شارالار قابىلدادى. سونىڭ ءبىرى رەتىندە بىلتىر رەسپۋبليكا كولەمىندە قحا-نىڭ «جومارت جان» قايىرىمدىلىق ورتالىقتارى اشىلدى. قازىرگى ۋاقىتتا ءبىر رەسپۋبليكالىق جانە 20 وڭىرلىك ورتالىق جۇمىس ىستەپ تۇر. 350-دەن اسا بەلسەندىمىز بار. ولاردىڭ قاتارىن ەلدەگى ەتنومادەني بىرلەستىكتەردىڭ وكىلدەرى, مەتسەناتتار, قايىرىمدى ەرىكتىلەر مەن جاستار قۇرايدى. جۇمىسىمىز نەگىزگى ءتورت باعىت بويىنشا جۇرەدى: «جۇرەكتەن جۇرەككە», «مەيىرىم» جوباسى, «قامقور» باعدارلاماسى جانە جوعارىدا اتاپ وتكەن «مەكتەپكە جول» اكتسياسى.
«جۇرەكتەن جۇرەككە» جوباسى بىلتىر ەل باسىنا تۇسكەن قيىن ساتتە جۇدىرىقتاي جۇمىلىپ, جەدەل ارەكەت ەتتى. قارعىن سۋدان زارداپ شەككەن اعايىنعا 805 ملن تەڭگەدەن اسا قاراجاتقا 1 700 توننادان ارتىق گۋمانيتارلىق جۇك جونەلتىلدى. قالپىنا كەلتىرۋ جۇمىستارىنا اسسامبلەيانىڭ 12 مىڭنان اسا ەرىكتىسى اتسالىسىپ, بىرلىك پەن جاناشىرلىقتىڭ ۇلگىسىن كورسەتتى. سونىمەن قاتار ەڭ وسال وتباسىلار ءۇشىن جالپى سوماسى 90 ملن تەڭگەگە جۋىق ءۇي ساتىپ الىنىپ, تابىستالدى.
ال «مەيىرىم» جوباسى – الەۋمەتتىك وسال توپتاردىڭ ءومىر ساپاسىن جاقسارتۋعا باعىتتالعان باستاما. ونىڭ اياسىندا 1 320 وتباسىنىڭ جانە 483 ازاماتتىڭ شۇعىل الەۋمەتتىك ماسەلەلەرى شەشىمىن تاپتى. استانا قالاسى مەن ماقتاارال اۋدانىندا كوپبالالى وتباسىلارعا باسپانا كىلتى تابىستالىپ, مىڭداعان جاننىڭ ءۇمىتى اقتالدى.
«قامقور» باعدارلاماسى شەڭبەرىندە بالالارعا ارنالعان ويىن, ال جاستارعا سپورت الاڭدارى سالىنىپ, سپورت ورتالىقتارى قاجەتتى زاماناۋي قۇرال-جابدىقتارمەن قامتاماسىز ەتىلدى. ماسەلەن, اقتاۋ قالاسىندا قوعامدىق ورىندارعا تەننيس ۇستەلدەرى ورناتىلسا, اتىراۋدا سپورتتىق جارىستار اياسىندا بالالارعا ۆەلوسيپەدتەر سىيعا تارتىلدى. جالپى, بىلتىر اسسامبلەيا 1,3 ملرد تەڭگەگە جۋىق قايىرىمدىلىق كومەك كورسەتتى.
بيىل «جومارت جان» ورتالىعىنىڭ قىزمەتى قايىرىمدىلىق باعىتتاعى كەڭ اۋقىمدى اكتسيالار مەن جوبالاردى جۇزەگە اسىرۋعا باعىتتالادى. قازىرگى ۋاقىتتا وسى جانە كەلەسى جىلعا ارنالعان بىرقاتار جاڭا باستامالار دايىندالىپ جاتىر. سونىمەن قاتار, اسسامبلەيانىڭ قوعامدىق قۇرىلىمدارىنىڭ دا باستامالارىنا قولداۋ كورسەتىلەدى. اتاپ ايتقاندا, انالار كەڭەسى مەن اسسامبلەيا جاستارى سەكىلدى ۇيىمداردىڭ جوبالارى, سونداي-اق «جەڭىس بىرلىكتە» باعدارلاماسى اياسىنداعى قايىرىمدىلىق جانە سپورتتىق ءىس-شارالار ىسكە اسىرىلادى.
– وسىنداي باستامالاردىڭ الەۋمەتتىك ماقساتتاردان تىس تاعى قانداي ماڭىزى بار؟
– بۇل جوبالاردىڭ ەڭ باستى ماقساتى – قوعامدى بىرىكتىرۋ, ادامدار اراسىنداعى سەنىم مەن جاناشىرلىقتى كۇشەيتۋ. وتانداستارىمىزدىڭ اراسىندا ءوزارا قولداۋ مەن جاۋاپكەرشىلىك مادەنيەتىن نىعايتۋعا سەپتىگىن تيگىزۋ. ءبىز ءبىر-بىرىمىزگە كومەكتەسىپ ۇيرەنسەك, قيىن جاعدايدا قالعان جانعا بەيجاي قاراماساق, مىنە, سول – شىنايى دامىعان قوعامنىڭ كورسەتكىشى. قحا-نىڭ «جومارت جان» بازاسىنداعى جوبالاردىڭ نەگىزگى يدەياسى – تەك كومەك كورسەتۋ ەمەس, ول تاربيەنىڭ, ىزگىلىكتىڭ, ءۇمىتتىڭ ءرامىزى. دەمەك ورتالىق بەلگىلى ءبىر دەڭگەيدە ەلىمىزدىڭ الەۋمەتتىك ساياساتىن ىسكە اسىرۋداعى ماڭىزدى تەتىكتەردىڭ بىرىنە اينالىپ وتىر.
– اڭگىمەڭىزگە راحمەت.
اڭگىمەلەسكەن –
زەيىن ەرعالي,
«Egemen Qazaqstan»
